ހުޅުމާލެ ފުރަތަމަ ފިޔަވަހީގައި ކޮވިޑް ފެސިލިޓީއެއްގެ ގޮތުގައި މީގެ ކުރިން ބޭނުންކުރަމުން އައި އިމާރާތް، ޖަލަކަށް ބަދަލުކޮށް ރަސްމީކޮށް ބޭނުންކުރަން ފަށައިފިއެވެ.
ކްރިމިނަލް ކޯޓާ އިންވެގެން ހުންނަ މި އިމާރަތް ބޭނުންކުރަން ފަށާފައި މިވަނީ، މާލޭ ބޮޑުތަކުރުފާނު މަގުގައި ހުންނަ ޖަލު ބަންދުކުރުމާ ގުޅިގެން، ޖަލުތަކުގެ ޖާގަ އިތުރުކުރުމަށް ސަރުކާރުން ކުރަމުން އަންނަ މަސައްކަތްތަކުގެ ތެރެއިންނެވެ.
ކޮންމެ ޔުނިޓެއްގައި ފަސް ސެލް ބްލޮކް ހިމެނޭ މި ޖަލަކީ ޖުމުލަ 140 މީހުންގެ ޖާގަ ހިމެނޭ ގޮތަށް ތަރައްގީކޮށްފައިވާ ޖަލެކެވެ. މި ޖަލު ބޭނުންކުރަން ފެށީ 16 މީހުންގެ ޖާގައިގެ އެއް ސެލް ބްލޮކުގައެވެ. މި ޖަލުގެ ގައިދީން ބައިތިއްބާ ކޮޓަރިތަކަކީ އޭސީކޮށް، ރަނގަޅު ފެންވަރެއްގައި ތަރައްގީކޮށްފައިވާ ކޮޓަރިތަކެއް ކަމަށް ކަރެކްޝަނުން މައުލޫމާތުދެއެވެ.
އިމާރާތުގެ ބާކީ ހުރި ބައިތަކުގެ މަސައްކަތް ނިންމައި، އަންނަ ސެޕްޓެމްބަރު މަހުގެ ތެރޭގައި އެއްކޮށް ބޭނުންކުރަން ފެށޭނެ ކަމަށް ކަރެކްޝަނުން ވަނީ މައުލޫމާތުދީފައެވެ. އެ ތަނުގެ މަސައްކަތް ކުރާނީ ކަރެކްޝަނުގެ އޮފިސަރުންނާއި ގައިދީން ގުޅިގެންނެވެ.
ޖަލުތަކުގެ ޖާގަ އިތުރުކުރުމަށް ސަރުކާރުން ކުރަމުންގެންދާ މަސައްކަތްތަކުގެ ދަށުން، ވޭތުވެދިޔަ ދެ އަހަރާއި ބައިގެ މުއްދަތުގެ ތެރޭގައި ޖަލުތަކަށް ޖުމްލަ 400 ގައިދީންގެ ޖާގަ ވަނީ އިތުރުކޮށްފައެވެ.
