މައުލޫމާތު ހޯދައި ލިބިގަތުމުގެ ހައްގުގެ ގާނޫނުން އިސްތިސްނާ ކަނޑައަޅުއްވާފައިވާ ދާއިރާތަކުން މައުލޫމާތު ހޯދުމަށް ހުށަހަޅައިފައިވާ ފޯމުތައް ފިޔަވައި، ރައީސުލްޖުމްހޫރިއްޔާގެ އޮފީހަށް ހުށަހަޅާފައިވާ ހުރިހާ އާރްޓީއައި ފޯމަކަށް، ހުކުރު ދުވަހުގެ ނިޔަލަށް ޖަވާބު ދެވިފައިވާ ކަމަށް، ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
މުންދު މި މޭރުމުން ވިދާޅުވީ، “ޕްރެސަރ ވިތު ދަ ސްޕޮކްސް“ ގެ ނަމުގައި ސިލްސިލާކޮށް ކުރިއަށްގެންދާ ނޫސްވެރިންގެ ބައްދަލުވުމުގައި، މައުލޫމާތު ހޯދައި ލިބިގަތުމުގެ ހައްގާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. މުންދު ވިދާޅުވީ، އެހެން ގާނޫނެެއްގެ ތެރެއިން ހިއްސާނުކުރެވޭނެ ކަމަށް ކަނޑައަޅާފައިވާ މައުލޫމާތު އަދި ގައުމީ ސަލާމަތާ ގުޅުންހުރި ފޯމުތައް ފިޔަވައި، ރައީސް އޮފީހަށް މައުލޫމާތު ހޯދުމަށް އެދި ހުށަހަޅާފައިވާ ހުރިހާ އާރްޓީއައި ފޯމަކަށް ޖަވާބު ދީފައިވާ ކަމަށެވެ.
”އިއްޔެގެ ނިޔަލަށް އަޅުގަނޑުމެން ސާފުކޮށްލީ. އިރާދަކުރެއްވިއްޔާ މިހާރު، އެހެން ގާނޫނެެއްގެ ތެރެއިން ހިއްސާނުކުރެވޭނެ މައުލޫމާތެއް، މިސާލަކަށް ޕްރައިވަސީގެ ކަމެއް، އެކަހަލަ ކަމެއް ބަލަންޖެހޭނެތާ، އަޅުގަނޑުމެން ދޭ މައުލޫމާތަކީ ދެވޭނެ މައުލޫމާތެއްތޯ.“ – މުންދު ވިދާޅުވިއެވެ.
ސަރުކާރުގެ އެހެން ވުޒާރާތަކާއި އިދާރާތަކަށް ވެސް، މި ގޮތަށް މަސައްކަތް ކުރެއްވުމަށް ހިތްވަރުދެއްވައި، މައުލޫމާތު ހޯދުމަށް ހުށަހަޅާ ފޯމުތަކަށް ޖަވާބުދިނުމަށް ބޭނުންވާ އެހީތެރިކަން ވެސް، ސަރުކާރުން އެއިދާރާތަކަށް ފޯރުކޮށްދެއްވަމުން ގެންދަވާކަން މުންދު ވަނީ ފާހަގަކުރައްވައިފައެވެ.
މީގެ އިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް އެދިވަޑައިގަންނަވަނީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 37 ވަނަ މާއްދާގައި ބަޔާންކުރާ، އަމިއްލަ އިސްނެގުމުގައި މައުލޫމާތު އާންމުކުރުމުގެ ޒިންމާ އަދާކުރުމުގައި، ސަރުކާރުން ސައްތައިން ސައްތައަށް އިޖާބަދެއްވުމަށް ކަމަށް މުންދު ވިދާޅުވިއެވެ.
