ރައީސް މުޢިއްޒުގެ ވިސްނުންފުޅަކީ ކޮންގްރެސްގެ ކަންކަން މަޝްވަރާކުރެވިގެން ކުރިއަށް ގެންދެވުން ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މި މޭރުމުން ވިދާޅުވީ, ޕީއެންސީގެ ސެނެޓުން ރައީސް މުޢިއްޒުގެ ހުށަހެޅުއްވުމެއް ބޭރުކޮށްލައި، އެމަނިކުފާނުގެ ނުފޫޒު ކުޑަކޮށްފި ކަމަށް ބުނެ ”އަދަދު“ ނޫހުން ފެތުރި ހަބަރަކާ ގުޅިގެން މީސް މީޑިއާގައި ހިއްސާ ކުރެއްވި ޕޯސްޓެއްގައެވެ.
”އަދަދު“ ނޫހުން ޝާއިއު ކޮށްފައިވާ އެ ހަބަރުގައިވާ ގޮތުން، ދާދި ފަހުން ބޭއްވި ޕީއެންސީގެ ސެނެޓު ބައްދަލުވުމުގައި ޕާޓީގެ ހުރިހާ އިންތިޒާމުތަކެއް ކުރިއަށް ގެންދިޔުމުގެ ފުރިހަމަ ބާރު ލީޑަޝިޕަށް ދިނުމަށާއި، ލީޑަޝިޕުން ބޭނުންވާ ގޮތަކަށް އެ ކަންކަން ނިންމުމަށް ރައީސް މުޢިއްޒު ހުށަހެޅުއްވި ނަމަވެސް، ސެނެޓުގެ އަގުލަބިއްޔަތުން ރައީސްގެ މި ހުށަހެޅުއްވުމަށް ތާއީދު ނުލިބުނު ކަމަށެވެ.
މިކަމަށް ރައްދު ދެއްވަމުން ޝުޖާއު ވިދާޅުވީ، މިފަދަ ހަބަރުތަކުން ކޮންމެ މަގުސަދެއް ހާސިލުކުރުމަށް ބޭނުންވި ނަމަވެސް އެ ހަބަރަކީ ދޮގެއް ހަބަރެއް ކަމަށެވެ. ރައީސް މުޢިއްޒު ވަކި ކަމެއް ވަކި ގޮތަކަށް ކުރުމަށް ޕާޓީގެ މަޝްވަރާ މަޖިލީހަށް ހުށަނާޅުއްވާކަން ފާހަގަކުރައްވަމުން ޝުޖާއު ވިދާޅުވީ، އެފަދަ ކަމެއް އެމަނިކުފާނު ހުށަހެޅުއްވިނަމަ ވަގުތުން އެކަމަކަށް މަޝަވަރާ މަޖިލީހުން ރުހުން ދޭނެ ކަމަށެވެ.
”ކުރިއަށް އޮތީ މި ޕާޓީގެ އެންމެ ބޮޑު ދުވަސް. އެއީ ޕާޓީގެ ކޮންގްރެސް. ޕާޓީގެ ރައީސްގެ ވިސްނުންފުޅަކީ ކޮންގްރެސްގެ ކަންކަން ވަރަށް ބޮޑަށް މަޝްވަރާ ކުރެވިގެން ކުރިއަށް ގެންދެވުން. ޕާޓީގެ ރައީސަކީ ގައުމު ހިންގެވުމުގައި ވެސް މިހާތަނަށް އެންމެ ގިނަ މަޝްވަރާ ރައްޔިތުން އަރިހުން އައްސަވައިގެން ކަންކުރެއްވި ރައީސް. މަޝްވަރާ ކުރުމާ ދެކޮޅު ވިސްނުމުގެ ބަޔަކަށް އަބަދުވެސް ވިސްނޭނީ އެންމެ ނުބައިގޮތް،“ – ޝުޖާއު ވިދާޅުވިއެވެ.
ޝުޖާއު ވަނީ، ޕީއެންސީގެ ތެރޭގައި ފިތުނަ ފަސާދަ އުފެއްދުމުގެ ވިސްނުމުގައި ކުރެވޭ މިފަދަ ނާތަހުޒީބު އަމަލުތައް ނޫސްވެރިން ހުއްޓާލުމަށް ގޮވާލައްވައިފައެވެ. އަދި ޕީއެންސީގެ ކޮންގްރެސްގެ ތައްޔާރީތަކާއި މަޝްވަރާ މަޖިލީހުގެ ނިންމުންތަކުގެ މައުލޫމާތު ސާފުކުރަން ބޭނުންވާ ނޫސްވެރިން، ޕާޓީގެ ސްޕޯރކްސް ޕަރސަންއަށް ގުޅައި މައުލޫމާތު ސާފުކުރުމަށް އެދިފައެވެ.
