އަލީ ޖުމާން، އާއްމު ނަމުން ނަމަ ”ޑެތު“، ސޯޝަލް މީޑިއާ މަންސައެއް ކަމަށްވާ ޓުވިޓާގައި މިއަދު ޝާއިޢުކޮށްފައިވާ ވީޑިއޯ އަކުން ހާމަވާ ގޮތުގައި އެމްޑީޕީގެ ޗެއާޕާސަންކަމަށް ވާދަކުރާ ކުރީގެ ރައީސް ނަޝީދު ވަނީ އޭނާ ޖަލުން މިނިވަންވުމުން މަރުހަބާކިޔާ، އޭނާގެ ހިތްވަރަށް ތަޢުރީފުކޮށްފައެވެ.
”އޭ ވަރަށް ގަދަ އިނގޭތޯ ތި ކުރައްވާ ހިތްވަރު. އަނެއްކާ އަލުން އަނބުރާ ތިހިރީ ،“ އަލީ ޖުމާން ޝާޢިއިކޮށްފައިވާ ވީޑިއޯގައި ކުރީގެ ރައީސް ނަޝީދު އޭނާ މިނިވަން ވުމާ ގުޅޭގޮތުން ދިން ހިތްވަރުގެ ބަސްކޮޅެއް ފަދަ ގޮތަކަށް ދޭހަވާނެހެން ބުނެފައި ވެއެވެ.
އަލީ ޖުމާން އާއްމުންގެ ސަމާލުކަމަށް އައިސްފައިވަނީ އެމްޑީޕީގެ ހަރުގޭގައި އޮތް ޖަލްސާއެއްގައި ނިމިދިޔަ އަހަރު މަސްތުގެ ހާލަތުގައި ކަމަށް ބެލެވޭފަދަ ގޮތަކަށް ހުރެ ވާހަކަ ދެއްކި ވީޑިއޯއެއް ވައިރަލް ވުމުންނެވެ. ”ޝިޔާމްބޭ ދީބެ ތިތަނުން ދަޅެއް، މިގޮލާ ނުދިނޭ،“ ބުނާ އެ ވީޑިއޯއަށް އާއްމުންގެ ސަމާލުކަން ލިބި، ގިނަބައެއްގެ ފާޑުކިޔުން އެދުވަސްވަރުގައި އަމާޒުވިއެވެ.
އަލީ ޖުމާން ”ޑެތު“ ގެ ޓުވިޓާ އެކައުންޓުގައި ޝާއިޢުކޮށްފައިވާ ކުރީގެ ޕޯސްޓަކުން ދޭހަވާ ގޮތުގައި އޭނާ އަކީ ރާއްޖޭގައި ގަންޖާ ހުއްދަކުރުމަށް ވަކާލާތުކުރާ މީހެކެވެ. އަދި ޤައުމު ”ޑާކުވާތީ“ ޕޮލިހުން ”ވަގަށް ނެގި ވީޑު“ ތައް އަނބުރާ ދިނުމަށްވެސް އޭނާ ގޮވާލާފައިވެއެވެ. މީގެ އިތުރުން ރައީސް ނަޝީދު ފާހަގަކޮށްލެވެނީވެސް ރާއްޖޭގައި ގަންޖާ ”ބޯންވާނެ ބޮވެންޖެހޭނެ“ ކަމަށް ބުނެފައިވާ މީހެއްގެ ގޮތުގައެވެ.
މިމަހުގެ 13 ވަނަ ދުވަހު ކުރިއަށްގެންދިޔަ މުޒާހަރާގައި ހައްޔަރުކުރި އަލީ ޖުމާން ދޫކޮށްލުމުން އޭނާ މިއަދު ޝާއިޢުކުރި މިވީޑިއޯގައި ރައީޝް ނަޝީދަށް ރައްދުގައި ބުނި އެއްޗެއްގެ އަޑު ސާފުނުވި ނަމަވެސް އޭނާ ކޮށްފައިވާ ވީޑިއޯއާއި ކެޕްޝަނުން ފެންނަ ގޮތުގައި އޭނާ ވަނީ އަތް ފޮޅާލައި ރައީސް ނަޝީދާ ދިމާލަށް އައުގުރާނަ ގޮވާފައެވެ.
