ޢީދު ފާހަގަކުރުމުގައި އިސްލާމީ އަހުލާގާއި ރިވެތި އުސޫލުތަކަށް ރައްކާތެރިވާންޖެހޭނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިނިސްޓަރު ޝަހީމް މި މޭރުމުން ވިދާޅުވީ، ކުޅުދުއްފުށި ސިޓީގައި ”މަށި މާލި ޕެރޭޑް“ ގެ ނަމުގައި ދީނުގެ މިންގަނޑުތަކުން ބޭރުވާފަދަ ގޮތަކަށް މިއަދު ބޭއްވި ޕެރޭޑާ ގުޅިގެން މީޑިއާތަކަށް ފޮނުއްވި މެސެޖެއްގައެވެ. މިނިސްޓަރު ވިދާޅުވީ، އަޟްޙާ ޢީދަކީ އިސްލާމީ އުއްމަތަށް މާތްﷲ ދަރުމަކުރެއްވި މަތިވެރި ޢީދެއް ކަމަށެވެ.
ޙައްޖުގެ އަޅުކަމާއި ގުޅިގެން، އަދި ޙައްޖުގެ އަޅުކަން މުޅިން ނުނިމެނޭސް، މަޝާއިރުތަކުގައި ޙައްޖުވެރިން ތަލްބިޔާ ކިޔައި މާތްﷲ އެއްކައުވަންތަކޮށް އެކަލާނގެ ޝިއާރުތައް މަތިވެރިކުރަމުންދާއިރު، އަދި މުޅި އިސްލާމީ އުންމަތުގެ ކަންކޮޅުތަކުގައި ފަސް ނަމާދުގެ ފަހުގައި ތަކުބީރު އަޑު އިވެމުންދާ ހިނދު، ޢީދު ފާހަގަކުރުން ކުރިއަށް ގެންދަންވާނީ އިސްލާމީ ސަގާފަތާއި ހިލާފުނުވާ ގޮތުގެ މަތިންކަން މުސްލިމުން ހަނދާންކުރަންޖެހޭ ކަމަށް މިނިސްޓަރު ވިދާޅުވިއެވެ.
އެގޮތުން ކުޅިވަރުކުޅުމާއި އުފާ ފާޅުކުރުމުގައި އިސްލާމީ ޢީދެއްގެ މަތިވެރިކަން ދަމަހައްޓައި އިސްލާމީ އަހުލާގާއި ރިވެތި އުސޫލުތަކަށް ރައްކާތެރިވާންވާނެ ކަމަށް ވެސް މިނިސްޓަރު ވަނީ އިތުރަށް ވިދާޅުވެފައެވެ.
ފާހަގަކޮށްލެވޭ ގޮތުގައި މި އަހަރުގެ އަޟްޙާ ޢީދު ރާއްޖޭގެ އެކި ކަންކޮޅުތަކުގައި ވަރަށް ކުލަގަދަކޮށް އަންނަނީ ފާހަގަކުރަމުންނެވެ.
