ވަޠަނީ ޚިދުމަތުގެ ޕްރޮގްރާމުގައި ބައިވެރިވާން ބޭނުންވާ ހުރިހާ ޒުވާނުންނަށް އެ ފުރުޞަތު ފަހިކޮށްދެއްވާނެ ކަމަށް ދިފާޢީ ވަޒީރު ޙަސަން ރަޝީދު ވިދާޅުވެއްޖެއެވެ. ވަޒީރު މިފަދައިން ވިދާޅުވީ ވަޠަނީ ޚިދުމަތުގެ ދެވަނަ ބެޗުގެ ޕްރޮގްރާމު ދަސްވެނިވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، 2024 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ޕްރޮގްރާމް އިޢުލާންކުރެއްވިއިރު، ދަރިވަރުން ތަރުބިއްޔަތުކޮށް، ވަޒީފާ އަދާކުރާ ހަރުދަނާ ބަޔަކަށް ހެދުމުގެ މުހިންމުކަން ފާހަގަކުރެއްވި ކަމަށެވެ. އަދި މިހާރު ފުރަތަމަ ބެޗުގެ ދަރިވަރުން އެ މަގުން ކުރިއަށްދާއިރު، މިއީ ރައީސުލްޖުމްހޫރިއްޔާގެ ބަސްފުޅުގެ އިޚްލާޞްތެރިކަން ހާމަވާ ކަމެއް ކަމަށް ވަޒީރު ފާހަގަކުރެއްވިއެވެ.
ދިވެހި ވަޠަނީ ޚިދުމަތުގެ ޕްރޮގްރާމަކީ ކާމިޔާބު ޕްރޮގްރާމެއްކަން ފާހަގަކުރައްވައި ވަޒީރު ވިދާޅުވީ، ތަމްރީނު ތާވަލުގައިވާ ގޮތުގެ މަތިން މިއަހަރުގެ ބާކީ އޮތް މުއްދަތުގައި 350 ދަރިވަރުންގެ އިތުރު ދެ ބެޗު ކުރިއަށް ގެންދެވޭނެ ކަމަށެވެ.
ނޭޝަނަލް ސަރވިސް އިނީޝިއަލް ޓްރެއިނިންގ ކޯސް-2 ގެ ދަރިވަރުން ދަސްވެނިވެއްޖެ.https://t.co/yzBzRokvFK pic.twitter.com/UyRVWhXXgS
— Maldives National Defence Force (@MNDF_Official) May 17, 2026
ދަސްވެނިވި ދަރިވަރުންނާ މުޚާޠަބުކުރައްވައި ވަޒީރު ވިދާޅުވީ، ބެލެނިވެރިންގެ އުންމީދުތަކުގެ މަތީގައި ދެމިތިބުމާއި، މުޖުތަމަޢުގެ އެންމެން އެކުގައި މަސައްކަތް ކުރުމަކީ ނުހަނު މުހިންމު ކަމެއް ކަމަށެވެ.
”މުޖުތަމަޢުގެ ތެރޭގައި ހިންގާ ނޭދެވޭ ކަންކަމަށް އިޖާބަ ނުދިނުން މުހިންމު. ލިބުނު ތަމްރީނުތަކުގެ ބޭނުން ހިފަން ވާނެ. އަޅުގަނޑު އެދެނީ ހުރިހާ ޒުވާނުންނަށް އުޖާލާ މުސްތަޤުބަލެއް،“ ވަޒީރު ވިދާޅުވިއެވެ.
މި ޕްރޮގްރާމްގެ ތެރެއިން ދަރިވަރުންނަށް ދީނީ، ޢިލްމީ އަދި ޖިސްމާނީ ގޮތުން ތަފާތު ހުނަރުތައް ދަސްކޮށްދެވުނުކަން ވަޒީރު ފާހަގަކުރެއްވިއެވެ. އޭގެ ތެރޭގައި ނަމާދަށް ފަރުވާތެރިވުމާއި، ދުޅަހެޔޮ ޞިއްޙަތެއްގައި ހުރުމަށް ބޭނުންވާ ކަންކަމާއި، އާންމު ދިރިއުޅުމުގެ ޒިންމާތައް އުފުލުމަށް ބޭނުންވާ މުހިންމު ތަރުބިއްޔަތު ހިމެނޭކަމަށް ވިދާޅުވިއެވެ.
ވަޒީރުގެ ވާހަކަފުޅު ނިންމަވާލެއްވީ، އިޓަލީ ފަތުރުވެރިން ހޯދުމުގެ އޮޕަރޭޝަނެއްގައި އުޅެނިކޮށް ނިޔާވި ސާޖަންޓް ފަސްޓް ކްލާސް މުޙައްމަދު މަހުދީގެ ހަނދާން އައުކުރައްވަމުންނެވެ. ވަޒީރު ވަނީ އެއީ މުޅި ޤައުމު ފަޚުރުވެރިވާފަދަ ހިތްވަރުގަދަ ބޭފުޅެއްގެ ގޮތުގައި ސިފަކުރައްވާފައެވެ.
