މެއި 13 ވީ ބުދަ ދުވަހުގެ ރޭ މާލޭގައި ކުރިއަށްދިޔަ އެއްވުމެއްގެ ތެރެއިން ފުލުހުންގެ ގާނޫނީ ވާޖިބަށް ހުރަސްއަޅައި، އަމުރަށް ނުކިޔަމަންތެރިވި ކަމުގެ ތުހުމަތުގައި ހައްޔަރުކުރި 9 މީހުންގެ ތެރެއިން ދެ މީހަކު ފިޔަވައި އެންމެން ދޫކޮށްލައިފިއެވެ.
މި މައްސަލައިގައި ފުލުހުންގެ ބެލުމުގެ ދަށަށް ގެނެސްފައިވަނީ ހަތް ފިރިހެނުންނާއި ދެ އަންހެނުންނެވެ. އެ މީހުން ހައްޔަރުކުރީ އެއްވުމުގެ ތެރެއިން ފުލުހުންގެ ދައުރަށް ހުރަސްއަޅައި، ފުލުހުން ކުރި އަމުރުތަކަށް ތާބީ ނުވުމުގެ ސަބަބުން ކަމަށް ފުލުހުން މައުލޫމާތު ދީފައިވެއެވެ.
ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އޭގެ ތެރެއިން ހަ މީހަކު ވަނީ ވަގުތުން ދޫކޮށްލާފައެވެ. އޭގެ ތެރޭގައި ހިމެނެނީ ހައްޔަރުކުރި ދެ އަންހެނުންނާއި ހަތަރު ފިރިހެނުންނެވެ. ބާކީ ތިބި ތިން މީހުންގެ ބަންދަށް ކޯޓުން މުއްދަތު ޖަހާފައިވެއެވެ.
ކޯޓުން މުއްދަތު ޖެހި ތިން މީހުންގެ ތެރެއިން އެކަކަށް 3 ދުވަސް، އެކަކަށް 5 ދުވަސް އަދި އަނެއް މީހާއަށް 10 ދުވަހުގެ ބަންދުގެ މުއްދަތެއް ދީފައިވެއެވެ. ނަމަވެސް، 3 ދުވަހުގެ މުއްދަތަށް ބަންދުކުރަން އަމުރުކުރި މީހާގެ ބަންދުގެ މުއްދަތު ހަމަވުމުން، އޭނާވެސް މިހާރު ވަނީ ދޫކޮށްލާފައެވެ. އެހެންކަމުން މި މައްސަލައިގައި މިހާރު ފުލުހުންގެ ބަންދުގައި ތިބީ ދެ މީހުންނެވެ.
މި މައްސަލަ ދިވެހި ފުލުހުންގެ ހިދުމަތުން އިތުރަށް ތަހުގީގު ކުރަމުންދާ ކަމަށް އެ މުއައްސަސާއިން ވަނީ ބުނެފައެވެ.
