ޗައިނާގެ އަސްކަރިއްޔާ އިން މިދިޔަ އަހަރުގެ ފަހުކޮޅު ރަޝިޔާގެ 200 އެއްހާ ސިފައިންނަށް ޗައިނާގައި ސިއްރު ތަމްރީނުތަކެއް ދީފައިވާ ކަމަށާއި، އޭގެ ތެރެއިން ބައެއް ސިފައިން މިހާރު ޔޫކްރޭނު ހަނގުރާމައަށް އެނބުރި ގޮސްފައިވާ ކަމަށް ޔޫރަޕުގެ ތިން އިންޓެލިޖެންސް އެޖެންސީއަކާއި ސިއްރު ލިޔެކިޔުންތަކާއި ހަވާލާދީ ރޮއިޓާސް ނޫހުން ރިޕޯޓުކޮށްފިއެވެ.
2022 ވަނަ އަހަރު ރަޝިޔާއިން ޔޫކްރޭނަށް އަރައި ހަމަލާދޭން ފެށި ފަހުން ޗައިނާ އާއި ރަޝިޔާއިން ގުޅިގެން ގިނަ އަސްކަރީ ތަމްރީނުތަކެއް ބާއްވާފައިވީ ނަމަވެސް، އެޤައުމުން ތަކުރާރުކޮށް ބުނަމުންދަނީ އެ ޤައުމަކީ މި ހަމަނުޖެހުމުގައި ވަކި ފަރާތަކަށް ނުޖެހޭ ޤައުމެއް ކަމަށާއި، އަދި ސުލްހަ ޤާއިމުކުރުމުގެ މެދުވެރިއެއްގެ ގޮތުގައެވެ.
ޗައިނާގެ ވެރިރަށް ބެއިޖިންގު ގައި 2025 ވަނަ އަހަރުގެ ޖުލައި 2 ގައި ރަޝިޔާ އާއި ޗައިނާގެ އިސް އޮފިސަރުން ސޮއިކުރި ރަޝިޔާ އަދި ޗައިނާ ބަހުން ލިޔެފައިވާ އެއްބަސްވުމެއްގައި ބަޔާންކޮށްފައިވާ ގޮތުން، މައިގަނޑު ގޮތެއްގައި ޑްރޯން ބޭނުންކުރުމަށް އަމާޒުކޮށްގެން ކުރިއަށްގެންދިޔަ މި ސިއްރު ތަމްރީނުތަކުގެ ތަފްސީލުތައް ހިމެނޭ ކަމަށް ރޮއިޓާސް ނޫހުގައި ބުނެފައި ވެއެވެ.
ރަޝިޔާގެ ސިފައިން ޗައިނާގައި ތަމްރީނުތަކެއް ހެދުމުގެ ބަދަލެއްގެ ގޮތުން ރަޝިޔާ އިންވެސް ވަނީ އެޤައުމުގެ އަސްކަރީ ފެސިލިޓީތަކުގައި ޗައިނާގެ ސިފައިން ތަމްރީނުކުރުމަށް އެއްބަސްވެފައެވެ. މީގެ ސަބަބުން ދެޤައުމުގެ އަސްކަރިއްޔާގެ ދެމެދުގައި ހުނަރާއި ތަޖުރިބާ ބަދަލުކުރެވި، ހަނގުރާމައިގައި ފައިދާތަކެއް ވެގެންދާނެކަމަށް ބެލެވެއެވެ.
