ކުރީގެ ނައިބު ރައީސް މުޙައްމަދު ޖަމީލު އަޙްމަދު މި ސަރުކާރާ މެދު ނުރުހުންވެ ހިޔާލު ތަފާތުވި ސަބަބަކީ ކެބިނެޓުން ޖާގަ ނުލިބުން ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މި މޭރުމުން ވިދާޅުވީ، މިދިޔަ ލޯކަލް ކައުންސިލްތަކުގެ އިންތިހާބުގައި އއ. ތޮއްޑޫއިން ކޮންގްރެސް ޕާޓީއަށް ހޯދައިދިން ކާމިޔާބީ ފާހަގަކުރުމަށް ރޭ ޕީއެންސީ ހަރުގޭގައި ބޭއްވި ޖަލްސާގައި ވާހަކަދައްކަވަމުންނެވެ. ޝުޖާއު ވިދާޅުވީ، ޖަމީލަކީ ވަރަށް އަމިއްލަ އެދުން ބޮޑު ”ހިޔަޅެއް“ ކަމަށާއި، ކެބިނެޓުން ޖާގަ ލިބުނު ނަމަ އޭނާ މިއަދު ރައީސް ޔާމީން ގާތުގައި ނުވެސް ހުންނާނެ ކަމަށެވެ.
ޝުޖާއު ވިދާޅުވި ގޮތުގައި، ޕީއެންއެފްއިން ބޭއްވި މުޒާހަރާއެއްގެ ތެރެއިން އެއްބަޔަކު ”ރައީސް ޔާމީން“ އޭ ގޮވުމުން އަނެއް ބަޔަކު ”ހައްޔަރުކުރޭ“ މިހެން ގޮވަމުންދިޔަ ކަމަށެވެ. އެކަން އެހެން ހިނގަމުންދިޔައިރު ޑރ. ޖަމީލާއި މަލީހު ޖަމާލާއި ދެމީހުން ހުރީ ހޭން ކަމަށާއި، މިކަމުން ވެސް ދޭހަވަނީ ޖަމީލުގެ ހިތް ރައީސް ޔާމީނަށް ސާފުނޫންކަން ކަމަށް ޝުޖާއު ވިދާޅުވިއެވެ. އަދި މިއީ މިއަދު އަލަށް ފެންނަ މަންޒަރެއް ނޫން ކަމަށާއި، އިދިކޮޅުގައި ތިބި ދުވަސްވަރު ވެސް ކަންތައްތައް އޮތީ އެފަދަ ގޮތަކަށްކަން އޭނާ ފާހަގަކުރެއްވިއެވެ.
ޝުޖާއު ވިދާޅުވީ ކޮންމެ މީހެއްގެ ވެސް އޮންނަނީ އަމިއްލަ އެދުމެއް ކަމަށާއި، ނަމަވެސް ރައީސް ޔާމީނާ މެދުގައި ހެޔޮ ހިތަކައިގެން އޯގާތެރިކަމާއެކު އަދިވެސް ދެކިވަޑައިގެންނަވާ ހަމައެކަނި ބޭފުޅަކީ ރައީސް މުޢިއްޒު ކަމަށެވެ. ރައީސް ޔާމީނާ ދޭތެރޭ ކުޑައިމީސްކޮށް ހަޑިކޮށް ބަހެއް ވިދާޅުނުވުމަށް ރައީސް މުއިއްޒު އެދިވަޑައިގަންނަވާ ކަމަށާއި، އެކަމުން ވެސް ދޭހަވަނީ އެމަނިކުފާނުގެ ހިތްޕުޅުގައި ރައީސް ޔާމީނަށް އޮތް އިހުތިރާމާއި ގަދަރުކަން ޝުޖާއު ފާހަގަކުރެއްވިއެވެ.
މީގެ އިތުރުން ޝުޖާއު ވަނީ ރައީސް ޔާމީންގެ ފަހަކަށް އައިސް ދައްކަވާ ވާހަކަތަކަށް ވެސް ވަރަށް ބޮޑަށް ފާޑުވިދާޅުވެފައެވެ. އެގޮތުން ކުރީގެ ރައީސް ނަޝީދުއެކޭ އެއްގޮތަށް ރައީސް ޔާމީން ވެސް ”ހަމައިން ނެއްޓޭ“ ގަޑިތައް މިހާރު އަންނަ ކަމަށް ގަބޫލުކުރެވޭ ކަމަށާއި ރައީސް މުއިއްޒުއަށް ނިސްބަތްކޮށް ރައީސް ޔާމީން އެ ދައްކަވަނީ އެފަދަ ގަޑިތަކުގައި ދައްކަވާ ވާހަކަތަކެއް ކަމަށް ގަބޫލުކުރެވޭ ކަމަށް ޝުޖާއު ވިދާޅުވިއެވެ.
