މިދިޔަ ހަފުތާގައި އިންޑިއާގެ ޗީފް ޖަސްޓިސް ސޫރިޔަކާންތު ކުރެއްވި ބުނެފައިވާ ބުނުމަކާއި ގުޅިގެން އިންޑިއާގައި ”ކުރަފި“ ވަނީ ވަރަށް ބޮޑަށް ވައިރަލް ވެގެން ގޮސްފައެވެ. އަޑުއެހުމެއްގެ ތެރޭގައި އޭނާ ބުނެފައިވަނީ، ވަޒީފާއެއް ނެތި ނޫސްވެރިކަމާއި އެކްޓިވިޒަމްގެ ތެރެއަށް ވަންނަމުންދާ ޒުވާނުންނަކީ ކުރަފި އަދި ޕެރަސައިޓުންގެ ގޮތުގައި ސިފަކޮށްފައެވެ.
ފަހުން ސޫރިޔަކާންތު ވަނީ އެ ވާހަކަ ސާފުކޮށްދެމުން، އެއީ އާންމުކޮށް އިންޑިއާގެ ޒުވާނުންނަށް ނިސްބަތްކުރި ވާހަކައެއް ނޫން ކަމަށާއި، އެއީ ހަމައެކަނި ”އޮޅުވާލައިގެން ހަދާފައިވާ ފޭކް ސަނަދުތައް“ ގެންގުޅޭ މީހުންނަށް އަމާޒުކުރި ވާހަކައެއް ކަމަށް ބުނެފައެވެ.
މިކަން ވައިރަލް ވުމާއެކު އުފެދިގެންދިޔަ ”ކޮކްރޯޗް ޖަނަތާ ޕާޓީ“ (ސީޖޭޕީ) ނަމަކީ 2014 ވަނަ އަހަރުން ފެށިގެން ވެރިކަން ކުރަމުން އަންނަ ބާރަތިޔާ ޖަނަތާ ޕާޓީ (ބީޖޭޕީ) އަދި ބޮޑުވަޒީރު ނަރެންދުރަ މޯދީއަށް މަލާމާތްކުރުމުގެ ގޮތުން ބޭނުންކުރާ ނަމެކެވެ. ފާޑުކިޔާ ފަރާތްތަކުންނާއި އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ތުހުމަތުކުރާ ގޮތުގައި، ބީޖޭޕީގެ ވެރިކަމުގައި ނޫސްވެރިކަމުގެ މިނިވަންކަމާއި މަދަނީ މިނިވަންކަން ވަނީ ދަށަށް ގޮސްފައެވެ.
މިއަދު ސީޖޭޕީގެ އިންސްޓަގްރާމް އެކައުންޓްގެ ފޮލޯވަރުންގެ އަދަދު 10 މިލިއަނަށްވުރެ މައްޗަށް އަރައި ވަނީ ބީޖޭޕީގެ ރަސްމީ އެކައުންޓަށްވުރެ ކުރި ހޯދާފައެވެ. މެންބަރުންގެ އަދަދަށް ބަލާއިރު ދުނިޔޭގެ އެންމެ ބޮޑު ސިޔާސީ ޕާޓީގެ ގޮތުގައި ބެލެވޭ ބީޖޭޕީގެ އިންސްޓަގްރާމްގައި ތިބީ 8.7 މިލިއަން ފޮލޯވަރުންނެވެ.
ގިނަ ޒުވާނުންނާއި އިދިކޮޅު ފަރާތްތަކުން އޮންލައިންކޮށް ”ކުރަފި“ ބޭނުންކުރަމުން ޝުއޫރު ފާޅުކުރަން ފާށާފައިވީ ހިނދު 200,000 އަށްވުރެ ގިނަ ފޮލޯވަރުން ތިބި ސީޖޭޕީގެ ޓުވިޓާ އެކައުންޓު ވަނީ އިންޑިއާގައި ބޭންކޮށްފައެވެ. ފާހަގަކޮށްލެވޭ ގޮތުގައި، ފާއިތުވެދިޔަ އަހަރުތަކުގައި ދެކުނު އޭޝިއާގެ “ޖެންޒީ“ ހަޅުތާލުތަކުގެ ސަބަބުން ވަނީ ސްރީ ލަންކާ، ނޭޕާލް، އަދި ބަންގްލަދޭޝްގެ ވެރިކަން ވައްޓާލާފައެވެ.
