ޙައްޖުގެ މަތިވެރި އަޅުކަން އަދާކުރުމަށް މި އަހަރު ދިވެހިރާއްޖެއިން ފުރާ ޙައްޖާޖީންގެ އެންމެފަހު ގްރޫޕް ވެސް މިއަދު ސަޢުދީ ޢަރަބިއްޔާއަށް ފުރައިފިއެވެ.
ޙައްޖާޖީންގެ އެންމެފަހު ގުރޫޕް ސަޢުދީ ޢަރަބިއްޔާއަށް ފުރާފައިވަނީ ރާއްޖެ ގަޑިން މިއަދު ހެނދުނު 09:47 އެހާއިރުއެވެ. މި ފްލައިޓް ޖިއްދާގެ ކިންގް އަބްދުލްޢަޒީޒް އިންޓަރނޭޝަނަލް އެއަރޕޯޓަށް ޖައްސާނީ ރާއްޖެ ގަޑިން މިއަދު މެންދުރުފަހު 14:07 އެހާއިރުއެވެ. ޙައްޖުގެ އަޅުކަމަށް ފުރާ އެންމެފަހު ގުރޫޕުގައި ހިމެނޭ 253 ޙައްޖާޖީން ވަނީ މި ފުލައިޓުން ސަޢުދީއަށް ފުރައިފައެވެ.
ދިވެހިރާއްޖެއަށް މި އަހަރު 1،000 ޙައްޖު ކޯޓާ ލިބިފައިވާއިރު، ޙައްޖުގެ އަޅުކަމަށް މި ހުރިހާ ޙައްޖާޖީން ދަތުރުކޮށްފައިވަނީ މޯލްޑިވިއަންގެ ދެ ފްލައިޓާއި ސަޢުދީގެ ދެ ފްލައިޓުގައެވެ. މީގެ ތެރެއިން 500 ޙައްޖާޖީން މޯލްޑިވިއަންގެ ފްލައިޓްތަކުގައި ދަތުރުކުރިއިރު، އަނެއް 500 ޙައްޖާޖީން ދަތުރުކޮށްފައިވަނީ ސައުދީގެ ފްލައިޓުތަކުގައެވެ.
މި އަހަރުގެ ޙައްޖުވެރިން ފުރާފައިވަނީ ޖުމްލަ ހަތަރު ފްލައިޓެއްގައެވެ. އެގޮތުން ފުރަތަމަ ފްލައިޓުގައި 238 ޙައްޖާޖީން، ދެވަނަ ފްލައިޓުގައި 260 ޙައްޖާޖީން، ތިންވަނަ ފްލައިޓުގައި 268 ޙައްޖާޖީން އަދި ފަހު ފްލައިޓުގައި 253 ޙައްޖާޖީންނެެވެ.
ދިވެހި ޙައްޖާޖީންނަށް ފުރިހަމަ ހިދުމަތްތަކެއް ފޯރުކޮށްދިނުމުގެ ގޮތުން ދިވެހި ސަރުކާރުން ސަޢުދީ ސަރުކާރާއި ގުޅިގެން ވަރަށް ގިނަ މަސައްކަތްތަކެއް ކުރަމުން އަންނަކަން ފާހަގަކޮށްލެވެއެވެ. އެގޮތުން ޙައްޖާޖީން ތިބޭ ޓެންޓުތަކުގައި ފާހާނަ ބަރި އިތުރުކުރުމާއި ކެއިންބުއިމުގެ އިންތިޒާމުތައް ހަރުދަނާކުރުން ހިމެނެއެވެ.
މޯލްޑިވްސް ޙައްޖު މިޝަންއިން ބުނީ، މިހާތަނަށް ސަޢުދީއަށް ދިޔަ ދިވެހި ޙައްޖާޖީންގެ ހާލުވެސް ރަނގަޅު ކަމަށެވެ.
