ވާދަވެރި ސިޔާސީ ޕާޓީއަކާއި ”އަދަދު“ ނޫހާ އެއްވެސް ތަފާތެއް ނެތް ކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް މި މޭރުމުން ވިދާޅުވީ, ޕީއެންސީގެ ސެނެޓުން ރައީސް މުޢިއްޒުގެ ހުށަހެޅުއްވުމެއް ބޭރުކޮށްލައި، އެމަނިކުފާނުގެ ނުފޫޒު ކުޑަކޮށްފި ކަމަށް ބުނެ ”އަދަދު“ ނޫހުން ފެތުރި ހަބަރަކާ ގުޅިގެން މީސް މީޑިއާގައި ހިއްސާ ކުރެއްވި ޕޯސްޓެއްގައެވެ.
”އަދަދު“ ނޫހުން ޝާއިއު ކޮށްފައިވާ އެ ހަބަރުގައިވާ ގޮތުން، ދާދި ފަހުން ބޭއްވި ޕީއެންސީގެ ސެނެޓު ބައްދަލުވުމުގައި ޕާޓީގެ ހުރިހާ އިންތިޒާމުތަކެއް ކުރިއަށް ގެންދިޔުމުގެ ފުރިހަމަ ބާރު ލީޑަޝިޕަށް ދިނުމަށާއި، ލީޑަޝިޕުން ބޭނުންވާ ގޮތަކަށް އެ ކަންކަން ނިންމުމަށް ރައީސް މުޢިއްޒު ހުށަހެޅުއްވި ނަމަވެސް، ސެނެޓުގެ އަގުލަބިއްޔަތުން ރައީސްގެ މި ހުށަހެޅުއްވުމަށް ތާއީދު ނުލިބުނު ކަމަށެވެ.
”އަދަދު“ ނޫހުން ޝާއިއު ކުރާ ހަބަރުތަކަށް ރައްދުދެއްވަމުން މިނިސްޓަރު ޝިޔާމް ވިދާޅުވީ، ”އަދަދު“ ނޫސް ވަނީ ނުބައި މުއައްސަސާއެއްގައި ރަޖިސްޓްރީވެފައި ކަމަށާއި، އަސްލު އޮންނަން ޖެހޭނީ ސިޔާސީ ޕާޓީއެއްގެ ގޮތުގައި އިލެކްޝަން ކޮމިޝަންގައި ރަޖިސްޓްރީވެފައި ކަމަށެވެ. ސަބަބަކީ އެ ނޫހުން ހަބަރެއް ލިޔާނަމަ ފިތުނަ އުފެއްދުން ނޫން ކަމެއް ނުކުރާ ކަމަށެވެ.
ޕީއެންސީ އަކީ ރާއްޖޭގައި މިހާތަނަށް އުފެދުނު އެންމެ މެންބަރުން ގިނަ އެންމެ ބޮޑު ސިޔާސީ ޕާޓީކަން ފާހަގަކުރައްވަމުން ޝިޔާމް ވިދާޅުވީ، ގިނަ ޕާޓީތައް އެކުލެވޭ ނިޒާމެއްގައި ހާއްސަކޮށް ޕާޓީގެ ވެރިކަމެއްގައި ޑިމޮކްރަސީގެ ހަމަތަކާއެކު ޕާޓީ ހިންގާތަން ފެނިގެންދަނީ ހަމައެކަނި ޕީއެންސީން ކަމަށެވެ.
ޝިޔާމް އިތުރަށް ވިދާޅުވީ، ޕާޓީގެ ލީޑަރޝިޕް ބައްދަލުވުމެއްގައި ވަކިން ހާއްސަކޮށް ޕީއެންސީގެ މެންބަރުން މަޖިލީހުގެ ކަންނިންމާ ބައްދަލުވުމެއްގައި ޕާޓީގެ ރައީސްގެ ނުފޫޒުން ވަކި ގޮތަކަށް ކަމެއް ނިންމަން މަސައްކަތް ކުރެއްވި މަންޒަރެއް ދުވަހަކު ވެސް ފެނިވަޑައިނުގަންނަވާ ކަމަށާއި، އޭގެ ބަދަލުގައި އަބަދު ވެސް ކަންކަން ޕާޓީގައި ނިމިގެން ދަނީ މެޖޯރިޓީ މެންބަރުން ޢިއްތިފާގުވާ ގޮތަކަށް ކަމަށެވެ.
