ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމްގެ އިތުބާރު ނެތްކަމުގެ މައްސަލައިގެ ގަރާރަށް ބަހުސް ކުރާނެ ވަގުތާއި އޭނާ ޖަވާބުދާރީވާން ދޭނެ ވަގުތު ކަނޑައެޅުމަށް މަޖިލީހުގެ އާންމު ކޮމިޓީގެ ބައްދަލުވުމެއް މިއަދަށް ތާވަލުކޮށްފިއެވެ.
މި ބައްދަލުވުން ބޭއްވުމަށް ހަމަޖެހިފައިވަނީ މިއަދު ހަވީރު 16:00 ގައެވެ. މި ބައްދަލުވުމުގައި އޮންނާނީ، ގަރާރުގެ ބަހުސްގައި ވާހަކަ ދައްކަވާނެ މެންބަރުންގެ އަދަދު ކަނޑައެޅުމާއި، މެންބަރުންނަށް ވާހަކަދެއްކެވުމަށް ދޭނެ ވަގުތު ކަނޑައެޅުމުގެ އިތުރުން، ޖަވާބުދާރީވެވަޑައިގަތުމަށް ނާޒިމަށް ދޭނެ ފުރުސަތުގެ އަދަދާއި ވަގުތު ކަނޑައެޅުމެވެ.
މަޖިލީހުގެ ނައިބު ރައީސްކަމުގެ މަގާމުން ނާޒިމް ވަކިކުރަން ނިންމީ ކޮންގްރެސް ޕާޓީގެ ޕާލަމެންޓްރީ ގްރޫޕުން ބޭއްވި ބައްދަލުވުމެއްގެ ތެރެއިންނެވެ. އެ ބައްދަލުވުމަށްފަހު، ނާޒިމް މަގާމުގެ ވަކިކުރުމުގެ ގަރާރުގައި ކޮންގްރެސް ޕާޓީގެ 73 މެންބަރަކު ވަނީ ސޮއިކުރައްވައިފައެވެ. އެ ގަރާރުގައި ބަޔާންކޮށްފައިވާ ގޮތުން ނާޒިމް މަގާމުން ވަކިކުރުމަށް ބޭނުންވާ އެއް ސަބަބަކީ މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ނެގުމާއިއެކު، މަޖިލީހުގެ މަސްލަހަތު ނަގާލަން ހިތްވަރުދީ، ޒިންމާއިން ބަރީއަވުން ކަމަށްވެއެވެ.
އެގޮތުން މަގާމުގެ މަސްއޫލިއްޔަތު އަދާކުރުމުގައި ނާޒިމް ވަކި އަތަކަށް ޖެހިފައިވާކަން ސާފުކޮށް އެނގެން އެބައޮތް ކަމަށާއި އަދި އެންމެހައި މެންބަރުންގެ ހައްގުތަކާއި އިމްތިޔާޒުތައް ހިމާޔަތްކޮށްދިނުމުގައި އޭނާ އިހުމާލުވެފައިވާ ކަމަށް އެ ގަރާރުގައި ބަޔާންކޮށްފައިވެއެވެ. އޭނާ އެގޮތަށް އަމަލުކުރައްވާތީ މެންބަރުންނާ މަތިކޮށްފައިވާ ޒިންމާތައް އަދާކުރެއްވުމުގައި ނައިބު ރައީސް ހުރަހަކަށްވެފައިވާ ކަމަށް ވެސް ގަރާރުގައި ބަޔާންކޮށްފައިވެއެވެ.
ފާހަގަކޮށްލެވޭ ގޮތުގައި، 20 ވަނަ ރައްޔިތުންގެ މަޖިލީހުގެ ނައިބު ރައީސްކަމުގެ މަގާމު ނާޒިމަށް ލިބިވަޑައިގަތީ މަޖިލީހުގެ މެންބަރުންގެ މެދުގައި ނެގި ވޯޓުގައި 80 ވޯޓު ހޯއްދަވައިގެންނެވެ.
