ސަރުކާރުގެ ދަރަނި ދެއްކުމަށްޓަކައި ބޭންކް އޮފް މޯލްޑިވްސް (ބީއެމްއެލް) ގައި ހުރި ކަސްޓަމަރުންގެ ޑޮލަރު ދޫކޮށްފައި ނުވާނެކަމުގެ ޔަޤީންކަން އެ ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ދެއްވައިފިއެވެ.
ޕީއެސްއެމް ނިއުސްގެ ”ރާއްޖެ މިއަދު“ ޕްރޮގްރާމްގައި ވާހަކަދައްކަވަމުން ބީއެމްއެލްގެ ސީއީއޯ ވިދާޅުވީ، ސަރުކާރުން ދަރަނި ދައްކަނީ ކަސްޓަމަރުން ބޭންކުގައި ޖަމާކޮށްފައިވާ ފައިސާއިން ކަމަށް ބައެއް ފަރާތްތަކުން ކުރާ ތުހުމަތުތަކަކީ ހަޤީގަތާ ޚިލާފު ވާހަކަތަކެއް ކަމަށެވެ. އަދި ބޭންކުގައި ހުރި ކަސްޓަމަރުންގެ ޑިޕޮސިޓްތައް ރައްކާތެރިކުރުމަކީ ބޭންކުން އެންމެ އިސްކަންދޭ ކަންތައް ކަމުގައި އޭނާ ފާހަގަކުރެއްވިއެވެ.
ޝަރީފް ވިދާޅުވި ގޮތުގައި، ބޭންކުގެ ޑިޕޮސިޓްގެ ގާތްގަނޑަކަށް 70 އިންސައްތަ ހުރީ ލޯނުގެ ގޮތުގައި ދޫކޮށްފައެވެ. އޭގެ ތެރެއިންވެސް އެންމެ ބޮޑު އަދަދެއް ދޫކޮށްފައިވަނީ ފަތުރުވެރިކަމުގެ ސިނާޢަތަށެވެ. އެގޮތުން ޓޫރިޒަމް ސެކްޓަރަށް ދޫކޮށްފައިވާ ޑޮލަރު ލޯނު ޕޯޓްފޯލިއޯ 600 މިލިޔަން ޑޮލަރާ ގާތްކުރާއިރު، މިއަހަރުގެ ފުރަތަމަ ކުއާޓަރުގައި އެކަނިވެސް 35 މިލިޔަން ޑޮލަރު އަލަށް ދޫކޮށްފައިވާ ކަމަށް އޭނާ ވިދާޅުވިއެވެ.
”އަޅުގަނޑު ޔަޤީންކަން ދޭން ބޭނުން އަޅުގަނޑުމެންގެ ބޭންކް ހިންގަމުން މިދަނީ ބޭންކިން އުސޫލުތަކާއި އެއްގޮތްވާގޮތުގެ މަތިން ކަސްޓަމަރުންގެ ޑިޕޮސިޓް ރައްކާތެރިކޮށްގެން. ޑިޕޮސިޓް އަޅުގަނޑުމެން މިކުރާ ކަމަކީ އަމިއްލަ ފަރާތްތަކަށް ލޯނު ދޫކުރުން އެންމެ ބޮޑަށް އަޅުގަނޑުމެން ޑޮލަރު ލޯނު ދޫކުރެވިފައިވާނީ ފަތުރުވެރިކަމުގެ ސިނާޢަތަށް. ފަތުރުވެރިކަމުގެ ސިނާޢަތަށް ގާތްގަނޑަކަށް 600 މިލިޔަން ޑޮލަރާއި ކައިކުރާ އަދަދަކަށް އަޅުގަނޑުމެންގެ ޑޮލަރު ލޯނު ޕޯޓްފޯލިއޯ މިހާރު ޑޮލަރުން އެބަހުރި ޓޫރިޒަމް ސެކްޓަރއަށް. މިއަހަރުގެ ފުރަތަމަ ކުއާޓަރގެ ތެރޭގައިވެސް އަޅުގަނޑުމެން 35 މިލިޔަން ޑޮލަރު އަލަށްވެސް ދޫކުރިން. އަދިވެސް އަޅުގަނޑުމެން މިދަނީ ޓޫރިޒަމް ސެކްޓަރއަށް އިންވެސްކުރަމުން.“ ބީއެމްއެލްގެ ސީއީއޯ ވިދާޅުވިއެވެ.
ސަރުކާރުން ހާމަކޮށްފައިވާ ގޮތުގައި، ވޭތުވެދިޔަ 40 ދުވަހުގެ ތެރޭގައި ސުކޫކާއި، ސްވޮޕް އަދި ލޯނުތައް ހިމެނޭހެން ޖުމްލަ 974 މިލިޔަން ޑޮލަރު ވަނީ ދައްކާ ޚަލާސްކޮށްފައެވެ. މީގެ ތެރޭގައި 2021 ވަނަ އަހަރު ދޫކުރި 500 މިލިޔަން ޑޮލަރުގެ ސުކޫކުވެސް ހިމެނެއެވެ.
މާލީ ވުޒާރާއިން މައުލޫމާތު ދޭ ގޮތުގައި، މި ދަރަނިތައް ދެއްކުމުގައި ސަރުކާރުން ބޭނުންކޮށްފައިވަނީ ސޮވެރިން ޑިވެލޮޕްމަންޓް ފަންޑު (އެސްޑީއެފް) އާއި ދައުލަތުގެ ރިޒާވްގައި ހުރި ފައިސާއެވެ. ސަރުކާރުގެ ހަރުދަނާ މާލީ ސިޔާސަތުތަކުގެ ސަބަބުން، އެސްޑީއެފްގެ ބޭރު ފައިސާގެ ބެލެންސް ފުރަތަމަ ފަހަރަށް 350 މިލިޔަން ޑޮލަރަށްވުރެ އިތުރުވެފައިވާއިރު، މިއަހަރުގެ މާރިޗު މަސް ނިމުނުއިރު ރާއްޖޭގެ ރަސްމީ ރިޒާވް ވަނީ ރެކޯޑް މިންވަރެއް ކަމަށްވާ 1.3 ބިލިޔަން ޑޮލަރަށް އަރާފައެވެ.
ބޭންކް ހިންގަމުންދަނީ ބައިނަލްއަގުވާމީ ބޭންކިންގ އުސޫލުތަކާ އެއްގޮތަށް ކަސްޓަމަރުންގެ ފައިސާގެ ރައްކާތެރިކަން ކަށަވަރުކޮށްގެން ކަމަށާއި، ސަރުކާރަށް ލޯނު ދިނުމަށް އެއްވެސް ވަރަކަށް ކަސްޓަމަރުންގެ ޑޮލަރު ބޭނުންކޮށްފައި ނުވާނެ ކަމަށް ބީއެމްއެލްގެ ސީއީއޯ ތަކުރާރުކޮށް ވިދާޅުވިއެވެ.
