އެޕޯލޯ ކުންފުނިން ހުޅުމާލޭގައި ތަރައްޤީ ކުރަމުން އަންނަ ނުވަ އެޕާޓްމަންޓް ކޮމްޕްލެކްސްއަށް ބޭނުންވާ ލިފްޓު ސަޕްލައިކުރަން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާ ހަވާލުކޮށްފިއެވެ.
އެޕޯލޯގެ ނުވަ ޓަވަރަށް ބޭނުންވާ 46 ލިފްޓް ސަޕްލައިކޮށް، އިންސްޓޯލް ކުރުމަށް އިއްޔެ ވި މި އެއްބަސްވުމުގެ ދަށުން، އެ ކުންފުނިން ތަރައްޤީ ކުރާ ފުރަތަމަ ދެ ޓަވަރަށް މި އަހަރުގެ ތެރޭގައި ލިފްޓު ސަޕްލައިކޮށް، އިންސްޓޯލް ކުރެވޭނެ ކަމަށް އެސްޓީއޯއިން ބުނެއެވެ. އެސްޓީއޯއިން ބުނެފައި ވަނީ މި އެއްބަސްވުމުގައި ހިމެނޭގޮތުން ކޮންމެ ޓަވަރެއްގައިވެސް މަދުވެގެން ޖުމްލަ ފަސް ލިފްޓު ހަރުކުރެވިގެން ދާނެ ކަމަށެވެ.
ލިފްޓު މާކެޓުގައި މިހާރު ރާއްޖޭގައި އެންމެ މަޤުބޫލު އެއް ލިފްޓު ބްރޭންޑް ކަމަށްވާ ”ކޯނޭ“ ގެ ރާއްޖޭގެ ޑިސްޓްރިބިއުޓަރަކީ އެސްޓީއޯއެވެ. އެޕޯލޯ ޓަވަރުތަކުގައި ހަރުކުރެވިގެންދާ ”ކޯނޭ“ ލިފްޓުތައް ވެގެން ދާނީ އެންމެ ޒަމާނީ އަދި ޓެކްނޮލޮޖީގެ ގޮތުން އެންމެ ކުރިއަރާފައިވާ ފީޗާތައް ހިމެނިގެންދާނެ ލިފްޓުތަކަށް ކަމަށް އެސްޓީއޯއިން ބުނެއެވެ.
އެސްޓީއޯއިން ވަނީ މީގެ ކުރިންވެސް ރާއްޖޭގެ ރިއަލް އެސްޓޭޓް މާކެޓުގައި ހިމެނޭ ބޮޑެތި ޕްރޮޖެކްޓް ތަކެއްގައި ”ކޯނޭ“ ލިފްޓު ހަރުކޮށްދީފައެވެ.
ކޯނޭ ބްރޭންޑަކީ ދުނިޔޭގައި ލިފްޓާއި އެސްކެލޭޓަރ އިންޑަސްޓްރީގެ ވިދުންގަދަ އެއް ނަމެވެ. ”މެޝިންރޫމްލެސް“ ލިފްޓު ދުނިޔެއަށް ތަޢާރަފު ކުރީ މި ބްރޭންޑުންނެވެ. މިކަން ވެގެން ދިޔައީ ލިފްޓު ޓެކްނޮލޮޖީއަށް އައި އިންޤިލާބީ ބަދަލަކަށެވެ.
