ޖަލުގައި ބަންދުކޮށްފައި ތިބި ދެ ގައިދީން ކަމަށްވާ ޝަހުޒާން އާއި ލީވާން ތިބި ގޮޅިން މޯބައިލް ފޯނެއް ފެނުނު މައްސަލަ މޯލްޑިވްސް ޕޮލިސް ސާވިސްއިން ސީރިއަސް މައްސަލައެއްގެ ގޮތުގައި ތަހުގީގު ކުރަން ފަށައިފިއެވެ.
މި މައްސަލައާ ގުޅިގެން ހޯމް މިނިސްޓަރު އަލީ އިހުސާން ހާމަކުރެއްވި ގޮތުގައި، މިދިޔަ މެއި މަހުގެ 15 ވަނަ ދުވަހުގެ ރޭގަނޑު 19:35 ހާއިރު، މޯލްޑިވްސް ކަރެކްޝަނަލް ސާވިސްގެ އޮފިސަރުން ވަނީ ޝަހުޒާން އާއި ލީވާން ބަންދުކޮށްފައި ތިބި ގޮޅި ބަލައި ފާސްކޮށްފައެވެ. މި ފާސްކުރުން ކުރިއަށް ގެންގޮސްފައިވަނީ އެ ދެމީހުންގެ ކުރިމަތީގައެވެ. މި ހޯދުމުގެ ތެރޭގައި އެ ގޮޅީގައި ހުރި ކަބަޑެއްގެ ތެރޭގައި ހުރި އަންނައުނުތަކުގެ ތެރެއިން މޯބައިލް ފޯނެއް ފެނިފައިވާ ކަމަށް މިނިސްޓަރު ވިދާޅުވިއެވެ.
ޝަހުޒާން ވަނީ އޭނާއާއި ލީވާން ވަކި ދެ ގޮޅިއަކަށް ބަދަލުކުރީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންގަވައިގެން ކަމަށް ތުހުމަތުކޮށްފައެވެ. ނަމަވެސް، މިނިސްޓަރު އިހުސާން ވިދާޅުވީ ޝަހުޒާން ދައްކަމުންދާ އެ ވާހަކަތަކަކީ ”100 އިންސައްތަ ދޮގު“ ވާހަކަތަކެއް ކަމަށެވެ. ޖަލުގައި ހިނގާ މިފަދަ އިދާރީ ކަންކަމަކީ ރައީސުލްޖުމްހޫރިއްޔާ ގޮތް ނިންމަވާ ކަންކަން ނޫން ކަމަށާއި، ރައީސްގެ ފަރާތްޕުޅުން ޖަލުގެ މިފަދަ ކަންކަމާ ގުޅޭގޮތުން އެއްވެސް އިރުޝާދެއް ދުވަހަކުވެސް ދެއްވާފައި ނުވާކަން މިނިސްޓަރު ކަށަވަރުކޮށްދެއްވިއެވެ.
މިނިސްޓަރު އިތުރަށް ބަޔާންކުރެއްވި ގޮތުގައި، ގޮޅިން މަނާ އެއްޗެއް ފެނުމާ ގުޅިގެން އެ ދެމީހުން މޮނިޓާ ކުރެވޭ ގޮތަށް ވަކި ދެ ގޮޅިއަކަށް ބަދަލުކުރީ ޖަލުގައި އަމަލުކުރާ އާންމު އުސޫލުތަކުގެ ދަށުންނެވެ. އަދި އެ ގޮޅިތައް ވަކި އިންޓަވަލްތަކެއްގައި ބަލައި ފާސްކުރަމުންދަނީ ޖަލުގެ ސަލާމަތީ ކަންކަން ވަރުގަދަކުރުމުގެ ގޮތުން ކަމަށާއި، މިއީ ވަކި ގައިދީއަކަށް އަމާޒުކޮށްގެން ކުރާ ކަމެއް ނޫން ކަމަށްވެސް އެމަނިކުފާނު ވިދާޅުވިއެވެ.
މި މައްސަލައާ ގުޅިގެން ރާއްޖޭގެ ތިން ނޫސްވެރިއަކު ސުވާލުކުރުމުން ކަން ހިނގާފައިވާ ގޮތުގެ ތަފްސީލީ މައުލޫމާތު ހިއްސާކޮށްފައިވާނެ ކަމަށް މިނިސްޓަރު ވިދާޅުވިއެވެ. ނަމަވެސް، އެ މައުލޫމާތުތައް ރައްޔިތުންނަށް ސާފުކޮށްދީ، ހަގީގަތާ އެއްގޮތަށް ރިޕޯޓްކޮށްފައި ނުވާތީ މިނިސްޓަރު ވަނީ ކަންބޮޑުވުން ފާޅުކުރައްވާފައެވެ.
ޖަލަށް ވެއްދުން މަނާ ތަކެތި ގައިދީން ތިބޭ ގޮޅިން ފެނުމަކީ ސީރިއަސް މައްސަލައަކަށް ވާތީ، މޯލްޑިވްސް ޕޮލިސް ސާވިސްއިން ދަނީ މިކަން އިތުރަށް ތަހުގީގު ކުރަމުންނެވެ.
އެމީހުން ޖަލަޢް ދިޔައިރު ގެންދިޔަ ފޯނެއްތޯ އެއީ ވަރަޢްފަހުން ބޮޑީ ސްކޭން މެޝިނެއް ބެހެއްޓި ވާހަކަ އިވުނު އޭތި ހަލާކުވީތޯ ނޫނީ މަތިން އެގޮޅިއަޢް ވެއްޓުނު ފޯނެއްބާ!