ވަޒީފާއާ ބެހޭ ޓްރައިބިއުނަލްގެ ރައީސްކަމުގެ މަގާމުން އިސްހާގު ޙުސައިން މިއަދު އިސްތިއުފާ ދެއްވައިފިއެވެ.
އެ މަގާމަށް އިސްހާގު އައްޔަންކުރެއްވީ 2024 ވަނަ އަހަރުގެ އޭޕްރީލް މަހުގެ ތެރޭގައެވެ. އެ މަގާމުން އިސްހާގު އިސްތިއުފާ ދެއްވި ސަބަބެއް ސާފެއް ނޫނެވެ. ވަޒީފާއާ ބެހޭ ޓްރައިބިއުނަލްގެ ވެބްސައިޓުގައި ވެސް މިހާރު ތިއްބެވި މެމްބަރުންގެ ތެރޭގައި އޭނާއާ ބެހޭ އެއްވެސް މައުލޫމާތެއް މިހާރު ނެތެވެ.
ވަޒީފާއާ ބެހޭ ޓްރައިބިއުނަލްއަކީ ވަޒީފާއާ ބެހޭ މައްސަލަތައް ބެލުމަށް ވަޒީފާއާ ބެހޭ ގާނޫނުގެ ދަށުން އުފައްދާފައިވާ މުއައްސަސާއެކެވެ. ވަޒީފާއާ ބެހޭ ޓްރައިބިއުނަލްއަށް މެންބަރުން އައްޔަންކުރަނީ ފަސް އަހަރު ދުވަހުގެ މުއްދަތަކަށެވެ. އަދި މި ޓްރައިބިއުނަލްއިން މެންބަރުން ވަކިކުރުމުގެ ބާރު އޮންނާނީ ރައީސަށް އެކަންޏެވެ.
ނުވަ މެމްބަރުންގެ މައްޗަށް އެކުލެވޭ ވަޒީފާއާ ބެހޭ ޓްރައިބިއުނަލްގެ މެމްބަރުންގެ ގޮތުގައި މިހާރު ތިއްބެވީ ނައިބް ރައީސް ފާތިމަތު މަހީރާ މުޙައްމަދާއި މެމްބަރުންގެ ގޮތުގައި މަރްޔަމް ރިޝްފާ އާއި ޙިކުމާ އަޙްމަދު ނިޒާރާއި ޝަހީމާ ސަލީމާއި ސައުސަން ޢަލީ އަދި އިޝާރާ ޢަބްދުލްޢަޒީޒާއި ފާޠިމަތު ސައުސަންގެ އިތުރުން ޙަސަން އިބްރާހިމެވެ.
