ބިންވެރިޔާ ސްކީމްގެ ދަށުން މިދިޔަ އެމްޑީޕީ ސަރުކާރުގައި ހުޅުމާލެއިން ހިލޭ ގޯތި ދިނުމުގެ ސަބަބުން، ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އަށް 15 ބިލިއަން ރުފިޔާގެ މާލީ ގެއްލުމަކާ ކުރިމަތިލާން ޖެހިފައިވާ ކަމަށް އޮޑިޓަރ ޖެނެރަލްގެ އޮފީހުން ނެރުނު ރިޕޯޓަކުން ދައްކައިފިއެވެ.
ބިންވެރިޔާ ސްކީމްގެ ދަށުން އެޗްޑީސީގެ މިލްކިއްޔާތުގައިވާ ޖުމްލަ 2،841،400 އަކަފޫޓުގެ ބިން ވަނީ ދޫކޮށްފައެވެ. މި ބިންތައް މާކެޓް ރޭޓުގައި، ވާދަވެރި ބީލަމެއްގެ ދަށުން ވިއްކިނަމަ އެޗްޑީސީއަށް އާމްދަނީގެ ގޮތުގައި 14.85 ބިލިއަން ރުފިޔާ އާއި 15.93 ބިލިއަން ރުފިޔާއާ ދެމެދުގެ އަދަދެއް ލިބޭނެ ކަމަށް އޮޑިޓަރ ޖެނެރަލްގެ އޮފީހުން ވަނީ ލަފާކޮށްފައެވެ.
ބިންވެރިޔާ ސްކީމްގެ ދަށުން ހުޅުމާލެއިން ގޯތި ދޫކުރި ގޮތުގެ ތަފްސީލަށް ބަލައިލާއިރު، ހުޅުމާލެ ދެވަނަ ފިޔަވަހިން 709 ގޯތި ދޫކޮށްފައިވެއެވެ. މިއީ ޖުމުލަ 1،256850 އަކަފޫޓުގެ ބިމެވެ. މި ބިންތައް ހިލޭ ދޫނުކުރި ނަމަ ގާތްގަނޑަކަށް 2.5 ބިލިއަން ރުފިޔާ އެޗްޑީސީއަށް ލިބުނީހެވެ. ހުޅުމާލެ ތިންވަނަ ފިޔަވަހިން 699 ގޯތި ދޫކޮށްފައިވާއިރު މިއީ ގާތްގަނޑަކަށް 1,584,550 އަކަފޫޓުގެ ބިމެވެ. މި ބިންތައް ހިލޭ ދޫނުކުރި ނަމަ އެޗްޑީސީއަށް 8.4 ބިލިއަން ރުފިޔާ ލިބުނީހެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، މިފަދަ އަގުހުރި ބިންތަކެއް އެއްވެސް އަގަކާ ނުލައި އަމިއްލަ ފަރާތްތަކުގެ މިލްކިއްޔާތަށް ބަދަލުކޮށްލުމަކީ ދައުލަތުގެ މާލިއްޔަތަށް މިކަމުގެ ނޭދެވޭ އަސަރުތައް ކުރުވާނެ ކަމެކެވެ. އެއީ މިކަމުގެ ސަބަބުން އެޗްޑީސީއަށް ލިބުނު ގެއްލުން ފޫބެއްދުމަށް ދައުލަތުގެ މާލިއްޔަތުން ބޮޑު ހޭދައެއް ކުރަންޖެހޭތީއެވެ.
އޮޑިޓަރ ޖެނެރަލްގެ އޮފީހުން ނެރެފައިވާ މި ރިޕޯޓުގައި ފާހަގަކޮށްފައިވާ ގޮތުގައި، ބިންވެރިޔާ ސްކީމްގެ ދަށުން ގޯތި ލިބުނު ކޮންމެ މީހަކަށް ދައުލަތުން އެވްރެޖްކޮށް 3.8 މިލިއަން ރުފިޔާ ވަނީ ހަރަދުކޮށްފައެވެ. މިއީ ކަންބޮޑުވާންޖެހޭ މިންވަރެއް ކަމަށް ދާއިރާގެ ތަޖުރިބާކާރުން އަންނަނީ ބުނަމުންނެވެ.
