ޣައްޒާއަށް އިންސާނީ އެހީ ހިފައިގެން ދަތުރުކުރި އުޅަނދުފަހަރު ބައިނަލްއަޤްވާމީ ކަނޑުގެ Սަރަޙައްދުން ހުއްޓުވައި، 400 އަށްވުރެ ގިނަ ބައިނަލްއަޤްވާމީ އެކްޓިވިސްޓުން ހައްޔަރުކުރުމަށްފަހު، ޔަހޫދީ އިސްތިއުމާރު، އިޒްރޭލުން ވަނީ ވަރަށް އަނިޔާވެރި އަދި އިހާނެތި ގޮތަކަށް އެމީހުންނާ މެދު ކަންތައްކޮށްފައެވެ. މި އަނިޔާވެރިކަން މުޅި ދުނިޔެއަށް ފަޚުރުވެރިކަމާއެކު ދައްކާލީ ޚުދު އިޒްރޭލުގެ ހަރުކަށި ނޭޝަނަލް ސެކިއުރިޓީ މިނިސްޓަރު އިޓަމާރ ބެން-ގްވީރު އެވެ.
ככה אנחנו מקבלים את תומכי הטרור
Welcome to Israel 🇮🇱 pic.twitter.com/7Hf8cAg7fC
— איתמר בן גביר (@itamarbengvir) May 20, 2026
ޙާދިސާގެ ތަފްޞީލު
އަޝްދޫދު ބަނދަރުގައި ހިނގައިދިޔަ ކަންކަމަކީ ސިފައިންގެ އަމިއްލަ ނިންމުމެއް ނޫނެވެ؛ އެއީ ސީދާ ދައުލަތުގެ އެންމެ މަތިން ރާވައިގެން ހިންގި ޕްރޮޕެގެންޑާއެކެވެ.
– ހުއްޓުވުން: ޣައްޒާއަށް އެހީ ހިފައިގެން ދިޔަ 50 ބޯޓުގެ މައްޗަށް އެކުލެވޭ ”ގްލޯބަލް ސުމޫދު ފްލޮޓިލާ“ ބައިނަލްއަޤްވާމީ ކަނޑުގެ ސަރަޙައްދުން އިޒްރޭލު ސިފައިން ހުއްޓުވިއެވެ. 40 އަށްވުރެ ގިނަ ޤައުމެއްގެ މީހުން ތިބި މި އުޅަނދުތައް ވަނީ ގަދަކަމުން އިޒްރޭލުގެ އަޝްދޫދު ބަނދަރަށް ގެންގޮސްފައެވެ.
– މަލާމާތުގެ މަރުޙަބާ: އިޒްރޭލުގެ މިނިސްޓަރު ބެން-ގްވީރު ވަނީ އެކްސްގައި ”ވެލްކަމް ޓު އިސްރާއީލް“ (އިޒްރޭލަށް މަރުޙަބާ) ޖަހާފައި ވީޑިއޯއެއް އާންމުކޮށްފައެވެ. މި ވީޑިއޯއިން ފެންނަނީ ހަތިޔާރެއް ނެތް އެތައް ސަތޭކަ އެކްޓިވިސްޓުންގެ އަތް ފުރަގަހަށްލައި ޒިޕް-ޓައި އިން ބަނދެ، ބިމުގައި ކުޑަކަކޫ ޖައްސުވައި، މޫނު ބިމުގައި ޖައްސައިގެން ތިބޭ މަންޒަރެވެ.
– ބައިނަލްއަޤްވާމީ ފާޑުކިޔުން: މި ވީޑިއޯއާއެކު މުޅި ދުނިޔެއިން ވަނީ އިޒްރޭލަށް ވަރަށް ބޮޑަށް ފާޑުކިޔާފައެވެ. ފްރާންސް، ކެނެޑާ، ސްޕެއިން އަދި ނެދަލޭންޑްސް ފަދަ ޤައުމުތަކުން ވަނީ އިޒްރޭލުގެ ސަފީރުން ހާޒިރުކޮށްފައެވެ. ކެނެޑާގެ ބޮޑުވަޒީރު ވަނީ މިއީ ”ޤަބޫލުނުކުރެވޭވަރުގެ ހުތުރު“ އަމަލެއް ކަމަށް ބުނެފައެވެ.
ޞުލްޙަވެރި ފްލޮޓިލާތަކުގެ ލިމިޓު: ޢަމަލީ ނަތީޖާއެއް ނުފެންނަ ރަމްޒީ ޙަރަކާތްތަކެއް
ބައިނަލްއަޤްވާމީ ޤާނޫނުތަކަށް ބޯނުލަނބާ، އަދި ފާޅުގައި މުޅި ދުނިޔެ ކުރިމަތީ އިންސާނިއްޔަތާ ޚިލާފު ޖަރީމާތައް ހިންގުމަށް ކުޑަވެސް ލަދެއްނެތް ޚުދުމުހުތާރު އަސްކަރީ ބާރަކާ ދެކޮޅަށް މިފަދަ ޞުލްޙަވެރި ފްލޮޓިލާތައް ބޭނުންކުރުމުގެ ނަތީޖާއަށް ބަލާއިރު ފެންނަނީ ވަރަށް ހިތާމަވެރި ޙަޤީޤަތެކެވެ. މިފަދަ ކަންކަމަށް އެތައް މިލިއަން ޑޮލަރަކާއި ބޮޑެތި މަސައްކަތްތަކެއް ކުރި ނަމަވެސް، މައިދާނުގެ ޙަޤީޤަތަށް ބަލާއިރު މިއިން އެއްވެސް އަސާސީ ނަތީޖާއެއް ނުނިކުމެއެވެ. އެހީއެއް ނުފޯރައެވެ. އަދި ޙިޞާރު ކުރެވިފައިވާ މަގުތަކެއްވެސް ނުހުޅުވެއެވެ. އެހެންކަމުން، މިފަދަ ފްލޮޓިލާތަކަކީ އެއްވެސް ޢަމަލީ ބާރެއް ނެތް، ނިމޭއިރު ހަމައެކަނި ރަމްޒީ ކަމެއްގެ ގޮތުގައި ކޮށްލެވޭ ކަމަކަށް ވަނީ ވެފައެވެ. މިފަދަ ސުލްޙަވެރި ފްލޮޓިލާތަކުން ނަތީޖާ ނެރެން ބަރޯސާވާ ބައިނަލްއަގުވާމީ ކޮމިއުނިޓީއިންވެސް ބޮޑުވަރަކަށް ކުރާކަމަކީ އެކަން ހަރުކަށި ޢިބާރާތުން ކުށްވެރިކުރުމެވެ. އިޒްރޭލުގެ އަނިޔާވެރިކަމާ ދެކޮޅަށް އަޅާ އެއްވެސް ފިޔަވަޅެއް ނެތެވެ. އަދި ކިއެއް، ހުޅަނގުގެ ޤައުމުތަކުގެ ސިޔާސަތު ވަކީން ޚާއްޞަކޮށް އެމެރިކާގެ ސިޔާސަތު ހުންނަނީ އިޒްރޭލުން ހިންގާ ހުރިހާ ޖަރީމާތަކެއް ދިފާޢުކުރެވި، ހުރިހާ ގޮތަކުންވެސް އިޒްރޭލަށް ފައިދާ ވާނެހެންނެވެ. އަދި އިޒްރޭލުގެ އިސްތިއުމާރު ދެމިއޮތުމުގެ މައިބަދައަކީވެސް ހުޅަނގުގެ ޤައުމުތަކުން ދޭ ސިޔާސީ، މާލީ އަދި އަސްކަރީ އެހީތަކެވެ.
ފަލަސްޠީނު މިނިވަންކުރުމަށް އޮތް އެންމެ ބޮޑު ހުރަސް
މި ހުރިހާ ކަމަކުން ލިބޭ ވަރަށް ހިތި ފިލާވަޅެއް އެބަވެއެވެ؛ އަފްޣާނިސްތާނު، ޢިރާޤު، އަދި ސީރިއާ ހަނގުރާމަތަކުގައިވެސް ފެނުނު ފަދައިން، މުސްލިމުން އެމީހުންގެ އަމިއްލަ ނަފްސު ދިފާޢުކުރަން އެކަނިވެރިވުމެވެ. ނަމަވެސް، މީގައި އެންމެ ބޮޑު ހައިރާންކަމެއް ލިބެނީ ފާޅުގައި އިސްލާމްދީނާ ދެކޮޅަށް ތިބި ޢަދާވާތްތެރި އަސްކަރިއްޔާތަކުގެ ޢަމަލުތަކުންނެއް ނޫނެވެ. އޭގެ ބަދަލުގައި، އެންމެ ބޮޑު ހިތާމައަކީ މުސްލިމް ޤައުމުތަކުގައި ތިބެގެން، މި ބޭރުގެ އިސްތިޢުމާރީ ބާރުތަކުގެ ސިޔާސަތުތަކަށް ފިތި، އެމީހުންގެ ނުފޫޒުގެ ދަށުގައި މަސައްކަތްކުރާ ވެރިންގެ ޢަމަލުތަކެވެ. މައިދާނުގެ ޙަޤީޤަތަށް ބަލާއިރު، މި ޤައުމުތަކުގައި ބޮޑެތި އަސްކަރީ ވަސީލަތްތަކާއި، މާލީ ތަނަވަސްކަމާއި، އަދި ސިޔާސީ ނުފޫޒު އެބަހުއްޓެވެ. ނަމަވެސް، ރަޙުމެއްނެތް ޙިޞާރު އުވާލައި، އެހީގެ ސާމާނު އެތެރެކޮށް، އެކަނިވެރިވެފައިވާ ނިކަމެތި ރައްޔިތުންނަށް ދޭ ޙަމަލާތައް ހުއްޓުވުމަށް މި ވަސީލަތްތައް ބޭނުންކުރުމަށް މި ވެރިން ކަނޑާލައި ދެކޮޅުހަދަވައެވެ.
މީގެ ބަދަލުގައި، މި ޤައުމުތަކުގެ އެތެރޭގެ ޤާނޫނުތައް ހަދާފައިވަނީ ހުޅަނގުގެ ޚާރިޖީ ސިޔާސަތުތަކާއި އެމެރިކާގެ ޑިކްޓޭޝަނާ އެއްގޮތްވާ ގޮތުގެ މަތިންނެވެ. ޚާއްޞަކޮށް، އެޤައުމުތަކުގެ ޓެރަރިޒަމްގެ ޤާނޫނުތައް މާނަކުރަނީ ހުޅަނގުގެ ބާރުތަކުން ބޭނުންވާ ގޮތަށެވެ. މީގެ ސަބަބުން، އިސްތިޢުމާރާ ދެކޮޅަށް އަމިއްލަ ޤައުމުގެ ރައްޔިތުން ކުރާ ޙަޤީޤީ ދިފާޢީ މަސައްކަތްތަކަކީ ”ހަރުކަށި ފިކުރު“ ނުވަތަ ”ޓެރަރިޒަމް“ ކަމަށް ލޭބަލްވެ، އެފަދަ މީހުން ހައްޔަރުކޮށް، އެތައް އަހަރެއްގެ ދިގު ޖަލު ޙުކުމްތައް އިއްވުމަށް މަގުފަހިވެއެވެ. މިއީ އިސްލާމްދީނުގެ ޝަރުޢީ އިސްތިލާޙުތައް އޮޅުވާލައި، ޞުލްޙަވެރިކަމުގެ ނަމުގައި ޢާންމު ރައްޔިތުންނަށް ޤުރްއާނާއި ސުންނަތުން ލިބިގެންވާ ޖިހާދުކުރުމުގެ ޙައްޤު ނިގުޅައިގަނެ، އިސްތިޢުމާރީ ބާރުތަކުގެ ކުރިމަތީގައި ކަނޑައެޅިގެން ބާރުކަނޑުވާލާފައިވާ އަދުގެ މުސްލިމް އުއްމަތުގެ ހިތި ހަޤީގަތެވެ.
