ޖަޕާނަށް ރާއްޖެއިން ކަނޑައެޅުއްވި އާ ސަފީރު، އަދި ކުރީގެ ޔޫތު މިނިސްޓަރ އަޙްމަދު މަހްލޫފް، އެޤައުމުގެ އެމްޕެރާ ނަރުހިޓޯއަށް ސަފީރުކަމުގެ ފަތްކޮޅު އެރުވުމުގެ ރަސްމިއްޔާތުގައި ޢަމަލުކުރެއްވި ގޮތާ ގުޅިގެން ދީނީ ޢިލްމުވެރިޔާ ޝެއިޚް ޢަލީ ޒައިދު ވަރަށް ބޮޑަށް ފާޑުވިދާޅުވެއްޖެއެވެ.
މި ރަސްމިއްޔާތު ބާއްވާފައިވަނީ ޖަޕާނުގެ ވެރިރަށް ޓޯކިޔޯގައި ހުންނަ އިމްޕީރިއަލް ޕެލަސްގައެވެ. މި ބައްދަލުވުމުގައި ޖަޕާނުގެ ހިސް މެޖެސްޓީ އެމްޕެރަރ ނަރުހީޓޯ ވަނީ ސަފީރު މަހްލޫފަށް މަރުޙަބާ ވިދާޅުވެ، އޭނާގެ ސަފީރުކަމުގެ ދައުރުގައި ކާމިޔާބީއަށް އެދިވަޑައިގެންފައެވެ. ނަމަވެސް، ސޯޝަލް މީޑިއާގައި ދައުރުވަމުންދާ މި ރަސްމިއްޔާތުގެ މަންޒަރުތަކުން ފެންނަ ގޮތުގައި، މަހްލޫފް ވަނީ އެމްޕެރާއަށް އިޙުތިރާމް އަދާކުރުމުގެ ގޮތުން ވަރަށް ބޮޑަށް ގުދުވެވަޑައިގެން ކުރުނީސްކުރައްވާފައެވެ.
މިކަމާ ގުޅިގެން ޝެއިޚް ޢަލީ ޒައިދު ވިދާޅުވީ، އެ މިންވަރަށް ގުދުވުމަކީ އިޙުތިރާމް އަދާކުރުމުގެ ގޮތުން ވިޔަސް މުސްލިމަކު ކޮށްގެންވާނެ ކަމެއް ނޫން ކަމަށެވެ. ޝެއިޚް އިތުރަށް ފާހަގަކުރެއްވި ގޮތުގައި، ކާފިރުން ކުރާ ކަންތައްތައް އެމީހުން ކުރާ ގޮތަށް ކޮޕީ ކުރުމަކީ، ނޭނގި ތިބެ ދީނާ ބީރައްޓެހި އަދި ދީނާ ދުރު ކަންތައްތަކަށް މަގުފަހިވެގެންދާނެ ކަމެކެވެ.
މިވަރަށް ގުދުވުމަކީ އިޙުތިރާމް ކުރުމަށްވެސް މުސްލިމުން ކޮށްގެންވާނެ ކަމެއް ނޫން! ކާފިރުން ކުރާ ހުރިހާ ކަމެއް އެމީހުން ކުރާގޮތަށް ކޮޕީ ކުރުމަކީ ނޭނގިތިބެ ދީނާ ދުރު ބީރައްޓެހި ކަންތައްތައް ކުރުމަށް މަގުފަހި ވާނެ ކަމެއް! ސަމާލުވެލައްވާ! https://t.co/LQ5IC1M00B pic.twitter.com/1yMQf9y4IJ
— Ali Zaid (@alizaid1000) May 25, 2026
ނިމިދިޔަ އެމްޑީޕީ ވެރިކަމުގައިވެސް މަޚުލޫފަށް ވަނީ ގިނަ ދީނީ ޢިލްމުވެރިންގެ ނުރުހުން އަމާޒުވެފައެވެ. ސަބަބަކީ ފާޅުވެގެންވާ ބޮޑު މުންކަރާތެއް ކަމަށްވާ ޔޯގާ ޙަރަކާތް ގަލޮޅު ރަސްމީ ބޯޅަ ދަނޑުގައި ހިންގުމެވެ. އަދި އޭނާ އެ މުންކަރާތް ދިފާއު ކުރުމަށް އެކަން ފެށީ ފަތިސް ނަމާދުން ކަމަށް ވިދާޅުވުން ވެގެން ދިޔައީ ގިނަ ޢިލްމުވެރިންގެ ނުރުހުން މަޚުލޫފަށް އަމާޒުވި ކަމަކަށެވެ.
