ސިޓީ ކައުންސިލްތަކާއި ރަށު ކައުންސިލްތަކުގެ އިތުރުން އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކަށް އަލަށް އިންތިޚާބުވި މެންބަރުން މަގާމުގެ ހުވާކޮށްފިއެވެ.
ލޯކަލް ގަވަރމަންޓް އޮތޯރިޓީ (އެލްޖީއޭ) އިން މައުލޫމާތު ދީފައިވާ ގޮތުގައި، ސިޓީ ކައުންސިލްތަކާއި ރަށު ކައުންސިލްތަކަށް ޖުމުލަ 678 މެންބަރުން އިންތިޚާބު ކުރަންޖެހެއެވެ. ނަމަވެސް އިންތިޚާބު ކުރެވިފައިވަނީ 677 މެންބަރުން ކަމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން ވަނީ ބުނެފައެވެ. އެއީ ދ. މީދޫ ކައުންސިލްގެ ރައީސެވެ.
ކައުންސިލްތަކަށް އަލަށް އިންތިޚާބުވި 677 މެންބަރުންގެ ތެރެއިން މިއަދު ހުވާ ކުރުމަށް ހަމަޖެހިފައިވަނީ 676 މެންބަރުންނެވެ.
މީގެ އިތުރުން އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ މެންބަރުންގެ ގޮތުގައި ވެސް 678 މެންބަރަކު އިންތިޚާބު ކުރަން ޖެހޭއިރު މިހާތަނަށް އިންތިޚާބު ކުރެވިފައިވަނީ 673 މެންބަރުންނެވެ. އޭގެ ތެރެއިން މިއަދު ހުވާ ކުރުމަށް ހަމަޖެހިފައިވަނީ 662 މެންބަރުންނެވެ. އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ 11 މެންބަރުން މިއަދު ހުވާ ނުކުރާ ސަބަބެއް އެލްޖީއޭއިން ހާމަކޮށްފައެއް ނުވެއެވެ.
އެލްޖީއޭއިން ބުނީ ކުރިއަށް އޮތް ދުވަސްތަކުގައި މިހާރު އިންތިޚާބު ނުކުރެވޭ މީދޫ ކައުންސިލްގެ ރައީސާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކަށް އިންތިޚާބު ކުރަންޖެހޭ ފަސް މެންބަރުން ހޮވުމަށް އިންތިޚާބު ބޭއްވުމަށް އީސީން ތައްޔާރުވަމުން އަންނަ ކަމަށެވެ.
