އެމްޑީޕީއަކީ ”ލާދީނީ“ ފިކުރެއް ކަމަށް މީގެ ކުރިން ވިދާޅުވުމަށްފަހު، އެ ޕާޓީއާއެކު ކޯލިޝަން ހެދުމަށް ނިންމެވުމުން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް ގިނަ ބައެއްގެ ފާޑުކިޔުން އަމާޒުވެއްޖެއެވެ.
”ނޫސްވެރިންގެ ހައްގުތައް ހޯދައިދިނުމަށް“ ކަމަށް ވިދާޅުވެ ކުރީގެ ތިން ރައީސުން ކަމަށްވާ މުޙައްމަދު ނަޝީދާއި، ޢަބްދުﷲ ޔާމީން ޢަބްދުލްޤައްޔޫމްގެ އިތުރުން އިބްރާހިމް މުޙައްމަދު ޞާލިޙު ވަނީ ސަރުކާރާ ދެކޮޅަށް މަސައްކަތް ކުރެއްވުމަށް ކޯލިޝަން ހައްދަވައިފައެވެ. ރައީސް ޔާމީންގެ މި ނިންމެވުމުގެ ސަބަބުން، އެމަނިކުފާނަށް ތާއީދުކުރައްވާ ގިނަ ބަޔަކު ވަނީ އެކަމާ ނުރުހުން ފާޅުކޮށް އެމަނިކުފާނަށް ކުރަމުން އައި ތާއީދު އަނބުރާ ގެނެސްފައެވެ.
ރައީސް ޔާމީންގެ މި ނިންމެވުމާއެކު މީސް މީޑިއާގައި ގިނަ ބަޔަކު ވަނީ އެމަނިކުފާނަކީ ގައްދާރެއް ކަމަށް ސިފަކޮށް އެމަނިކުފާނުގެ އިހުލާސްތެރިކަމާ މެދު ސުވާލު އުފައްދައިފައެވެ. މީގެ ކުރިން ރައީސް ޔާމީން ވިދާޅުވަމުން ގެންދެވީ އެމްޑީޕީއަކީ އިންޑިޔާއަށް ގައުމު ވިއްކާލި ބައެއް ކަމަށާއި އެ ޕާޓީއާއި އެކު ހަދާނެ ކޯލިޝަނެއް ވެސް ނޯންނާނެ ކަމަށެވެ.
ނަމަވެސް ޔާމީންގެ މި ނިންމެވުމާ ގުޅިގެން އެމަނިކުފާނުގެ ސަޕޯޓަރަކު ވަނީ ޔާމީނަކީ ބުނާ ބަހުގެ އިތުބާރު ނެތް ބޭފުޅެއް ކަމަށް ސިފަކޮށް، ސަރުކާރު ހިންގާ ޕާޓީ ޕީއެންސީއަށް ސޮއިކުރަން ނިންމައިފައެވެ.
”ދުވަހަކު ވެސް ހީނުކުރަން ރައީސް ޔާމީން މިހާ ދަށު ދަރަޖައަކަށް ވެއްޓިދާނެއެކޭ، އެމަނިކުފާނަށް އެންމެ ބޮޑަށް އަނިޔާދިން މީހުންނާއެކު ކޯލިޝަން ހަދައި އެ މީހުންނާ އެއްސުފުރާއަކުން އިންސާފުކުރެއްވިއިރު އެމަނިކުފާނުގެ ހައްގުގައި އެންމެ ބުރަކޮށް މަސައްކަތް ކުރި މީހުންގެ މަތިން އެމަނިކުފާނު ހަނދާން މިއަދު އެ ނައްތާލީ، އަސްލު ހަގީގަތުގައި ޕީޕީއެމްއިން ވެސް ވަކިވީ ރައީސް މުޢިއްޒު ގޯސް ވެގެނެއް ނޫން، ރައީސް ޔާމީނަކީ ވަރަށް އީގޯ ބޮޑު ބޭފުޅެއް، ތާއީދުކުރިއަސް ހަގީގަތް ވާނީ ހަގީގަތަށް އެހެންނުން،“ – ޔާމީންގެ ސަޕޯޓަރަކު ބުންޏެވެ.
ސިޔާސީ މަސައްކަތްތައް އެކުގައި ކުރައްވަން ކުރީގެ ތިން ރައީސުން ނިންމަވާފައިވާ މި ދަނޑިވަޅުގައި، މާޒީގެ ސަފުހާތަކަށް ނަޒަރު ހިންގާލުމަކީ ވަރަށް މުހިއްމު ކަމެކެވެ. އެގޮތުން މި ތިން ރައީސުންނަކީ އެއް ބޭފުޅަކު އަނެއް ބޭފުޅަކު ޖަލަށްލައި، އެއް ބޭފުޅަކު އަނެއް ބޭފުޅަކަށް އެކި ކަހަލަ ސީރިއަސް ތުހުމަތުތަކެއް ކުރެއްވި ބޭފުޅުންކަން ފާހަގަކޮށްލަންޖެހެއެވެ.
