ސަރުކާރު ކުޑަކޮށް، ހިންގުމުގެ ގާބިލުކަން އިތުރުކުރުމަށްޓަކައި މިނިސްޓަރުންގެ އިތުރުން މިނިސްޓްރީތަކުގެ ސިޔާސީ މުވައްޒަފުން ވެސް މަދުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ޕީއެސްއެމް އިން ގެނެސްދިން ”ނޭޝަން ޗެޓް“ ޕްރޮގްރާމްގައި ވާހަކަފުޅު ދައްކަވަމުން ރައީސް ވިދާޅުވީ، ކެބިނެޓް ކުރިއަށް ވުރެ ކުޑަކޮށް، ބައެއް މިނިސްޓްރީތައް އެއްކޮށްލުމުން ސަރުކާރުގެ ”އެފިޝަންސީ“ ނުވަތަ ހިންގުންތެރިކަން މަތިވެފައިވާ ކަމަށާއި، ކެބިނެޓަށް ގެންނެވި ބަދަލުގެ ހެޔޮ ނަތީޖާ މިހާރު ވެސް އަންނަނީ ވަރަށް ރަނގަޅަށް ފެންނަމުން ކަމަށެވެ.
”ހަމައެކަނި މިނިސްޓަރުން މަދުކުރީކީ ނޫން. ހަމައެއާ ގުޅިގެން އަޅުގަނޑުމެން މިނިސްޓްރީތަކުގެ ސިޔާސީ މުވައްޒަފުން މަދުކުރުމުގެ ޕްރޮސެސް ވެސް އެބަ ހިނގާ ހަމަ. އޭގައި އަޅުގަނޑުމެން ހަދަން ޖެހޭ އެސެސްމެންޓް ހަދާ މިހާރު ނިންމަނީ، ޕާފޯމެންސް ބޭސްކޮށް މީހުން މަދުކުރުމަށްޓަކައި، ކޮބައިތޯ ކޮންތާކުން ކިތައް މީހުންތޯ ވަކިކުރެވޭނީ، ނޫނީވިއްޔާ ދޫކޮށްލެވޭނީ ބެލުން، އެބައި އެބަ ނިމޭ މިހާރު. ނިމުނީމާ އަޅުގަނޑު ހަމަ އެކަން ތަންފީޒުކުރާނަން،“ ރައީސް ވިދާޅުވި އެވެ.
ކެބިނެޓް ކުޑަކުރުމުން ސަރުކާރުގެ ހިންގުން ހަރުދަނާވި ކަމުގެ މިސާލެއްގެ ގޮތުން ރައީސް ދެއްކެވީ ބޭރުގައި ކިޔަވަން ތިބޭ ކުދިން އެދޭ ކަންތައްތައް ނިންމަން މީގެ ކުރިން އެވްރެޖްކޮށް ހަތަރު ހަފުތާ ހޭދަވަމުން ދިޔަ އިރު، މިހާރު އެކަން ހަތަރު ދުވަހަށް ކުޑަކުރެވިފައި ވުމެވެ. އެމަނިކުފާނު ވިދާޅުވީ ބަދަލުތައް ގެނެވުނު މިނިސްޓްރީތަކުގެ ތެރޭގައި ކުރިއަށް ވުރެ އެތައް ކަމެއްގެ ހިދުމަތް މިހާރު ރަނގަޅުކުރެވެމުންދާ ކަމަށެވެ.
ރައީސް މުއިއްޒު ކެބިނެޓަށް މި ބަދަލު ގެންނަވައި އަލުން އެކުލަވައިލެއްވީ 10 މިނިސްޓަރަކު ކުއްލި ގޮތަކަށް އިސްތިއުފާ ދެއްވުމާ ގުޅިގެންނެވެ. ރައީސް އޮފީހުން އޭރު ބުނި ގޮތުގައި އެއީ ރައްޔިތުންގެ ވިންދާ އެއްގޮތަށް ސަރުކާރު ހިންގަން ރައީސް ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމަށް ކުރެއްވި ކަމެކެވެ.
މި ބަދަލާއެކު 10 މިނިސްޓްރީއެއްގެ މެންޑޭޓަށް ވަނީ ބަދަލުތަކެއް ގެނެސްފަ އެވެ. ކުރިން ކެބިނެޓުގައި 20 މިނިސްޓަރުން ތިއްބެވި ނަމަވެސް، މިހާރު 14 މިނިސްޓަރުންނާއި އެޓާނީ ޖެނެރަލާއެކު ކެބިނެޓުގައި ތިއްބަވަނީ ޖުމްލަ 15 ބޭފުޅުންނެވެ.
