ވެރިކަމާ ހަވާލުވެވަޑައިގަތުމަށްފަހު މިވީ ދެ އަހަރާއި ބައިގެ މުއްދަތުގެ ތެރޭގައި 1،200 އަށްވުރެ ގިނަ ކިލޯގެ މަސްތުވާތަކެތި އަތުލައިގަނެވިއްޖެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ދައުލަތުގެ މީޑިއާއިން ”ނޭޝަން ޗެޓް“ ގެ ނަމުގައި ރޭ ގެނެސްދިން ޕްރޮގްރާމްގައި ވާހަކަފުޅުދައްކަވަމުންނެވެ. ރައީސް ވިދާޅުވީ، މަސްތުވާތަކެތިން ގައުމު ސަލާމަތް ކުރުމަކީ އެމަނިކުފާނު ވަރަށް ބޮޑު އަހައްމިއްޔަތު ކަމެއް ދެއްވައިގެން ކުރައްވާ މަސައްކަތެއް ކަމަށެވެ.
އެގޮތުން ވެރިކަމާ ހަވާލުވެވަޑައިގަތުމަށްފަހު، މަސްތުވާތަކެއްޗާ ދެކޮޅަށް ކުރެވުނު މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ، ވޭތުވެދިޔަ ދުވަސްތަކުގައި މަސްތުވާތަކެއްޗާ ދެކޮޅަށް ހިންގުނު އޮޕަރޭޝަންތަކުގައި ޖުމުލަ 1،294 ކިލޯގެ މަސްތުވާތަކެތި މިހާތަނަށް އަތުލައިގަނެވިފައިވާ ކަމަށެވެ. މިކަމަކީ ލިބުނު ވަރަށް ބޮޑު ކުރިއެރުވުމެއްގެ ގޮތުގައި ރައީސް ވަނީ މިކަން ސިފަ ކުރައްވައިފައެވެ.
މީގެ އިތުރުން ރައީސް ވަނީ މަސްތުވާތަކެއްޗާ ދެކޮޅަށް ކުރީގެ ސަރުކާރުތަކުން ކޮށްފައިވާ މަސައްކަތްތަކަށް ވެސް އަލިއަޅުއްވާލައްވައިފައެވެ. އެގޮތުން މިދިޔަ އެމްޑީޕީ ސަރުކާރުގެ ފުރަތަމަ ދެ އަހަރާއި ބައިގެ މުއްދަތުގައި އަތުލައިގަނެވުނީ 1,003 ކިލޯގެ މަސްތުވާތަކެތި ކަމަށާއި އަދި އޭގެ ކުރީގެ ވެރިކަމުގެ ފުރަތަމަ ދެ އަހަރާ ބައިގެ މުއްދަތުގައި އަތުލައިގަނެވުނީ އެންމެ 154 ކިލޯގެ މަސްތުވާތަކެތިކަން އެމަނިކުފާނު ފާހަގަކުރެއްވިއެވެ.
ފާހަގަކޮށްލަންޖެހޭ ގޮތުގައި، މި ސަރުކާރުން އަންނަނީ މަސްތުވާތަކެތީގެ މައްސަލައަށް ދާއިމީ ހައްލެއް ހޯދައިދިނުމަށް ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން މަސްތުވާތަކެތި އެތެރެ ކުރާ ފަރާތްތަކަށް މަރުގެ އަދަބު ދިނުމަށް ގާނޫނެއް ވުޖޫދު ކޮށްފައިވާއިރު، އެފަދަ ތަކެތި ބޭނުން ކުރާ ފަރާތްތަކަށް ވެސް ހަރުކަށި އަދަބު ދިނުމަށް ވަނީ ނިންމައިފައެވެ.
