ޢީދު ފާހަގަކުރުމުގެ ނަމުގައި މުންކަރާތްތަކަށް އަރައިގަތުމަކީ މާތްﷲ ގެ ކޯފާއާއި އަޒާބަށް ހުށަހެޅިދާނެ ފަދަ ނުރައްކާތެރި ކަމަކަށްވީއިރު، އިސްލާމީ ޙުދޫދުގެ ތެރެއިން ޢީދު ފާހަގަކުރުމަށް ޢިލްމުވެރިންގެ ގުޅުމުން ގޮވާލައިފިއެވެ.
ފަހަކަށް އައިސް ޢީދު ފާހަގަކުރުމުގެ ނަމުގައި ރާއްޖޭގައި މުންކަރާތްތަކަށް އަރައިގަންނަ މިންވަރު ވަނީ އިތުރުވެފައެވެ. އެގޮތުން ސްޓޭޖް ޝޯވތަކުގެ ނަމުގައި ލަވަޔާއި މިޔުޒިކް ޖަހައިގެން އަންހެނުންނާއި ފިރިހެނުން މަސްހުނިވެގެން ނެށުމާއި، ޢައުރަ ނިވާނުވާ ވަރުގެ ހެދުން އަޅައިގެން ނުވަތަ ހަށިގަނޑުގެ ވަނާތައް ފާޅުވާ ފަދަ ހެދުން އަޅައިގެން ފިރިހެނުންގެ ހިތް ދަމައިގަންނާނެހެން އަންހެންނުން ބަނޑިބަނޑިލެއްވުން ފަދަ އިސްލާމީ ރިވެތި އާދަތަކާ ޚިލާފު އެތަކެއް ޢަމަލުތަކެއް އަންނަނީ ކުރަމުންނެވެ.
ޢީދު ފާހަގަކުރުމުގެ ނަމުގައި މުންކަރާތްތަކަށް އަރައިގަތުން އިތުރުވެފައިވާ ދަނޑިވަޅެއްގައި، އެފަދަ މުންކަރާތްތަކާ ދުރުހެލިވުމަށް ގޮވާލައި ޢިލްމުވެރިންގެ ގުޅުމުން މިއަދު ނެރެފައިވާ ބަޔާނެއްގައި ބުނެފައިވަނީ، އިސްލާމްދީނުގައި ފާހަގަކުރާ ޢީދުތަކަކީ މުސްލިމުންނަށް ދެއްވި ބޮޑުވެގެންވާ ނިޢުމަތެއް ކަމަށެވެ. އެއީ މަތިވެރި އަޅުކަންތަކަށްފަހު، އެކަމުގެ ހެޔޮ ތަޢުފީޤު ދެއްވިކަމަށްޓަކައި ޝުކުރުވެރިވުމުގެ މާތް ދުވަސްތަކެއްކަން ޢިލްމުވެރިންގެ ގުޅުމުން ވަނީ ފާހަގަކޮށްފައެވެ.
ޢީދު ފާހަގަކުރުމަކީ މާތްﷲ ގެ މަތިވެރިކަން ހަނދުމަކޮށް، އެކަލާނގެއަށް ޝުކުރުވެރިވުމާ ގުޅިފައިވާ އަޅުކަމަކަށް ވީއިރު، ޢީދު ފާހަގަކުރުމުގެ ނަމުގައި، ދީނީ އަދި އިޖުތިމާޢީ މިންގަނޑުތަކުން ބޭރުވެ، އަންހެނުންނާއި ފިރިހެނުން މަސްހުނިވެ، ފާހިޝް ކަންތަކާއި މުންކަރާތްތަކަށް އަރައިގަތުމަކީ، މާތްﷲ މަތިވެރިކުރައްވާފައިވާ މިފަދަ ދުވަސްތަކެއްގެ ޙުރުމަތް ކަނޑާލުމުގެ ތެރެއިން ވާނެ ކަމެއްކަން ހަނދާންކޮށްދެމުން ޢިލްމުވެރިންގެ ގުޅުމުން ބުނެފައިވަނީ، މިފަދަ މުންކަރާތްތަކަށް އަރައިގަތުމަކީ މާތްﷲ ގެ ކޯފާއާއި އަޒާބަށް ހުށަހެޅިދާނެ ނުރައްކާތެރި ކަމެއް ކަމަށެވެ.
މާތްﷲ ދެއްވި ހިދާޔަތަށް ޝުކުރުވެރިވުމުގެ ބަދަލުގައި، މުންކަރާތްތަކަށް އަރައިގަތުމަކީ ނިޢުމަތްތަކަށް ކުފުރުވެރިވުންކަން ޢިލްމުވެރިންގެ ގުޅުމުން ވަނީ ތަކުރާރުކޮށް ހަނދާންކޮށްދީފައެވެ.
ކަން މިހެން އޮތުމާއެކު ޢީދުގައި އެކިއެކި ޙަރަކާތްތައް އިންތިޒާމުކުރާ ފަރާތްތަކުން ވެސް މާތްﷲ ގެ ގަދަފަދަ އަޒާބަށް ބިރުވެތިވެ، ފާޙިޝް ޢަމަލުތަކާއި މުންކަރާތްތަކުން ދުރުހެލިވުމަށް އެގޮތުން، ޢީދު ފާހަގަކުރުމުގެ ނަމުގައި ދެ ޖިންސު މަސްހުނިވެ ލަވަޔާއި މިއުޒިކްގެ ޙަރަކާތްތައް ބޭއްވުމާއި، ފިރިހެނުންނާއި އަންހެނުން ވެސް ޢައުރަ ނިވާ ނުވާ ގޮތަށް ހިންގާ ހުރިހާ ޙަރަކާތްތަކަކުންނާއި، އިސްލާމީ އަދަބު އަޚްލާޤާ ޚިލާފު އެންމެހައި ކަންކަމުން ދުރުހެލިވުމަށް ޢިލްމުވެރިންގެ ގުޅުމުން ވަނީ ގޮވާލައިފައެވެ.
ހަމައެހެންމެ ފަރުޟު އަޅުކަންތަކަށް ރައްކާތެރިވުމަށާއި، ސަރުކާރުގެ އިދާރާތަކާއި ކަމާބެހޭ ފަރާތްތަކާއި، ރަށު ކައުންސިލްތަކުގެ އިތުރުން ޖަމުޢިއްޔާތަކުން ޢީދުގެ ޙަރަކާތްތައް އިސްލާމްދީނުގެ ޙުދޫދުގެ ތެރެއިން ރާވައި އިންތިޒާމުކުރުމަށާއި ބެލެނިވެރިން ވެސް ދަރިން ބައިވެރިވާ ޙަރަކާތްތައް ހިންގަނީ އިސްލާމްދީނުގެ ޙުދޫދުގެ ތެރޭގައިތޯ ގާތުން ބަލައި ފާރަވެރިވުމަށް ޢިލްމުވެރިންގެ ގުޅުމުން ވަނީ އިލްތިމާސްކޮށްފައެވެ.
މީގެ އިތުރުން މި ދުވަސްތަކުގައި އިސްލާމީ ރިވެތި އާދަތައް ދިރުވާ އާލާކޮށް، ގާތްތިމާގެ މީހުންނަށް ޒިޔާރަތްކުރުމާއި، ހަދިޔާ ބަދަލުކުރުމާއި، މުސްލިމުންގެ މެދުގައި ދޭދޭ ގުޅުންތައް ބަދަހިކުރުމުގެ އިތުރުން ފަޤީރުންނާއި މިސްކީނުންނަށް އެހީތެރިވުން އިތުރުކުރުމަށް ވެސް ޢިލްމުވެރިންގެ ގުޅުމުން ވަނީ ނަސޭޙަތްތެރިވެފައެވެ.
