ފުޓްބޯޅައިގެ ސަބަބުން ރައްޔިތުންގެ މެދުގައި އެއްބައިވަންތަކަން އުފެދިގެން ދިއުމަކީ ލިބިގެންދާ ވަރަށް ބޮޑު އުފަލެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ދުނިޔޭގެ ފުޓްބޯޅަ ދުވަހުގެ މުނާސަބަތާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައެވެ. އެމަނިކުފާނު ވިދާޅުވީ، މުޅި ދުނިޔެ އެއްބައިވަންތަކޮށްދޭ މި ރީތި ކުޅިވަރަށް ލޯބިކުރާ އެންމެހައި ފަރާތްތަކަށް އިހްލާސްތެރިކަމާއެކު ތަހުނިޔާ އަރިސްކުރައްވާ ކަމަށެވެ.
ރައީސް ވިދާޅުވީ، މި ސަރުކާރުން އަބަދުވެސް މަސައްކަތް ކުރަމުން ގެންދަނީ، ދިވެހިރާއްޖޭގެ ކުޅިވަރުގެ ދާއިރާ ވަކިން ހާއްސަކޮށް ފުޓުބޯޅަ ކުރިއެރުވުމަށާއި، ދުޅަހެޔޮ ޖީލެއް ބިނާކުރުމަށް ކަމަށެވެ. އަދި އެކަމުގައި ސާބިތުކަމާއެކު ދެމިތިބޭނެކަމުގެ ޔަގީންކަން އެމަނިކުފާނު ދެއްވިއެވެ.
ފުޓުބޯޅަ ކުރިއެރުވުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ، ފީފާގެ މިންގަނޑުތަކަށް ފެތޭ ފެންވަރުގެ ފުޓްބޯޅަ ދަނޑުތައް ތަރައްގީކުރުމުގެ އިތުރުން، ރާއްޖޭގެ އެކި ކަންކޮޅުތަކުގައި ކުޅިވަރުގެ ދާއިރާ އިތުރަށް ތަރައްގީކުރުމަށް ކުޅިވަރާ ބެހޭ ގާނޫނަށް އިސްލާހު ގެނައުން ފަދަ މުހިއްމު ބަދަލުތަކެއް ގެނައުމަށް ނިންމާފައިވާ ކަމަށެވެ.
ބައިނަލްއަގްވާމީ ފުޓްބޯޅަ މުބާރާތްތައް ރާއްޖޭގައި ބޭއްވުމުގެ ފުރުސަތުތައް ފަހިކޮށްދިނުމަށާއި، ކުޅިވަރުގެ ސަގާފަތް ވަރުގަދަކޮށް، ބައިނަލްއަގްވާމީ މައިދާނުގައި ދިވެހި އެތުލީޓުންނަށް އިތުރު ފުރުސަތުތައް ހޯދައިދިނުމަށް ސަރުކާރުން އަބަދުވެސް މަސައްކަތް ކުރަމުން ގެންދާނެކަމުގެ ޔަގީންކަން ވެސް ރައީސް ވަނީ ދެއްވައިފައެވެ.
ރައީސްގެ މެސެޖު ނިންމަވާލައްވާފައިވަނީ، ފުޓުބޯޅައިގެ ރޫހުގައި އެންމެން އެކަތިގަނޑަކަށްވެ، އަންނަން އޮތް ޖީލުތައް އެގޮތުގައި އޮތުމަށް ހިތްވަރު ދެއްވަމުންނެވެ.
