ކަމާގުޅޭ އިދާރާގެ އެއްވެސް ހުއްދައެއް ނެތި ރާއްޖެއަށް އާއްމުކޮށް އެތެރެކޮށްގެން ވިއްކަމުންދާ 21 ބޭހެއްގެ މައުލޫމާތު މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު އާއްމުކޮށްފިއެވެ.
އެމްއެފްޑީއޭއިން ނެރުނު ބަޔާނެއްގައި ބުނެފައިވަނީ، ރާއްޖެއަށް ބޭސް އެތެރެކުރަންވާނީ ކަނޑައެޅިފައިވާ ގަވައިދުތަކާއި އުސޫލުތަކާ އެއްގޮތަށް ރަޖިސްޓްރީކޮށް، ”އެޕްރޫވްޑް ޑްރަގް ލިސްޓު“ ގައި ހިމެނޭ ބޭސްތައް ކަމަށެވެ. ނަމަވެސް، ބޭސް އެތެރެކުރުމުގެ ހުއްދަ ނެތް ފަރާތްތަކުން އެކި ގޮތްގޮތުން ތަފާތު ބާވަތްތަކުގެ ބޭސް ރާއްޖެއަށް އިމްޕޯޓުކޮށް، އޮންލައިން ޕްލެޓްފޯމްތަކާއި އާދައިގެ ފިހާރަތަކުގައި ވިއްކަމުންދާކަން ފާހަގަކުރެވިފައިވާ ކަމަށް އެ އިދާރާއިން ބުނެއެވެ.
— MFDA (@MFDA_mv) May 20, 2026
މިގޮތުން އެމްއެފްޑީއޭއިން މިއަދު އާއްމުކުރި ލިސްޓުގައި ހިމެނެނީ ތަދުތަކަށް އުނގުޅާ ބޭހާއި، ހަމުގެ ބަލިތަކަށް ބޭނުންކުރާ ބޭހުގެ އިތުރުން ރޯގާ އަދި ހަކުރު ބައްޔަށް ބޭނުންކުރާ ބޭސްތަކެކެވެ.
އެ އިދާރާއިން ބުނި ގޮތުގައި މި ބޭސްތަކަކީ އޭގައި ހިމެނޭ މާއްދާތައް ކަށަވަރު ކުރެވޭ ބާވަތްތަކެއް ނޫނެވެ. އަދި ރަޖިސްޓްރީ ނުކޮށް އެތެރެކުރާ މިފަދަ ތަކެއްޗަކީ އޭގެ ފެންވަރާއި ރައްކާތެރިކަން އެއްވެސް ވަރަކަށް ކަށަވަރު ކުރެވިފައިވާ ތަކެތި ނޫންކަމަށްވެސް އެމްއެފްޑީއޭއިން ބުނެއެވެ.
”މިފަދަ ގޮތް ނޭނގޭ ބޭހާއި ބޭހުގެ ބާވަތްތައް އިމްޕޯޓުކޮށް ވިއްކުމުން އެ ބޭނުންކުރާ ފަރާތްތަކަށް ހީވެސް ނުކުރާ ފަދަ ބޮޑެތި، ސިއްހީ ނުރައްކަލަކާ ކުރިމަތިލާން ޖެހުމަކީ ވަރަށް ގާތުގައި އޮތް ކަމެކެވެ،“ އެމްއެފްޑީއޭގެ އިއުލާނުގައި ފާހަގަކޮށްފައިވެއެވެ.
އެހެންކަމުން، މިފަދަ ތަކެތި ރާއްޖެއަށް އިމްޕޯޓުކުރުމާއި، ވިއްކުމާއި އަދި ބޭނުންކުރުމަކީ މަނާކަމެއް ކަމަށް އެ އިދާރާއިން ވަނީ އަންގާފައެވެ. މިކަމާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާ ފަރާތްތަކުން އެ އޮތޯރިޓީގެ ނަންބަރު 7200321 އަށް ގުޅުމަށް އެމްއެފްޑީއޭއިން ވަނީ އިލްތިމާސްކޮށްފައެވެ.
