ވ. އަތޮޅު ކައިރިއަށް ޑައިވިންގއަށް ގޮސް އުޅެނިކޮށް ގެއްލުނު އިޓަލީއަށް ނިސްބަތްވާ ހަތަރު ފަތުރުވެރިން ހޯދުމުގެ އޮޕަރޭޝަނުގައި އެ ސަރަހައްދަށް ޑައިވިންގއަށް ފޭބި އެމްއެންޑީއެފްގެ ޑައިވަރަކު ޑީކޯވެގެން ފަރުވާދެމުން އަންނަނިކޮށް ނިޔާވެއްޖެއެވެ.
އޭނާއަށް ފަރުވާ ދެމުންދިޔައީ އޭޑީކޭ ހޮސްޕިޓަލުގައެވެ.
ހުސްވި ބުރާސްފަތި ދުވަހު ޑައިވިންގއަށް ފޭބި ފަސް ފަތުރުވެރިން ގެއްލިގެން ހޯދަމުން ދަނިކޮށް އޭގެތެރެއިން އެކަކު ވަނީ މަރުވެފައި އޮއްވާ ފެނިފައެވެ. ބާކީ ހަތަރު ފަތުރުވެރިން ހޯދުމަށް އެމްއެންޑީއެފުން ވަނީ ފުޅާ ސާޗް އެންޑް ރެސްކިއު އޮޕަރޭޝަނެއް ވެސް ފަށައިފައެވެ. އެ މީހާގެ ހަށިގަނޑު ފެނިފައިވަނީ ބުރާސްފަތި ދުވަހުގެ އިރުއޮއްސި 18:13 ހާއިރު، 60 މީޓަރު އަޑީގައި ހޮހަޅައެއްގެ ތެރެއިންނެވެ.
މި މައްސަލައާ ގުޅިގެން އެ ފަތުރުވެރިން ޑައިވިންގއަށް ދިޔަ ސަފާރީގެ ލައިސެންސް ވެސް މިހާރު ވަނީ ސަސްޕެންޑްކޮށްފައެވެ.
