ކޮންމެ އަހަރެއްގެވެސް އަޟްޙާ ޢީދާ ގުޅުވައިގެން މުޖުތަމަޢުގެ އެކުވެރިކަމާއި އެއްބައިވަންތަކަން އާލާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމަށް ސަރުކާރުން ކުރިއަށްގެންދާ ”ޢީދު ހަވީރު 1447“ ފެސްޓިވަލުގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބައިވެރިވާން ނިންމައިފިއެވެ.
މި ފެސްޓިވަލް ކުރިއަށް ދާނީ މޭ މަހުގެ 27 އިން 29 އަށް، ކޮންމެ ދުވަހެއްގެ ހަވީރު 4:00 އިން 6:00 އަށް ހުޅުމާލެ ސެންޓްރަލް ޕާކުގައެވެ. މި ހަރަކާތުގެ ތެރެއިން އެމްއޭސީއެލްގެ ފަރާތުން ހުޅުމާލެ ސެންޓްރަލް ޕާކުގެ އިރުމަތީ އެންޓްރެންސްގައި ޚާއްޞަ ސްޓޯލްތަކާއި މުނިފޫހިފިލުވުމުގެ ގިނަ ހަރަކާތްތަކެއް ކުރިއަށް ގެންދާނެއެވެ.
ދިވެހިވަންތަ އަދި ސަޤާފީ ފަރުމާތަކަށް އިސްކަންދީގެން އިންތިޒާމުކުރާ މި ހަރަކާތުގައި ކޯޑީ ހިފުމާއި، ބޮޑުބެރާއި، މާލި ނެށުން ފަދަ ސަޤާފީ ކުޅިވަރުތައް ފެނިގެންދާނެއެވެ. މީގެ އިތުރުން، ކުޑަކުދިންނަށް ޚާއްޞަކޮށްގެން މަޤުބޫލު ކާޓޫން ކެރެކްޓާސްގެ މެސްކޮޓްތަކާއި، ފަނުން ޒީނަތްތެރިކޮށްފައިވާ ”ޓްރީހައުސް“ (ގަސްމަތީ ގެ) އެއް ވެސް މި ސްޓޯލްގައި ހުންނާނެ ކަމަށް އެ ކުންފުނިން ބުނެއެވެ.
އާއިލީ ގުޅުން ބަދަހިކުރުމަށް އަމާޒުކޮށްގެން ރެކިން ބޯލް، ވައިޕް އައުޓް އިންފްލެޓަބަލް އަދި ބަބުލް ހައުސް ފަދަ މަޖާ ކުޅިވަރުތައް އެމްއޭސީއެލްގެ ސްޓޯލްގައި ހިމަނާފައިވެއެވެ. އަދި ކުޑަކުދިންނަށް ހީނާ އާޓް އާއި ފޭސް ޕެއިންޓިންގް ކުރެވޭނެ އިންތިޒާމުވެސް ވަނީ ހަމަޖައްސާފައެވެ.
މިއަހަރުގެ ޢީދު ހަރަކާތްތަކުގެ ތެރެއިން އެންމެ ޚާއްޞަ އެއް ކަމަކަށް އޮންނާނީ، ރާއްޖޭގެ މަޝްހޫރު ފުޓުބޯޅަ ކުޅުންތެރިޔާ ޢަލީ އަޝްފާޤު (ދަގަނޑޭ) ގެ ހުނަރުތައް އެމްއޭސީއެލްގެ ސްޓޯލްގައި ދައްކާލުމެވެ.
އެމްއޭސީއެލް އިން ވަނީ އަޟްޙާ ޢީދުގެ މި އުފާވެރި ހަރަކާތްތަކުގައި ބައިވެރިވުމަށް އެންމެހާ ރައްޔިތުންނަށް ދަޢުވަތު އަރުވާފައެވެ.
މި ހަރަކާތަކީ ޢީދުގެ ފޯރި ގަދަކޮށް، ރައްޔިތުންގެ މެދުގައި އޮންނަ އެކުވެރިކަން އިތުރުކުރުމަށް ސަރުކާރުން ކުރިއަށްގެންދާ މުހިންމު ހަރަކާތެކެވެ.
