ޢަބްދުﷲ ޝަރީފް ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ފޮނުއްވައިފިއެވެ.
ޝަރީފް ނިޔާވުމާ ގުޅިގެން ރައީސް މުޢިއްޒު މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، ލ. ދަނބިދޫ، ނިރިލި، އަލްމަރްޙޫމް ޢަބްދުﷲ ޝަރީފަކީ، ގެދޮރުވެރިކަމާ ބެހޭ ވުޒާރާގެ ކޯޑިނޭޓަރެއްގެ މަގާމުގައި، އެމަނިކުފާނާ ވަރަށް ގާތުން މަސައްކަތްކުރެއްވި ބޭފުޅެއް ކަމަށެވެ.
މީގެ އިތުރުން ޝަރީފަކީ ލ. ދަނބިދޫ ކަތީބުކަމާއި ހިންގުމުގެ ދާއިރާގެ އެނޫން ވަޒީފާތައް ވެސް އަދާކުރެއްވި ހީވާގި ހިދުމަތްތެރިއެއް ކަމަށް ރައީސް މުޢިއްޒު ވިދާޅުވިއެވެ.
ރައީސް މުޢިއްޒު ވަނީ، މާތްﷲ ގެ ތަނަވަސް ރަހްމަތުގައި ޢަބްދުﷲ ޝަރީފް ލަހައްޓަވައި، ސުވަރުގޭގެ ދާއިމީ ނިއުމަތް ދެއްވުން އެދިވަޑައިގެން ދުއާ ކުރައްވައި މަރްޙޫމްގެ ޢާއިލާއަށް ތައުޒިޔާ ފޮނުއްވައިފައެވެ.
