އިޒްރޭލުގެ އިސްތިއުމާރީ ބާރުތަކުން، އިސްތިޢުމާރުކޮށްފައިވާ ޤުދުސްގައި ހުންނަ އަލްއަޤްޞާ މިސްކިތާ އިންވެގެން އޮންނަ ބާބުލް ސިލްސިލާ އަވަށުން ފަލަސްޠީނުގެ ތާރީޚީ 15 އާއި 20 އާ ދެމެދުގެ އަދަދެއްގެ މިލްކިއްޔާތު އަތުލުމުގެ މަޝްރޫއެއް އާދީއްތަ ދުވަހު ފާސްކޮށްފިއެވެ.
ފަލަޞްޠީނުގެ އިންފޮމޭޝަން ސެންޓަރުން ބުނެފައިވާ ގޮތުގައި މިއީ 1968 ވަނަ އަހަރު ނެރެފައިވާ ބިންތައް އަތުލުމުގެ އަމުރެއް ތަންފީޛުކުރުމުގެ ގޮތުން އިޒްރޭލުން ނިންމި ނިންމުމެކެވެ.
ގުދުސްގެ އާއިލާތަކަށް ނިސްބަތްވާ އަދި އައްޔޫބީ، މަމްލޫކް އަދި އުސްމާނީ ދައުރުގެ އިސްލާމީ ވަޤުފުތައް ހިމެނޭ މި މިލްކިއްޔާތުތައް ހަވާލުކުރުމަށް ހަމަޖެހިފައިވަނީ ”ޖެރޫސަލަމް ޖޫއިޝް ކުއާޓާ ޑިވެލޮޕްމަންޓް ކޮމްޕެނީ“ އާއެވެ.
ޤުދުސްގެ ގަވަރްނޮރޭޓުން ސިފަކުރި ގޮތުގައި، މިއީ އަލްއަޤްޞާ މިސްކިތުގެ ވަށައިގެންވާ ސަރަޙައްދުން ފަލަސްޠީނުގެ ރައްޔިތުން ބޭރުކޮށް، އެތަން ހުސްކުރުމަށް ހިންގާ ނިޒާމީ ސިޔާސަތެއްގެ ތެރެއިން ހިންގާ ކަމެކެވެ.
