ކުރީގެ ރައީސް މުހައްމަދު ނަޝީދު، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަން ބަދަލުކުރާނެ ކަމަށް ވިދާޅުވެ ދެއްވި އިންޒާރަށް، ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުހައްމަދު އިސްމާއިލް ވަރުގަދަ ރައްދެއް ދެއްވައިފިއެވެ.
ރައްޔިތުންގެ މަޖިލީހުގެ އަޣުލަބިއްޔަތު ހޯދައިގެން ރައީސް މުއިއްޒުގެ ވެރިކަން ނިމުމަކަށް ގެންނާނެ ކަމަށް ރައީސް ނަޝީދު ވަނީ ވިދާޅުވެފައެވެ. މިކަމާ ގުޅިގެން މުހައްމަދު އިސްމާއިލް ވިދާޅުވީ، ސިޔާސީ ބޭނުމަކަށް ވިޔަސް ދައްކަވަންވާނީ ބުރަދަން ހުރި، އަދި ކުރެވޭނެ ވަރުގެ ކަންކަމުގެ ވާހަކަ ކަމަށެވެ.
”ތިއަށްވުރެ މާ މަޝްހޫރުވާނެ މަނިކުފާނު ޅަކުއްޖަކާ ކައިވެނިފުޅު ބައްލަވައިގަންނަވަން އުޅޭކަމަށް ޖަލްސާއެއްގައި ވިދާޅުވިނަމަ. އޭރުން މާ އަވަހަށް ނޫސްތަކުން ޚަބަރު ހަދާނެ،“ މުހައްމަދު އިސްމާއިލް ވިދާޅުވިއެވެ.
މީގެ އިތުރުން، ރައީސް ނަޝީދަށް އިޝާރާތް ކުރައްވައި މުޙައްމަދު ވިދާޅުވީ ”ބާރަށް ތަނެއްގައި ހިފަހައްޓާލައިގެން“ ހުންނެވުމަށެވެ. އޭނާ ފާހަގަކުރެއްވި ގޮތުގައި މިއީ ރައްޔިތުންގެ ރައީސަކު ވެރިކަން ކުރައްވަމުންދާ ސަރުކާރެކެވެ. އަދި މިހާރު އޮތް ރައްޔިތުންގެ މަޖިލީހަކީ ރައްޔިތުން އެދޭ މަގުން މަސައްކަތްކުރާ މަޖިލީހެއް ކަމަށާއި، މަޖިލީހުގެ ސުޕަ މެޖޯރިޓީ އޮތީ ސަރުކާރު ހިންގާ ޕީއެންސީ އަށް ކަންވެސް އޭނާ ހަނދާންކޮށްދެއްވިއެވެ.
ސިޔާސީބޭނުމައްވެސް ދައްކަވަންވާނީ ބުރަދަން ހުންނަ ކުރެވޭނެ ވަރުގެ ކަންކަމުގެ ވާހަކަ ތިއައްވުރެން މައްސޫރުވާނެ މަނިކުފާން ޅަކުއްޖަކާ ކައިވެނިފުޅު ބައްލަވާގަންނަވަން އުޅޭކަމައް ޖަލްސަގަ ވިދާޅުވިނަމަ . އޭރައްމާއަވަހައް ނޫސްތަކުން ހަބަރު ހަދާނެ މަނިކުފާނަށް ދަންންވަން… pic.twitter.com/69lJfS2XME
— Mohamed Ismail (@MPMohdIsmail) May 19, 2026
މި ސަރުކާރު ދެމިއޮންނާނީ ރައްޔިތުންގެ އިތުބާރާއެކު ކަމަށާއި، ވެރިކަން ވައްޓާލުމުގެ ވާހަކަ ނަޝީދު އެ މޭރުމުން ދެއްކެވުމަކީ ބުރަދަނެއް ހުރި ކަމެއް ނޫން ކަމަށްވެސް މުހައްމަދު އިސްމާއިލްގެ ވާހަކަފުޅުގައި ފާހަގަކުރެއްވިއެވެ.
