ބަރަކާތްތެރި އަޟްޙާ ޢީދުގެ މުނާސަބަތުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދު، ދިވެހި އެންމެހާ ރައްޔިތުންނަށް ޢީދުގެ ތަހުނިޔާ އާއި ހެޔޮއެދުންތައް ފޮނުއްވައިފިއެވެ.
ރައީސުލްޖުމްހޫރިއްޔާގެ އަނބިކަނބަލުން މި ތަހުނިޔާ ފޮނުއްވާފައިވަނީ މި ބަރަކާތްތެރި ޢީދާ ގުޅިގެން މިއަދު ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.
އެކަމަނާގެ މެސެޖުގައި، އިސްލާމީ އުންމަތުގެ އެންމެހާ އަޚުންނާއި އުޚުތުންނަށް އަޟްޙާ ޢީދުގެ މުބާރަކުބާދީ ވަނީ އަރިސްކުރައްވާފައެވެ.
މީގެއިތުރުން، މެޑަމް ސާޖިދާ ހިއްސާކުރެއްވި ޕޯސްޓުގައި ވަނީ މި ބަރަކާތްތެރި ދުވަހަކީ އެންމެހާ މުސްލިމުންގެ މެދުގައި ލޯތްބާއި ކުލުނު އިތުރުވެ، އުފާވެރިކަމުން ފުރިގެންވާ ދުވަހެއް ކަމުގައި ލެއްވުމަށް އެދި ދުޢާކުރައްވާފައެވެ.
މިއަހަރުގެ އަޟްޙާ ޢީދު ރާއްޖޭގެ އެކި ކަންކޮޅުތަކުގައި ކުލަގަދަކޮށް ފާހަގަކުރަމުންދާއިރު، ސަރުކާރުގެ އިސްވެރިންނާއި ދައުލަތުގެ މުއައްސަސާތަކުން ވެސް ދަނީ ރައްޔިތުންނަށް ޢީދުގެ ތަހުނިޔާ ފޮނުއްވަމުންނެވެ.
