މިއަހަރުގެ އަޟްޙާ ޢީދު ނަމާދު މާލެ ސަރަޙައްދުގެ ގިނަ މިސްކިތްތަކެއްގައި ކުރުމަށް އިސްލާމީ ކަންތައްތަކާ ބެހޭ ވުޒާރާއިން ނިންމަވައި، އެ މިސްކިތްތަކުގެ ލިސްޓު ޢާންމުކުރައްވައިފިއެވެ.
މިނިސްޓްރީން ހާމަކުރައްވާފައިވާ ގޮތުގައި، މާލޭގެ ހަތަރު ސަރަޙައްދެއްގައި ބޮޑު ޖަމާޢަތުގައި ޢީދު ނަމާދު ކުރުމަށް ހަމަޖެހިފައިވީ ނަމަވެސް، މޫސުން ގޯސްވެ ބޮޑު ޖަމާޢަތުގައި ނަމާދު ނުކުރެވޭ ފަދަ ޙާލަތެއް މެދުވެރިވެއްޖެނަމަ މާލެ ސަރަޙައްދުގެ ހުރިހާ ހުކުރު މިސްކިތެއްގައި ޢީދު ނަމާދު ކުރާނެއެވެ. ޢީދު ނަމާދު ފެށުމަށް ހަމަޖެހިފައިވަނީ ހެނދުނު 7:00 ގައެވެ.
މާލޭގައި ޢީދު ނަމާދު ކުރާ މިސްކިތްތައް:
މާލޭގައި ޖުމްލަ 17 މިސްކިތެއްގައި ޢީދު ނަމާދު ކުރުމަށް ވަނީ ހަމަޖެހިފައެވެ. އޭގެ ތެރޭގައި އިސްލާމީ މަރުކަޒާއި ސަލްމާން މިސްކިތުގެ އިތުރުން މަސްޖިދުލް ފުރްޤާން، މަސްޖިދުއް ނޫރު، މަސްޖިދުއް ޝަހީދު ޢަލީ، މަސްޖިދުއް ސުލްޠާން ޙަސަން ޢިއްޒުއްދީން (ޠައިބާ މިސްކިތް)، މަސްޖިދުއް ސުލްޠާން މުޙައްމަދު ފަރީދުލް އައްވަލް (ދުބުރި މިސްކިތް)، މަސްޖިދުއް ޝަހީދު ޢަބްދުއްރަޙްމާން (ފަނޑިޔާރު މިސްކިތް)، މަސްޖިދުއް ސުލްޠާން މުޙައްމަދު ޝަމްސުއްދީން (ބަންޑާރަ މިސްކިތް)، މަސްޖިދު ޞަލާޙުއްދީން، މަސްޖިދު ޖަލާލުއްދީން، މަސްޖިދު އިބްރާހީމް، މަސްޖިދު އިސްކަންދަރު، މަސްޖިދު ޔޫސުފުލް ބަރުބަރީ، މަސްޖިދުއް ސުލްޠާން މުޙައްމަދު ޢިމާދުއްދީން (ރަން މިސްކިތް)، މަސްޖިދުއް ޝައިޚް މުޙައްމަދު ޖަމީލް ދީދީ (ފައިފުހޭ މިސްކިތް) އަދި މާފަންނު އާ މިސްކިތް ހިމެނެއެވެ.
ހުޅުމާލޭގައި ޢީދު ނަމާދު ކުރާ މިސްކިތްތައް:
ހުޅުމާލޭގައި ޢީދު ނަމާދު ކުރާނީ މަސްޖިދުއް ޝައިޚް ޤާސިމް ބިން މުޙައްމަދު އާލް ޘާނީ، މަސްޖިދު ރަޝީދު، މަސްޖިދު ޢަޒީޒާ މޫސާ، މަސްޖިދު އަޞްދީޤާ، މަސްޖިދުލްވާލިދައިނި، މަސްޖިދުލް ޙަސަން އާދަމް އަދި މަސްޖިދު އުޘްމާން ބިން ޢައްފާންގައެވެ.
ވިލިމާލޭގައި ޢީދު ނަމާދު ކުރާ މިސްކިތް:
ވިލިމާލޭގައި ޢީދު ނަމާދު ކުރުމަށް ހަމަޖެހިފައިވަނީ އެ އަވަށުގެ މަސްޖިދުއް ސަލާމުގައެވެ.
ފަހަކަށް އައިސް ރާއްޖޭގެ ހުރިހާ ރަށެއްގައިވެސް ޢީދު ނަމާދު ބޮޑު ޖަމާޢަތުގައި ކުރުމަށް ސަރުކާރުން އިސްކަންދެއްވައެވެ. ނަމަވެސް މި ދުވަސްވަރަކީ ވިއްސާރަ ދުވަސްވަރަކަށް ވުމުން، ބޮޑު ޖަމާޢަތުގެ ބަދަލުގައި މިސްކިތްތަކުގައި ނަމާދު ކުރަން ޖެހިދާނެތީ، އިސްލާމީ ކަންތައްތަކާ ބެހޭ ވުޒާރާއިން ވަނީ އެކަމަށް ފުރިހަމައަށް ތައްޔާރުވެފައެވެ. މި އިންތިޒާމުތައް ހަމަޖައްސާފައިވަނީ ވީހާވެސް ގިނަ ރައްޔިތުންނަށް ފަސޭހަކަމާއެކު ޢީދު ނަމާދުގެ ޖަމާޢަތުގައި ބައިވެރިވުމުގެ ފުރުޞަތު ފަހިކޮށްދިނުމުގެ މަޤްޞަދުގައެވެ.
