ކޮންމެ އަހަރަކު ދައުލަތުގެ ބަޖެޓުން މިފްކޯއަށް ދެމުން އައި ސަބްސިޑީ ހުއްޓާލައި ކުންފުނި ހިންގަން އަމިއްލައަށް ފަށާފައިވާ ކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް މި މޭރުމުން ވިދާޅުވީ، ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުންނެވެ. އެ ޕްރޮގްރާމުގައި ވާހަކަދައްކަވަމުން މިނިސްޓަރު ވިދާޅުވީ، ރައްޔިތުންނަށް ބުރަބޮޑުވާގޮތަށް މިފްކާ ހިންގުމަކީ ކުރަންޖެހޭ ކަމެއް ކަމަށް ގަބޫލުނުކުރައްވާ ކަމަށެވެ. މި އުސޫލު ބަދަލުކޮށްފައިވާކަން ފާހަގަކުރައްވަމުން މިނިސްޓަރު ވިދާޅުވީ، ދެން ސަބްސިޑީ ދެމުން ގެންދާނީ ހަމައެކަނި މަސްވެރިންނަށް ވިއްކާ ތެލަށް އެކަނި ކަމަށެވެ.
މިނިސްޓަރު ވިދާޅުވީ، އެހެން ކުންފުނިތަކެކޭ އެއްގޮތަށް މިފްކޯއިން ވެސް އެފްއެސްއެމް މެދުވެރިކޮށް ތެޔޮ ގަންނަނީ އާއްމު ރޭޓުގައި ކަމަށެވެ. އަދި ހަމައެހެންމެ، ކުންފުނީގެ ހިންގުން މިހާރަށްވުރެ ބޮޑަށް ހަރުދަނާކުރުމަށް ގިނަ މަސައްކަތްތަކެއް ކުރަމުން އަންނަކަން މިނިސްޓަރު ވަނީ ފާހަގަކުރައްވައިފައެވެ.
މި ސަރުކާރު ވެރިކަމާ ހަވާލުވިއިރު މިފްކޯ ދައުލަތަށް ބަރޯސާވާ މިންވަރު ވަނީ ވަރަށް ބޮޑުތަނުން އިތުރުވެފައެވެ. އެގޮތުން މަސް ގަތުމަށް ކޮންމެ ކިލޯއަކަށް 13 ރުފިޔާގެ މަގުން ފިނޭންސް މިނިސްޓްރީން އައީ މިފްކޯއަށް ސަބްސިޑީ ދެމުންނެވެ. މިއީ އަހަރެއްގެ މައްޗަށް ބަލާނަމަ 1.1 ބިލިއަން ރުފިޔާއެވެ.
ސަރުކާރުގެ ކުންފުނިތަކަށް ގެންނަންޖެހޭ މިފަދަ މުހިއްމު ބަދަލުތައް ގެނައުމުގެ މަސައްކަތަކީ މި ސަރުކާރުން ވަރަށް ބޮޑު އިސްކަމެއްދީގެން ކުރަމުން އަންނަ މަސައްކަތެއްކަން ފާހަގަކޮށްލަންޖެހެއެވެ.
