ފަލަސްޠީނުގެ ޣައްޒާއަށް ޔަހޫދީ އިސްތިޢުމާރީ ބާރުތަކުން ދިން ވަރުގަދަ ވައިގެ ޙަމަލާއެއްގައި، ޣައްޒާގައި ވެރިކަން ކުރާ ޙަމާސް ޖަމާޢަތުގެ އަސްކަރީ ގޮފި ”އަލްޤައްސާމް ބްރިގޭޑުގެ“ އެންމެ މަތީވެރިޔާ ޢިއްޒުއްދީން އަލްޙައްދާދު ޝަހީދުކޮށްލައިފިއެވެ.
ޙަމާސް ޖަމާޢަތުން ހާމަކޮށްފައިވާ ގޮތުގައި، އެ ޖަމާޢަތުގެ އަސްކަރީ ދިފާޢީ ޙަރަކާތްތައް ރޭވުމާއި ހިންގުމުގައި އެންމެ އިސް ދައުރެއް އަދާކުރައްވާ އަލްޙައްދާދު ޝަހީދުކޮށްލާފައިވަނީ މިދިޔަ ހުކުރު ދުވަހު ޣައްޒާގެ މީހުން ދިރިއުޅޭ އިމާރާތަކަށް އަމާޒުކޮށް ޔަހޫދީން ދިން ނިރުބަވެރި ޙަމަލާއެއްގައެވެ. މި ހިތާމަވެރި ޙަމަލާގައި ޙައްދާދީގެ އިތުރުން، އޭނާގެ އަނބިކަނބަލުންނާއި އުމުރުން 19 އަހަރުގެ އަންހެން ދަރިކަލުން ވެސް ވަނީ ޝަހީދުވެފައެވެ.
ހުކުރު ދުވަހު ޣައްޒާގެ ދެ ސަރަޙައްދަކަށް ދިން މި ޙަމަލާތަކުގައި ޖުމްލަ އަށް މީހުން ޝަހީދުވެފައިވާ އިރު، އޭގެ ތެރޭގައި ތިން އަންހެނުންނާއި ކުޑަކުއްޖަކު ވެސް ހިމެނެއެވެ. ޝަހީދުވި ޙައްދާދީގެ ޖަނާޒާ މިދިޔަ ހޮނިހިރު ދުވަހު ޣައްޒާގައި ބާއްވާފައިވާ އިރު، އެތައް ސަތޭކަ ބަޔަކު ވަނީ މި ޖަނާޒާގައި ބައިވެރިވެފައެވެ.
މި ޙަމަލާތައް ދީފައިވަނީ، ޞަހްޔޫނީންނާ ގުޅިގެން އީރާނާ ދެކޮޅަށް އެމެރިކާއިން ފެށި ޣައިރުޤާނޫނީ ހަނގުރާމައިގެ ޙަމަލާތައް ވަގުތީ ގޮތުން މެދުކަނޑައިލި ފަހުން، ޣައްޒާގެ ރައްޔިތުންނާ ދެކޮޅަށް ހިންގާ ޤަތުލުޢާންމު އިތުރަށް ފުޅާކޮށްފައިވާ ދަނޑިވަޅެއްގައެވެ. ޣައްޒާގެ ޤަތުލުޢާންމު ހުއްޓައިލާފައިވާ ކަމަށް އޮކްޓޫބަރު މަހު ޔަހޫދީން ބުނި ނަމަވެސް، ޣައްޒާގެ ދެބައިކުޅަ އެއްބަޔަށްވުރެ ބޮޑު ސަރަޙައްދެއް އަދިވެސް އޮތީ ޔަހޫދީ ފައުޖުގެ ބާރުގެ ދަށުގައެވެ. އަދި އެ ސަރަޙައްދުތަކުގައި ހުރި ފަލަސްޠީނުގެ ރައްޔިތުންގެ ގެދޮރާއި އިމާރާތްތައް ޔަހޫދީ ސިފައިން ދަނީ މެދުނުކެނޑި ސުންނާފަތިކޮށް ބިމާ ހަމަކުރަމުންނެވެ.
އެމެރިކާއާއި ޤަޠަރު މެދުވެރިވެގެން ވެފައިވާ އެއްބަސްވުމެއްގެ ދަށުން ޙަމަލާތައް މަޑުޖައްސައިލާފައިވާ ކަމަށް ދެއްކި ނަމަވެސް، އެ އެއްބަސްވުމަށް އަމަލުކުރަން ފެށި ފަހުން ވެސް ޔަހޫދީންގެ އަނިޔާވެރިކަމުގައި ޣައްޒާއިން 850 އަށްވުރެ ގިނަ މީހުން މިހާތަނަށް ވަނީ ޝަހީދުކޮށްލާފައެވެ.
