ކުރީގެ ތިން ރައީސުން ކަމަށްވާ, މުޙައްމަދު ނަޝީދާއި، ޢަބްދުﷲ ޔާމީން ޢަބްދުލްޤައްޔޫމް އަދި އިބްރާހިމް މުޙައްމަދު ޞާލިޙް ގުޅިވަޑައިގެން ނެރުއްވި ބަޔާނަށް، ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީ ޕާލިމަންޓްރީ ގްރޫޕްގެ ލީޑަރު އިބްރާހިމް ފަލާހު ވަރަށް ބޮޑަށް ފާޑުވިދާޅުވެއްޖެއެވެ.
ފަލާހު ވިދާޅުވީ އެ ތިން ބޭފުޅުންނަކީ ވެސް ލަދުހަޔާތުގެ ކަންފުޅެއް ނެތް ބޭފުޅުން ކަމަށާއި، ނޫސްވެރިކަމުގެ މިނިވަންކަމަށް މަސައްކަތް ކުރާށޭ ކިޔާފައި ބޭއްވި ނޫސްވެރިންގެ ބައްދަލުވުމުގައި ވެސް ފެނިގެންދިޔައީ ނޫސްވެރިންނަށް ސުވާލު ކުރަން ޖެހުނީ އެ ބޭފުޅުން އެދޭ ގޮތަށް ކަމަށެވެ. އެ ނޫން ގޮތަކަށް ސުވާލު ކުރުމުން ހުއްޓުވާލާފައިވާ ކަމަށް އޭނާ ފާހަގަކުރެއްވިއެވެ.
ތިން ރައީސުންގެ ވެރިކަމުގައި ހިނގާފައިވާ ކަންކަމަށް އަލިއަޅުވާލައްވަމުން ފަލާހު ވިދާޅުވީ، ރައީސް ޔާމީންގެ ވެރިކަމުގައި ނޫސްވެރިޔާ ރިލްވާނާއި ޔާމީން ރަޝީދު މަރާލި ވާހަކަ ދެއްކުމުން ގޯސްވި ކަމަށާއި، ރައީސް ޞާލިޙްގެ ވެރިކަމުގައި އެ މަރުތަކުގެ ތަހުގީގު ނުކުރި ވާހަކަ ބުނުމުން ވެސް ގޯސްވި ކަމަށެވެ. އަދި ރައީސް ނަޝީދުގެ ދުވަސްވަރު ޢަބްދުﷲ ގާޒީ ހައްޔަރުކުރި ވާހަކަ ދެއްކުމަކީ ވެސް އެ ބޭފުޅުންނަށް ގޯސް ކަމަކަށް ވީއިރު، ދެން އެ ބޭފުޅުންނަށް ގައުމަށް ހޯދައިދެވޭނީ ކޮން މިނިވަންކަމެއްތޯ އޭނާ ސުވާލު އުފެއްދެވިއެވެ.
އެ ތިން ބޭފުޅުން އެއްބަސްވެވަޑައިގެންނެވި ލިޔުމުގައި ޝަރުޢީ ދާއިރާއާއި މަޖިލީހުގެ މިނިވަންކަމާއި، އިގްތިސާދީ ހާލަތު ރަނގަޅުކުރުމާއި ކޮރަޕްޝަން ނައްތާލުމުގެ ވާހަކަ އޮތުމުން ހިނި އަންނަ ކަމަށް ފަލާހު ވިދާޅުވިއެވެ. އޭނާ ވަނީ ކޮންމެ ބޭފުޅެއްގެ ވެރިކަމުގައި ހިންގާފައިވާ ކަންކަން ތަފްސީލުކޮށް ދެއްވާފައެވެ.
ރައީސް ނަޝީދަށް އަމާޒުކުރައްވައި ފަލާހު ވިދާޅުވީ، ގާޒީއަކު ”ވަގަށް ނަގައިގެން“ ޖަލަށްލައި، ކޯޓުތަކުގައި ތަޅުއަޅުވައި، ކޯޓުތައް އަންދާލީ އެމަނިކުފާނުގެ ވެރިކަމުގައި ކަމަށެވެ. އަދި ރަހުމަތްތެރިންނަށް ފަޅުރަށްތައް ބަހާލުމާއި، އެމްއެންބީސީ އާއި ސާކް ސަމިޓްގެ ވައްކަންތައް ފެންނަން ހުރި ކަމަށް ވިދާޅުވިއެވެ.
ލަދު ޙަޔާތުގެ ކަންފުޅެއްވެސް ނެތް ތިން ބޭފުޅުން. ނޫސްވެރިކަމުގެ މިނިވަންކަމަށް މަސައްކަތް ކުރާށޭ ކިޔާ ބޭއްވި ނޫސް ކޮންފަރެންސްގަ ވެސް ނޫސްވެރިން ސުވާލު ކުރަންޖެހުނީ މި ބޭފުޅުން އެދޭގޮތަށް. އެހެން ނޫނީ ހުއްޓުވާލީ. ޔާމީން ވެރިކަމުގައި ނޫސްވެރިޔާ ރިލްވާނާއި ޔާމީން މަރާލި ވާހަކަ… pic.twitter.com/5EpkaARiua
— Ibrahim Falah (@IbrahimFalahR) May 15, 2026
ރައީސް ޔާމީނާ ގުޅޭގޮތުން ވިދާޅުވީ، ކޯޓުގެ ޓިނު ނަގައި ގާޒީންނަށް ބިރުދައްކައި، ދައުލަތުން ވައްކަން ކުރި ކަމަށެވެ. އަދި 12 މެންބަރުން ވަކިކޮށް މަޖިލިސް ހިސޯރުކޮށް، ނޫސްވެރިންގެ އަނގަމަތީގައި ”ޓޭޕް“ އެޅުވި ކަމަށާއި، އަމިއްލަ ބޭބޭފުޅު ހިމެނޭހެން އެތައް ބަޔަކު ނުހައްގުން ޖަލަށްލައި އަނިޔާކުރި ކަމަށް ފަލާހު ތުހުމަތު ކުރެއްވިއެވެ.
ކުރީގެ ރައީސް ޞާލިޙްގެ ވެރިކަމާ ގުޅޭގޮތުން ފަލާހު ވިދާޅުވީ، ގައުމު 60 ބިލިއަން ރުފިޔާއިން ދަރުވާލައި، ދަރަނި ދަންތުރައެއްގައި ޖެއްސީ އެމަނިކުފާނު ކަމަށެވެ. އަދި ”ނޭވާހޮޅިން ވައްކަން“ ކުރުމާއި، ބަދަލުގެ ގޮތުގައި 2 ބިލިއަން ރުފިޔާގެ ވައްކަން ހިންގައި، ނޫސްވެރިންގެ މަސްދަރު ހާމަކުރަން މަޖުބޫރުކުރި ކަމަށް ވިދާޅުވިއެވެ. މީގެ އިތުރުން ސުޕްރީމް ކޯޓުގެ ބެންޗާއި ހައިކޯޓުގެ ގާޒީން ވަކިކޮށް، ރާއްޖޭގެ ދެކުނު ކަނޑުން ބައެއް ”ވިއްކާލައި“ ފޯޅަވަހި ދޫކޮށްލީ ވެސް އެ ވެރިކަމުގައި ކަމަށް އޭނާ ވިދާޅުވިއެވެ.
”މިއީ ވެރިކަމުގެ އާރާއި ބާރު ލިބުމުން ކަންކުރި ގޮތުގެ ކުޑަ މިންވަރެއް. ދެން މި މީހުން ގައުމާއި ރައްޔިތުންނަށް ހެއު އެދޭނެ މިންވަރު ވިސްނާލައްވާ. އޮތީ ހުސް އަމިއްލަ އެދުން،“ ފަލާހު ވިދާޅުވިއެވެ.
