އައްޑޫ ސިޓީ މީދޫ އަދި ހުޅުދޫ ކައުންސިލް އިދާރާތައް އަލަށް އުފައްދަވައި، އައްޑޫ ސިޓީ ކައުންސިލްގެ އިދާރާގެ އޮނިގަނޑަށް ބަދަލުގެންނަވައި، ހދ. ހިރިމަރަދޫ ކައުންސިލާއި ހުރިހާ އަތޮޅު ކައުންސިލްތަކާއި އެ ކައުންސިލްތަކުގެ އިދާރާތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުވާލައްވައިފިއެވެ.
ރައީސް މުޢިއްޒު މި ބަދަލު ގެންނަވާފައިވަނީ އިއްޔެއިން ފެށިގެންނެވެ.
މިކަމާ ގުޅިގެން ރައީސުލްޖުމްހޫރިއްޔާގެ އޮފީހުން ނެރުނު ދެންނެވުމުގައިވާ ގޮތުން، އައްޑޫ މީދޫ އަދި އައްޑޫ ހުޅުދޫއަށް ވަކި ރަށު ކައުންސިލް އިދާރާތަކެއް އުފައްދަވައިފައެވެ. އަދި ހިތަދޫ، މަރަދޫ، މަރަދޫފޭދޫ އަދި ފޭދޫ ހިމެނޭ ސަރަޙައްދަކީ ”އައްޑޫ ސިޓީ“ ގެ ނަމުގައި ހިންގާ ވަކި އިދާރީ ރަށެއްގެ ގޮތުގައި ކަނޑައަޅުއްވައި، އައްޑޫ ސިޓީ ކައުންސިލްގެ އިދާރާ ވެސް އަލުން ވަނީ ތަރުތީބުކޮށްފައެވެ.
މި ބަދަލާއެކު ރައީސުލްޖުމްހޫރިއްޔާގެ އޮފީހުގެ ނަންބަރު 2026/12 ދެންނެވުމުން ވަނީ ”އައްޑުއަތޮޅު އައްޑޫ މީދޫ ކައުންސިލްގެ އިދާރާ“ އާއި ”އައްޑުއަތޮޅު އައްޑޫ ހުޅުދޫ ކައުންސިލްގެ އިދާރާ“ ގެ ނަން އިނގިރޭސި ބަހުން ބޭނުންކުރާނެ ގޮތް ވެސް އާންމުކޮށްފައެވެ.
އަދި ދައުލަތުގެ އިދާރާތަކުން ލިޔާ ސިޓީގައި ނަންބަރު ޖެހުމުގައި، ”އައްޑު އަތޮޅު އައްޑޫ މީދޫ ކައުންސިލްގެ އިދާރާ“ އަށް ލިޔާ ސިޓީގައި ޖަހަމުން ގެންދަންވާނީ 1140 ކަމަށާއި، ”އައްޑުއަތޮޅު އައްޑޫ ހުޅުދޫ ކައުންސިލްގެ އިދާރާ“އަށް ލިޔުއްވާ ސިޓީގައި ޖަހަމުން ގެންދަންވާނީ 1141 ކަމުގައި ވެސް މި ދެންނެވުމުގައި ވަނީ ހާމަކޮށްފައެވެ.
މީގެ އިތުރުން ހދ. ހިރިމަރަދޫގެ ރައްޔިތުން އެ އަތޮޅު ހަނިމާދޫއަށް ބަދަލުކުރުމަށް ނިންމައި، ހިރިމަރަދޫއަކީ މީހުން ދިރިނޫޅޭ ރަށެއްގެ ގޮތުގައި ރައީސް ކަނޑައަޅުއްވާފައިވާތީ، ހިރިމަރަދޫ ކައުންސިލާއި އެ ކައުންސިލްގެ އިދާރާ ވެސް ވަނީ، އިއްޔެއިން ފެށިގެން އުވާލައިފައެވެ.
