ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަކީ މި ސަރުކާރުގެ އެންމެ އިސް ސިޔާސަތު ކަމަށާއި، އެ އަމާޒަށް ވާސިލުވުމަށްޓަކައި ބިން ހިއްކުމާއި ގެދޮރު އެޅުމުގެ ބިޔަ މަޝްރޫޢުތައް ހުއްޓުމެއްނެތި ބާރުމިނުގައި ކުރިއަށްދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެސްއެމްގެ ”ނޭޝަން ޗެޓް“ ޕްރޮގްރާމުގައި ރޭ ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުން ހިންގާ މަޝްރޫޢުތަކުގެ އިތުރުން، އަމިއްލަ ފަރާތްތަކަށް ގެދޮރު އެޅުމަށް ބޭނުންވާ ހައުސިންގ ލޯނު ދޫކުރުމުގެ މަސައްކަތްވެސް މެދުނުކެނޑި ކުރިއަށްދާ ކަމަށެވެ. އެގޮތުން މިދިޔަ އަހަރާއި މިއަހަރުގެ ތެރޭގައި ގިނަ އަދަދެއްގެ ބަޔަކަށް ބޯހިޔާވަހިކަމުގެ ލޯނު ދޫކޮށްފައިވާކަން އެމަނިކުފާނު ފާހަގަކުރެއްވިއެވެ.
އުމްރާނީ ތަރައްޤީގެ ދާއިރާއިން ހޯދާފައިވާ ބޮޑެތި ކާމިޔާބީތަކަށް އަލިއަޅުއްވާލައްވަމުން ރައީސް ހާމަކުރެއްވި ގޮތުގައި، ފާއިތުވެދިޔަ ދެ އަހަރާއި ބައިގެ ތެރޭގައި ރާއްޖޭގެ އެކި ސަރަހައްދުތަކުން 1,100 އަށް ވުރެ ގިނަ ހެކްޓަރުގެ ބިން ވަނީ ހިއްކާފައެވެ. މީގެ ތެރޭގައި ރަސްމާލެ މަޝްރޫޢުން އެކަނިވެސް 500 ހެކްޓަރު ހިއްކާފައިވާއިރު، ރާއްޖޭގެ 21 ރަށެއްގައި ބިން ހިއްކުމުގެ މަސައްކަތް ވަނީ ނިމިފައެވެ.
ބޯހިޔާވަހިކަމުގެ މަޝްރޫޢުތަކުގެ ތަފްސީލު ދެއްވަމުން ރައީސް ވިދާޅުވީ:
- ކުރީ ސަރުކާރުން ފަށާފައިވާ 4,000 ފްލެޓް ނިންމައި ޙައްޤުވެރިންނާ ހަވާލުކުރުމުގެ މަސައްކަތް ބާރަށް ކުރިއަށްދާކަން.
- މާލެ ސަރަހައްދުގައި އަލަށް 2,000 ފްލެޓް އެޅުމުގެ މަސައްކަތް ފެށުމަށް މިހާރު ނިންމާފައިވާކަން.
- އަތޮޅުތެރޭގެ 13 ރަށެއްގައި 900 ހައުސިންގ ޔުނިޓް އެޅުމުގެ މަސައްކަތް ކުންފުނިތަކާ ހަވާލުކޮށްފައިވާކަން.
- އިންޑިއާގެ އެހީގައި 4,000 ޔުނިޓް އަދި ޗައިނާގެ އެހީގައި 500 ޔުނިޓް އެޅުމުގެ އިދާރީ ހުރިހާ މަސައްކަތްތަކެއް މިހާރު ހިނގަމުންދާކަން.
ގޯތި ދޫކުރުމުގެ ސިޔާސަތާ ގުޅޭގޮތުން ރައީސް ވިދާޅުވީ، ކުރީ ސަރުކާރުން ބިން ނުހިއްކާ ހުރި ތަންތަނުން ގޯތި ދޫކޮށްފައި އޮތް ނަމަވެސް، މި ސަރުކާރުން ރައްޔިތުންނަށް ގޯތި ހަވާލުކުރާނީ ބިން ހިއްކައި، އެތަންތަނަކީ އިންސާނުން ދިރިއުޅެން އެކަށީގެންވާ ފެންވަރަށް ތަރައްޤީ ކުރުމަށްފަހު ކަމަށެވެ. މިގޮތުން ހުޅުމާލެ ފޭސް 3، ގިރާވަޅުފަޅު އަދި ގުޅީފަޅުން ބިން ހިއްކުމާއި ގޯތި ހަވާލުކުރުމުގެ މަސައްކަތް ބާރުދުވެލީގައި ކުރިއަށްދާކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޢިއްޒުގެ ވާހަކަފުޅު ނިންމަވާލެއްވީ، ބޯހިޔާވަހިކަމަކީ ރައްޔިތުންގެ އެންމެ އަސާސީ ޙައްޤު ކަމުގައިވާތީ، އެ ޙައްޤު ފުރިހަމައަށް ކަށަވަރުކޮށްދިނުމަށް މިއަންނަ އަހަރުވެސް އިތުރު އައު މަޝްރޫޢުތައް ރާވައި ކުރިއަށް ގެންދަވާނެ ކަމުގެ ފުރިހަމަ ޔަގީންކަން ދިވެހި ރައްޔިތުންނަށް ދެއްވަމުންނެވެ.
