ތަރައްގީއަކީ ހަމައެކަނި އުސް އިމާރާތްތަކެއް ބިނާކުރުން ނޫން ކަމަށާއި، އެންމެ މުހިންމު ތަރައްގީއަކީ ގައުމަށް ބޭނުންތެރި ހެޔޮލަފާ އިންސާނުން ބިނާކުރުން ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެސްއެމް ނޭޝަނަލް ޗެޓް ޕޮރޮގްރާމްގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، އެމަނިކުފާނުގެ ސަރުކާރުން އެންމެ އިސްކަމެއް ދެއްވަނީ ޒުވާނުން ބިނާކުރުމުގެ ތަރައްގީއަށް ކަމަށެވެ. ހާއްސަކޮށް، އިސްލާމްދީނަށް ހުރުމަތްތެރިކޮށް ހިތާ، ގައުމުދެކެ ލޯބިވާ، އަދި އަހުލާގު ރަނގަޅު ހުނަރުވެރި ޒުވާނުން އުފެއްދުމަކީ މާނަހުރި ތަރައްގީއެއްގެ ގޮތުގައި އެމަނިކުފާނު ސިފަކުރެއްވިއެވެ.
ޒުވާނުންނަށް ބޭނުންވާ ތަމްރީނުތަކާ ގުޅޭގޮތުން ވާހަކަފުޅު ދައްކަވަމުން ރައީސް ފާހަގަކުރެއްވީ، މިހާތަނަށް ގިނަ އަދަދެއްގެ ޒުވާނުން ތަމްރީނުކުރެވިފައިވާ ކަމަށެވެ. އެގޮތުން ފުރަތަމަ ބެޗުގައި ތަމްރީނުވި 300 ޒުވާނުންގެ ތެރެއިން ގިނަ ކުދިން މިހާރު ތިބީ ވަޒީފާތަކުގައި ކަން އެމަނިކުފާނު ފާހަގަކުރެއްވިއެވެ.
މީގެ އިތުރުން، މި ފަހަރު ތަމްރީނު ނިންމި ޒުވާނުންނަށް ވެސް ވަޒީފާގެ ފުރުސަތުތައް ފަހިވެގެންދާނެ ކަމުގެ ޔަގީންކަން ރައީސް ދެއްވިއެވެ.
”މިފަހަރު ތަމްރީނު ނިންމި ކުދިންނަށް ވެސް ވަޒީފާގެ ފުރުސަތުތައް ލިބޭނެ. ހާއްސަކޮށް ސިފައިންގެ އާއި ފުލުހުންގެ ހިދުމަތުގެ ތެރެއިންނާއި، އަދި އެ ކުދިން އިހުތިޔާރުކުރާ އެހެނިހެން ދާއިރާތަކުން ވަޒީފާ ހަމަޖައްސައިދިނުމަކީ އަޅުގަނޑުމެންގެ އަމާޒެއް،“ ރައީސް ވިދާޅުވިއެވެ.
ރައީސް މުއިއްޒު އިތުރަށް ވިދާޅުވީ، ސަރުކާރުގެ މަގްސަދަކީ ކޮންމެ ޒުވާނަކީ ވެސް އަމިއްލަ ފައިމައްޗަށް ތެދުވެ، ގައުމުގެ ތަރައްގީގައި އަމަލީގޮތުން ބައިވެރިވާ ފަރުދަކަށް ހެދުން ކަމަށެވެ. މި މަސައްކަތުގެ ދަށުން ޒުވާނުންނަށް ބޭނުންވާ ތައުލީމާއި ތަމްރީނުގެ އިތުރު ފުރުސަތުތައް ކުރިއަށް އޮތް ތަނުގައި ފުޅާކުރައްވާނެ ކަމަށް ވެސް އެމަނިކުފާނު ވިދާޅުވިއެވެ.
