ބޮޑުތަކުރުފާނު މަގު ތަރައްޤީކުރުމުގެ މަސައްކަތް ރައީސް ބައްލަވާލައްވައިފިމާލޭގެ އުތުރުފަރާތުން ބޮޑުތަކުރުފާނުމަގު ޒަމާނީ ފެންވަރަށް ތަރައްޤީ ކުރުމަށް ސަރުކާރުން ކުރިއަށްގެންދާ މަޝްރޫޢުގެ މަސައްކަތްތައް ހިނގަމުންދާގޮތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ބައްލަވާލައްވައިފިއެވެ.
މަގު ހެދުމުގެ މަސައްކަތް ކުރިއަށްދާ ސައިޓަށް ރައީސް ކުރެއްވި މި ޒިޔާރަތުގައި އެމަނިކުފާނުގެ އަރިހުގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ މެނޭޖިންގ ޑިރެކްޓަރ އަޙްމަދު ސަޢުދީއާއި، ޑެޕިއުޓީ މެނޭޖިންގ ޑިރެކްޓަރ ޖަމްޝީދުގެ އިތުރުން އެ ކުންފުނީގެ އިސްވެރިން ބައިވެރިވެވަޑައިގެންނެވިއެވެ. މި ޒިޔާރަތުގައި މަޝްރޫޢުގެ މަސައްކަތް ކުރިއަށްދާ ގޮތުގެ ތަފްސީލީ މަޢުލޫމާތު ކަމާބެހޭ ފަރާތްތަކުން ވަނީ ރައީސްއާއި ހިއްސާކުރައްވާފައެވެ.
ސަރުކާރުން އެމްޓީސީސީއާ ޙަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން މިހާރު ކުރިއަށްދަނީ ފޭސް 1 ގައި ހިމެނޭ ތިން ސެގްމެންޓެއްގެ މަސައްކަތެވެ. މި މަޝްރޫޢުގެ ދަށުން ޖުމްލަ 700 މީޓަރުގެ ސަރަހައްދެއްގައި ތާރުއަޅައި، ކުރިން ނިމިފައިވާ ދެ ސެގްމެންޓުގެ ފަރުމާއާ އެއްގޮތަށް ޒަމާނީ ފެންވަރަށް ތަރައްޤީ ކުރުމަށް ވަނީ ހަމަޖެހިފައެވެ.
އެމްޓީސީސީން މަޢުލޫމާތު ދޭ ގޮތުގައި، މިހާރު މަސައްކަތް ކުރިއަށްދާ ސެގްމެންޓް 1، 2 އަދި 3 ގައި ތާރު އެޅުމަށް ހަމަޖެހިފައިވަނީ ހުރިހާ ސެގްމެންޓެއް އެކީގައެވެ. އަދި އަންނަ ޖޫން މަހުގެ ތެރޭގައި ތާރު އެޅުމުގެ މަސައްކަތް ފެށުމަށް އެ ކުންފުނިން އަންނަނީ ތައްޔާރުވަމުންނެވެ.
His Excellency President Dr. Mohamed Muizzu inspected the progress of the Boduthakurufaanu North Side Road Development Project today, accompanied by our Managing Director, DCP (Retd) Ahmed Saudee, Deputy MD, Mr. Mohamed Jamsheed and senior officials from the Government and MTCC.… pic.twitter.com/LELVXm1I5f
— MTCC Plc (@MTCCPlc) May 18, 2026
މި މަޝްރޫޢުގެ ދަށުން އެންމެ ބޮޑު ބަދަލެއް އަންނާނީ ތިންވަނަ ސެގްމެންޓަށެވެ. އެ ސަރަހައްދުގައި މަގުން ބޭރަށް ބައެއް ހިއްކައިގެން 500 ސައިކަލު ޕާކު ކުރެވޭނެ ބޮޑު ޕާކިންގ ޒޯނެއް ތަރައްޤީ ކުރުމަށް ވަނީ ނިންމާފައެވެ. މި ޕާކިންގ ޒޯނަށްޓަކައި ބަނދަރުގެ ތެރެއިން ގާތްގަނޑަކަށް 98 މީޓަރު ދިގު، 28 މީޓަރު ފުޅާ ސަރަހައްދެއް މިހާރު ވަނީ ހިއްކާ ނިންމާފައެވެ.
ފަހަރަކު ބައެއް ބަންދުކޮށްގެން މަސައްކަތް ކުރިއަށްދާ މި މަޝްރޫޢު އެއްކޮށް ނިންމައި، އަންނަ ޖުލައި މަހުގެ ތެރޭގައި އާންމުންނަށް ހުޅުވާލުމަކީ އެމްޓީސީސީގެ އަމާޒެކެވެ. މި މަޝްރޫޢު ނިމުމުން މާލޭގެ އުތުރުފަރާތުގެ ދަތުރުފަތުރަށާއި ޕާކިންގގެ މައްސަލައަށް ބޮޑު ލުޔެއް ލިބިގެންދާނެއެވެ.
