މި އަހަރުގެ ޙައްޖު ޚުޠުބާގައި، މާތްﷲ އަށް ތަގުވާވެރިވެ، އިސްލާމްދީނުގެ ތައުހީދުގެ މަތީގައި ސާބިތުވެ ތިބުމަށް މުޅި އިސްލާމީ އުއްމަތަށް ގޮވައިލައިފިއެވެ.
މިއަދުގެ ޚުޠުބާ ފަށަމުން އެންމެ ފުރަތަމަ ވެސް ހަނދާންކޮށްދިނީ ޙައްޖު ސޫރަތުގެ ފުރަތަމަ ދެ އާޔަތެވެ. އެ އާޔަތްތަކުގައި ބަޔާންކުރައްވާފައިވަނީ ގިޔާމަތްވުމުގެ ބިރުވެރިކަމާއި، އެދުވަހުގެ ގަދަފަދަ ޒަލްޒަލާއިން ސަލާމަތްވުމަށްޓަކައި މާތްﷲ އަށް ތަގުވާވެރިވުމުގެ މުހިއްމުކަމުގެ މައްޗަށެވެ. ތަގުވާވެރިވުމަކީ އެއްކައުވަންތަ މާތްﷲ ގެ އަމުރުފުޅުތަކަށް ފުރިހަމައަށް ބޯލަނބައި، އެކަލާނގެ ނަހީކުރެއްވި ކަންކަމުން ދުރުހެލިވުންކަން ފާހަގަކުރަމުން ޚުޠުބާގައި ބުނެފައިވަނީ، އެއީ އީމާންކަމުގެ ރުކުންތައް ފުރިހަމަކުރުން ކަމަށެވެ.
މީގެ އިތުރުން، މުއުމިނުންގެ އެންމެ ބޮޑު ޝިއާރަކީ ތައުހީދު ކަމަށްވާއިރު، އިސްލާމްދީނުގެ ފަސް ރުކުން ކަމަށްވާ ޝަހާދަތުގެ ދެކަލިމަ ކިޔުމާއި، ނަމާދާއި، ޒަކާތާއި، ރަމަޟާން މަހުގެ ރޯދަ އަދި ޙައްޖު ބިނާވެގެންވަނީ މި މަތިވެރި ތައުހީދުގެ މަތީގައި ކަމަށް ޚުޠުބާގައި ވަނީ ބުނެފައެވެ. ކަން މިހެން އޮތް އިރު މާތްﷲ ނޫން އެހެން ފަރާތަކަށް އަޅުކަން ނުކުރުމަށް ޚުޠުބާގައި ވަނީ އިލްތިމާސްކޮށްފައެވެ.
ހަމައެހެންމެ، ހަޔާތުގައި ދިމާވާ ކޮންމެ ކަމަކަށް ވެސް ކެތްތެރިކަން އިސްކޮށް ޝުކުރުވެރިވުމަށް ނަސޭހަތްތެރިވަމުން ޚުޠުބާގައި ވަނީ ކެތްތެރިންނަށް މާތްﷲ ހެޔޮ ދަރުމަ ދެއްވާނެކަން ހަނދާންކޮށްދީފައެވެ. އަދި އެކަލާނގެ އާޔަތްތަކަށް ދެކޮޅުހަދައި، ނުކިޔަމަންތެރިވި ކުރީގެ އުއްމަތްތައް ހަލާކުކުރެއްވި ގޮތުގެ ވާހަކަ ބަޔާންކޮށްދެއްވައި، އެކަންކަމުން އިބުރަތް ލިބިގަތުމަށް ޚުޠުބާގައި ވަނީ ހަނދުމަކޮށްދީފައެވެ.
ޙައްޖު ދުވަހުގެ ޚުޠުބާ ނިންމައިލީ، އަނިޔާ ލިބެމުންދާ މުސްލިމް އަހުންނާއި އުހްތުންނަށް ކެތްތެރިކަމާއި ނަސްރެއް ދެއްވުމަށާއި، މުސްލިމް އުއްމަތް އެއްބައިވަންތަ ކުރައްވައި ދެ ދުނިޔޭގެ ބާއްޖަވެރިކަން ދެއްވުމަށް އެދި ދުއާ ކުރަމުންނެވެ.
