ކިއުބާ އާއި ދެކޮޅަށް އެމެރިކާއިން އެއްވެސް އަސްކަރީ ފިޔަވަޅެއް ނަގައިފިނަމަ އެކަމުގެ ސަބަބުން ”ލޭއޮހޮރުވުމަކަށް“ މަގުފަހިވެ، ސަރަހައްދީ ސުލްހަޔާއި ހަމަޖެހުމަށް އަންދާޒާނުކުރެވޭ ފަދަ ގެއްލުންތަކެއް ލިބޭނެ ކަމަށް ކިއުބާގެ ރައީސް މިގޭލް ޑިއާޒް-ކަނެލް ބުނެފިއެވެ. ޓުވިޓާގައި ކޮށްފައިވާ ޕޯސްޓެއްގައި ޑިއާޒް-ކަނެލް ބުނެފައި ވަނީ ”ކިއުބާއަކީ އެއްވެސް ބަޔަކަށް އޮތް ނުރައްކަލެއް ނޫން“ ކަމަށެވެ.
މިފަދަ ގޮތަކަށް ކިއުބާގެ ރައީސް ބުނެފައިވަނީ، ސިއްރު ޖާސޫސީ މައުލޫމާތާ ހަވާލާދީ، ކިއުބާއިން 300 އަށްވުރެ ގިނަ އަސްކަރީ ޑްރޯން ހޯދާފައިވާ ކަމަށާއި، އަދި ގުއަންޓަނާމޯ ބޭގައި ހުންނަ އެމެރިކާގެ ކަނޑުގެ ސިފައިންގެ މަރުކަޒަށާއި، އެމެރިކާގެ އަސްކަރީ އުޅަނދުފަހަރަށާއި، ފްލޮރިޑާގެ ކީ ވެސްޓަށް ހަމަލާދިނުމަށް ރާވަމުންދާ ކަމަށް އާދީއްތަ ދުވަހު އެމެރިކާގެ އެކްސިއޯސް ނޫހުން ރިޕޯޓްކުރުމާ ގުޅިގެންނެވެ. ކިއުބާއިން ބުނީ އެމެރިކާއިން މަސައްކަތް ކުރަމުންދަނީ އަސްކަރީ ގޮތުން އެޤައުމަށް އަރައިގަތުމަށް ބަހަނާއެއް ދެއްކުމަށްޓަކައި ދޮގު މައުލޫމާތު އުފެއްދުމަށް ކަމަށެވެ.
އެމެރިކާގެ ޒަމާންވީ ކޮމިއުނިސްޓު ދުޝްމަނެއް ކަމަށްވާ ކިއުބާއަށް ވަނީ، އެގައުމުގެ އޭރުގެ ބައިވެރިޔާ ވެނެޒުއޭލާގެ ރައީސް ޖަނަވަރީ މަހު ހައްޔަރުކުރުމަށްފަހު އެމެރިކާއިން ކިއުބާއަށް ހަކަތަ ފޯރުކޮށްދިނުން ހުއްޓާލުމާ ގުޅިގެން ވަރަށް ބޮޑަށް ދަތިތަކާ ކުރިމަތިލާންޖެހިފައެވެ.
އެމެރިކާއިން އެޅި ދަތިކުރުމުގެ ފިޔަވަޅުތަކުގެ ސަބަބުން ކިއުބާއިން ތެލާއި ޑީސަލް ހުސްވެއްޖެ
ފާއިތުވެދިޔަ ދުވަސްތަކުގައި އެމެރިކާ އަދި ކިއުބާގެ ގުޅުންތައް ހީނަރުވެ، ދެޤައުމުގެ ދެމެދުގައި އުފެދިފައިވާ ހީނަރުކަން ވަނީ އިތުރުވެފައެވެ.
