ދިވެހިރާއްޖެއިން އިނގިރޭސި ވިލާތަށް އެކްސްޕޯޓު ކުރާ ކަނޑުމަހުގެ ބާވަތްތަކުން ނަގަމުންދާ ޓެރިފް ކަނޑާލުމަށް އެ ގައުމުން ނިންމި ނިންމުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުހަބާ ވިދާޅުވެއްޖެއެވެ.
އިނގިރޭސި ވިލާތުގެ މި ނިންމުމަށް ރައީސް މުޢިއްޒު މަރުހަބާ ވިދާޅުވީ، ދިވެހިރާއްޖެއިން އެކްސްޕޯޓްކުރާ ކަނޑުމަހުގެ ބާވަތްތަކުން ޓެރިފް ކަނޑާލަން ނިންމައިފައިވާކަން ހާމަކުރައްވައި އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ހައި ކޮމިޝަނަރު ނިކް ލޯ މީސް މީޑިއާގައި ހިއްސާކުރެއްވި ޕޯސްޓަކަށް ރިޕްލައިކުރައްވަމުންނެވެ.
I warmly welcome the United Kingdom’s decision to suspend tariffs on tuna imports effective 20th May 2026.
This important development will support British consumers while delivering meaningful benefits to the Maldives’ fisheries sector, strengthening fishermen’s incomes,… https://t.co/WFLQy5PWrH
— Dr Mohamed Muizzu (@MMuizzu) May 20, 2026
އިނގިރޭސި ހައި ކޮމިޝަނަރުގެ ޕޯސްޓުގައި ވިދާޅުވި ގޮތުގައި، މި ނިންމުމުގެ ސަބަބުން އިނގިރޭސިވިލާތުގެ ކަސްޓަމަރުންނަށް އަގުހެޔޮކޮށް މަހުގެ ބާވަތްތައް ލިބުމުގެ މަގު ފަހިވާނެއެވެ. އަދި ހަމައެހެންމެ، މިކަމުގެ ސަބަބުން ދޮށީގެ މަސްވެރިކަމުގެ އުފެއްދުންތަކަށް އެ ގައުމުގެ މާކެޓުގައި އޮތް ފުރުސަތުތައް އިތުރަށް ފުޅާވާނެ ކަމަށް ވެސް އޭނާ ވަނީ ވިދާޅުވެފައެވެ.
އޭނާގެ އެ ޕޯސްޓަށް ރިޕްލައިދެއްވަމުން ރައީސް މުޢިއްޒު ވިދާޅުވީ، މިކަމުގެ ސަބަބުން ދިވެހިރާއްޖޭގެ އިގްތިސާދަށާއި ދެ ގައުމުގެ ދެމެދުގައި އޮތް ގުޅުމަށް ބޮޑެތި ކުރިއެރުންތަކެއް ލިބިގެންދާނެ ކަމަށެވެ. މީގެ އިތުރުން މަސްވެރިންނަށް ލިބޭ އާމްދަނީ އިތުރުވެ، ބައިނަލްއަގުވާމީ މައިދާނުގައި ވެސް މަސްވެރިންނަށް ލިބެންޖެހޭ ހައްގު އުޖޫރައާއި އިހުތިރާމް ލިބިގެންދާނެކަން ރައީސް ވަނީ ފާހަގަކުރައްވައިފައެވެ.
އެމަނިކުފާނު އިތުރަށް ވިދާޅުވީ، ދިވެހިރާއްޖެއަކީ ދުނިޔޭގެ ފެންވަރުގައި ވެސް ބަލައިގަންނަ، ދެމެހެއްޓެނިވި ގޮތެއްގައި ދޮށީގެ މަސްވެރިކަން ކުރާ ގައުމެއް ކަމަށެވެ. އަދި އިނގިރޭސި ވިލާތުގެ މި ނިންމުމުގެ ސަބަބުން ދެ ގައުމުގެ ދެމެދުގައި އޮތް ގާތް ގުޅުމާއި، ދެމެހެއްޓެނިވި ވިޔަފާރިއަށް ދެ ގައުމުން ވެސް ދޭ އަހައްމިއްޔަތު ރަމްޒުކޮށްދޭ ކަމެއް ކަމަށް އެމަނިކުފާނު ވިދާޅުވިއެވެ.
