އިސްލާމީ އުއްމަތަށް ޖެހިފައިވާ މުސީބާތްތަކުން ސަލާމަތްކުރެއްވުމަށް އެދި ހުރިހާ މުސްލިމުން ވެސް ދުއާކުރުމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އެދިވަޑައިގެންފިއެވެ.
ރައީސް ޔާމީން މިކަމަށް އެދިވަޑައިގަތީ ބަރަކާތްތެރި އަޟްހާ ޢީދުގެ ތަހުނިޔާ ދިވެހި ރައްޔިތުންނަށް އަރިސްކުރައްވަމުން ފޮނުއްވެވި މެސެޖެއްގައެވެ. އެ މެސެޖުގައި ރައީސް ޔާމީން ވަނީ އެމަނިކުފާނާއި އެމަނިކުފާނުގެ އާއިލާގެ ނަމުގައި ޢީދުގެ ހެޔޮ އެދުމާއި މުބާރަކުބާދީ ދިވެހި ރައްޔިތުންނަށް އަރިސް ކުރައްވައިފައެވެ.
ޙައްޖުގެ މަތިވެރި އަޅުކަމުގެ ބަރަކާތާއެކު ހުރިހާ ރައްޔިތުންނާ ޢީދު ބައްދަލުކުރާއިރު ވީހައިވެސް ގިނައިން ހެޔޮ އަމަލުތައް ގިނަކުރުމަށް ރައީސް ޔާމީންގެ މެސެޖުގައި އިލްތިމާސްކުރެއްވިއެވެ.
މިއަދަކީ މުޅި އިސްލާމީ އުއްމަތަށް އައި ބަރަކާތްތެރި އަދި އުފާވެރި ދުވަހެއްކަން ފާހަގަކުރައްވައި ރައީސް ޔާމީން ވިދާޅުވީ، އަޟްޙާ ޢީދަކީ ކިޔަމަންތެރިކަމާއި، ގުރުބާނީގެ މަތިވެރި ހަނދާންތައް އާކޮށްދޭ މުނާސަބަތެއް ކަމަށެވެ. ވަކިން ހާއްސަކޮށް ސަލާމްލެއްވި އިބްރާހީމްގެފާނުގެ މަތިވެރި ގުރުބާނީގެ ވާހަކަ މި ދުވަހު އަހަރެމެންގެ ހިތްތަކަށް ގެނެސްދޭ ކަމަށް ވެސް އެމަނިކުފާނު ވިދާޅުވިއެވެ.
ރައީސް ޔާމީން ވިދާޅުވީ، މިއީ އެކަކު އަނެކަކަށް އަޅާލާ، އާއިލީ ގުޅުންތައް ބަދަހިކޮށް އަދި އެކުވެރިކަން އާލާކުރަންވީ ވަގުތު ކަމަށެވެ.
މީގެ އިތުރުން ޢީދުގެ އުފާ ލިބިގަންނަމުންދާއިރު، އިސްލާމީ އުއްމަތަށް މިއަދު ކުރިމަތިވެފައިވާ ގޮންޖެހުންތަކާއި ނުރައްކާތަކުގެ މަތިން ހަނދާންކޮށް ހާއްސަކޮށް ފަލަޞްޠީނުގެ ރައްޔިތުންނަށް ކުރިމަތިކުރުވަމުން ގެންދާ އަނިޔާއިން އެ މުސްލިމު އަހުންނާ އުހްތުން ސަލާމަތްކޮށްދިނުމަށް އެދި ދުއާކުރުމަށް ވެސް ރައީސް ޔާމީން ވަނީ އިލްތިމާސްކުރައްވައިފައެވެ.
