ކުޑަކުދިންގެ ބަރަހަނާ ފޮޓޯ އާއި ވީޑިއޯ ކްރިޕްޓޯކަރަންސީ މެދުވެރިކޮށް ވިއްކާކަމުގެ ތުހުމަތުގައި ހައްޔަރުކުރި އާދަމް ޢަދްލާން ލަޠީފްގެ މައްޗަށް ދައުވާކޮށްފިއެވެ.
ޕްރޮސެކިއުޓަރ ޖެނެރަލް (ޕީޖީ) އޮފީހުގެ މީޑިއާ އޮފިޝަލަކު ވިދާޅުވި ގޮތުގައި، އެ މައްސަލާގައި ހައްޔަރު ކުރި ޢަދްލާންގެ މައްޗަށް ދެ ދައުވާއެއްކޮށް، މިިދިޔަ އަންގާރަ ދުވަހު ވަނީ މި މައްސަލަ ކޯޓަށް ހުށަހަޅައިފައެވެ. އޭނާގެ މައްޗަށް ކޮށްފައިވާ ދައުވާތަކަކީ:
- އެނގިހުރެ ކޮމްޕިއުޓަރު ސިސްޓަމެއް ނުވަތަ ސްޓޯރޭޖެއްގައި ކުޑަކުދިންގެ އޮރިޔާން ކާޑު ބެހެއްޓުން.
- އޮރިޔާން ކާޑު އުފެއްދުމުގެ ކުށުގެ ދައުވާ
މި ދައުވާތައް ސާބިތުވެއްޖެނަމަ ތިން އަހަރަށް ވުރެ ދިގު މުއްދަތެއްގެ ޖަލު ހުކުމެއް ޢަދްލާންގެ މައްޗަށް އަންނާނެއެވެ.
ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަނާ ގުޅިގެން ތަހުގީގުކުރި މި މައްސަލާގައި ކޯޓު އަމުރެއްގެ ދަށުން ހުސްވި އޭޕްރީލް މަހުގެ ތެރޭގައި ޢަދްލާން ހައްޔަރު ކުރި ނަމަވެސް، އޭގެ ފަހުން އޭނާ ވަނީ ބަންދުން ދޫކޮށްލައިފައެވެ. މި މައްސަލައާ ގުޅިގެން ފުލުހުން މީގެކުރިން ބުނެފައިވަނީ، އޭނާ ހައްޔަރު ކުރީ ބައިނޭންސް އެކްސްޗޭންޖް ވޮލެޓް އެޑްރެހެއް ބޭނުންކޮށްގެން ކުޑަކުދިންގެ ބަރަހަނާ ފޮޓޯ އާއި ވީޑިއޯ ގަނެ ވިއްކާ ކަމަށް ލިބުނު މައުލޫމާތާ ގުޅިގެން ހިންގި ތަހުގީގުގެ ތެރެއިން ކަމަށެވެ.
އެ ވޮލެޓުން އަދްލާންގެ ކްރިޕްޓޯ އެކައުންޓަށް ފައިސާ ފޮނުވާފައިވާކަން ތަހުގީގަށް ފާހަގަކުރެވިފައިވާ ކަމަށާއި އަދި އޭނާގެ އަތުން ހިފެހެއްޓި އިލެކްޓްރޯނިކް ވަސީލަތްތަކުގެ ފޮރެންސިކް ތަހުލީލުތައް ހެދިއިރު، ކުޑަކުދިންގެ ބަރަހަނާ މަންޒަރުތައް ހިމެނޭ ގިނަ އަދަދެއްގެ ފޮޓޯ އާއި ވީޑިއޯ ފެނިފައިވާ ކަމަށް ވެސް ފުލުހުން ބުންޏެވެ.
