މާލެ ސަރަހައްދުގައި ބޮޑު ޖަމާއަތުގައި އިމާމުވެ ޢީދު ނަމާދުކުރައްވާނެ ޚަތީބުން އިސްލާމިކް މިނިސްޓްރީން ކަނޑައަޅައިފިއެވެ.
މާލެ ސަރަހައްދުގެ ހަ ތަނެއްގައި ބޮޑު ޖަމާއަތުގައި ޢީދު ނަމާދުކުރުމަށް ވަނީ ހަމަޖެހިފައެވެ. އެގޮތުން މާލޭގެ ތިން ސަރަހައްދަކާއި، ވިލިމާލޭގެ އެއް ސަރަހައްދުގެ އިތުރުން ހުޅުމާލޭގެ ދެ ސަރަހައްދެއްގައި ބޮޑު ޖަމާއަތުގައި ޢީދު ނަމާދުކުރުމަށް ވަނީ ހަމަޖެހިފައެވެ.
މާލޭގައި ޢީދު ނަމާދުކުރާ ސަރަހައްދުތަކުގެ ތެރެއިން، މާފަންނު ސްޓޭޑިއަމްގައި ބާއްވާ ބޮޑު ޖަމާއަތުގައި އިމާމުވެ ނަމާދުކުރައްވާނީ އައްޝެއިޚް ޢަބްދުﷲ ސަޢުދާންއެވެ. މަސްޖިދުލްސުލްޠާން މުޙައްމަދު ތަކުރުފާނުލްއަޢުޡަމް (އިސްލާމީ މަރުކަޒު) ގައި ޢީދު ނަމާދުކުރައްވާނީ އައްޝެއިޚް މުޙައްމަދު ލަޠީފްއެވެ. އަދި މަސްޖިދުލްމަލިކި ސަލްމާންގައި ޢީދު ނަމާދުކުރައްވާނީ އައްޝައިޚް އިބްރާހިމް ރަޝީދު ޙަސަންއެވެ.
ހުޅުމާލޭގައި ޢީދު ނަމާދުކުރާ ސަރަހައްދުތަކުގެ ތެރެއިން، ހުޅުމާލެ ފުރަތަމަ ފިޔަވަހީގެ ސިންތެޓިކް ޓްރެކް ސަރަހައްދުގައި ބާއްވާ ބޮޑު ޖަމާއަތުގައި އިމާމުވެ ނަމާދުކުރައްވާނީ އައްޝެއިޚް ނަޞްރުﷲ ޢަލީއެވެ. ހުޅުމާލޭގެ ދެވަނަ ފިޔަވަހީގެ ކުޅިވަރު އެކުވެނީގައި ޢީދު ނަމާދުކުރައްވާނީ އަލްހާފިޡް މުޙައްމަދު ޙަނޫން ޙުސައިންއެވެ. މީގެ އިތުރުން ވިލިމާލޭ ފުޓުބޯޅަ ދަނޑުގައި ބާއްވާ ބޮޑު ޖަމާއަތުގައި ޢީދު ނަމާދުކުރައްވާނީ އަލްޤާރީ އަޙްމަދު ރިޔާޟްއެވެ.
މޫސުން ގޯސްވެ ވިއްސާރައިގެ ސަބަބުން މައިދާންތަކުގައި ނަމާދުކުރުން ކެންސަލް ކުރަން ޖެހިއްޖެ ހާލަތެއްގައި، މާލެ، ވިލިމާލެ އަދި ހުޅުމާލޭގައި ހުކުރު ނަމާދު ކުރާ ހުރިހާ މިސްކިތްތަކެއްގައި ވެސް ޢީދު ނަމާދުކުރާނެ ކަމަށް އިސްލާމިކް މިނިސްޓްރީން ވަނީ ބުނެފައެވެ. މި އަހަރު ވެސް ޢީދު ނަމާދުކުރަން ފެށުމަށް ހަމަޖެހިފައިވަނީ ހެނދުނު 07:00 ގައެވެ.
