މި މަހުގެ މުސާރަ އާއެކު، ސަރުކާރުގެ މުވައްޒަފުންނަށް ކުރިއަށް އޮތް ރޯދަ މަހުގެ އިނާޔަތް ފިނޭންސް މިނިސްޓްރީން ޖަމާކޮށްފިއެވެ.
މި އަންނަ މަހުގެ 11 ވަނަ ދުވަހު ރޯދަ މަސް ފެށޭއިރު، ސަރުކާރުގެ މުވައްޒަފުންނަށް އިއްޔެ ރޯދަ އިނާޔަތް ދީފައި މި ވަނީ، ހިނގަމުން މިދާ ފެބްރުއަރީ މަހުގެ މުސާރަ އާއެކު ގައެވެ.
ވަޒީފާ އާ ބެހޭ ޤާނޫނުގައި ބުނެފައި ވަނީ ރޯދަ މަހުގެ ފުރަތަމަ ދުވަހުގެ ކުރިން، ކޮންމެ ދިވެހި މުވައްޒަފަކަށް ރޯދަ އިނާޔަތުގެ ގޮތުގައި މަދުވެގެން 3،000 ރުފިޔާ ދޭން ޖެހޭނެ ކަމަށެވެ. އެ އިނާޔަތް ނުލިބޭ ކަމަށްވާ ނަމަ، ޝަކުވާ ހުށަހަޅަން ޖެހެނީ ލޭބާ ރިލޭޝަންސް އޮތޯރިޓީ (އެލްއާރުއޭ) އަށެވެ.
ސިވިލް ސާވަންޓުންނާއި މިނިވަން މުއައްސަސާތަކުގެ މުވައްޒަފުންނަށް ވެސް ސަރުކާރުން މިހާރު ވަނީ ރޯދަ އެލަވަންސް ދީފައެވެ.
