ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ އަރިސް ބޭފުޅެއް ކަމަށްވާ ޑރ. މުޙައްމަދު ޖަމީލު އަޙްމަދު ނޫސްވެރިޔަކަށް ފުރައްސާރަ ކުރި މައްސަލައެއް ފެންމަތިވެއްޖެއެވެ.
މި ހާދިސާ ހިނގާފައިވަނީ ކުރީގެ ތިން ރައީސުން ކަމަށްވާ މުޙައްމަދު ނަޝީދާއި، ޢަބްދުﷲ ޔާމީން ޢަބްދުލްޤައްޔޫމްގެ އިތުރުން އިބްރާހިމް މުޙައްމަދު ޞާލިޙު، ”ނޫސްވެރިންގެ ހައްގުތައް ހޯދައިދިނުމަށް“ ކަމަށް ވިދާޅުވެ، މަސައްކަތް ކުރައްވަން ނިންމަވައި އެކަމާ ގުޅޭގޮތުން މައުލޫމާތު ދެއްވުމަށް ރޭ ކުރިއަށްގެންދިޔަ ނޫސްވެރިންގެ ބައްދަލުވުމުގެ ތެރެއިންނެވެ. ޑރ. ޖަމީލުގެ ފުރައްސާރައާ ކުރިމަތިވެފައިވަނީ ”އެކި އެމްވީ“ ގެ ނޫސްވެރިއަކަށެވެ.
އެގޮތުން ކުރީގެ ރައީސް ޔާމީނަށް އަމާޒުކޮށް ދެ ސުވާލެއް ކޮށްލަން ބޭނުން ކަމަށް ބުނެ އެ ނޫސްވެރިޔާ ވަނީ ޔާމީނަށް ޖަވާބުދޭން އުނދަގޫވާނެ ފަދަ ސުވާލެއް އެމަނިކުފާނާ ކުރިމަތިކޮށްފައެވެ. އެ ނޫސްވެރިޔާ ޔާމީނަށް ކުރިމަތި ކުރި ސުވާލަކީ، ”މި ހުރިހާ ދުވަހު ރައީސް ޔާމީން ރައްޔިތުން ގާތު ވިދާޅުވަމުން ގެންދެވީ މަނިކުފާނަކީ ގައުމީ ފިކުރަށް މަސައްކަތް ކުރައްވާ ބޭފުޅެއް ކަމަށް، އަދި އެމްޑީޕީއަކީ ގައުމަށް ގައްދާރުވީ ޕާޓީއެއް ކަމަށާއި ގައުމު އަޅުވެތި ކުރި ބައެއް ކަމަށް، އަދި އެމްޑީޕީން އިންޑިއާއަށް ގައުމު ވިއްކާލި ކަމަށް ވެސް ވިދާޅުވެފައިވޭ، އެ ދުވަހު މަނިކުފާނު ހެއްދެވީ އިތުރުފުޅެއްތޯ؟ ނުވަތަ އިންޑިއާގެ އަޅުވެތި ކަމަށް ގައުމު ދުއްވާލުމުގައި މަނިކުފާނުގެ ހިއްސާއެއް އޮތީތޯ؟ އެހެންވީމަ މިރެއިން ފެށިގެން ރައީސް ޔާމީނަކީ ގައްދާރެއް ކަމަށް އަޅުގަނޑުމެންނަށް ބުނެވިދާނެތޯ؟.
މި ސުވާލަށްފަހު، ނޫސްވެރިޔާ އިތުރަށް ކޮށްފާނެ ސުވާލަކާ މެދު ބިރުން އެތަނުގައި ތިބި ފަރާތްތަކުގެ ތެރެއިން މުޙައްމަދު ޒިޔާދު (ޒިޔައްޓޭ) ވަނީ ބާރުގެ ބޭނުންކޮށް ނޫސްވެރިޔާގެ ގައިގައި ގަދަކަމުން އަތްލައި، މައިކު އަތުލައިފައެވެ. މި މަންޒަރު ވަނީ ލައިވްކޮށް ބްރޯޑްކާސްޓް ވެސް ކޮށްފައެވެ. ޖަމީލާއި ޒިޔައްޓޭގެ އަމަލުތައް ހުރި ގޮތުގެ ސަބަބުން ގިނަ ބައެއްގެ ނުރުހުން އެ ދެމީހުންނަށް އަމާޒުވެފައިވާއިރު، ނޫސްވެރިންގެ ހައްގުތައް ހޯދައިދިނުމަށް ކަމަށް ބުނެ ނުކުތް މީހުންގެ ފެންވަރަކީ މިއީތޯ ގިނަ ބަޔަކު އަންނަނީ ސުވާލު އުފައްދަމުންނެވެ.
ނޫސްވެރިންގެ ހައްގުތައް ހޯދައިދިނުމަށް ކަމަށް ވިދާޅުވެ، އެކުގައި މަސައްކަތް ކުރައްވަން ކުރީގެ ތިން ރައީސުން ނިންމަވާފައިވާ މި ދަނޑިވަޅުގައި، މާޒީގެ ސަފުހާތަކަށް ނަޒަރު ހިންގާލުމަކީ ވަރަށް މުހިއްމު ކަމެކެވެ. އެގޮތުން މި ތިން ރައީސުންނަކީ އެއް ބޭފުޅަކު އަނެއް ބޭފުޅަކު ޖަލަށްލައި، އެއް ބޭފުޅަކު އަނެއް ބޭފުޅަކަށް އެކި ކަހަލަ ސީރިއަސް ތުހުމަތުތަކެއް ކުރެއްވި ބޭފުޅުންނެވެ. އަދި މި ބޭފުޅުންގެ ވެރިކަންތަކަކީ ނޫސްވެރިކަމުގެ ދާއިރާގެ އެންމެ ކަޅު ދުވަސްތައް ކަމަށް މިއަދު ވެސް ގިނަ ނޫސްވެރިން އަންނަނީ ބުނަމުންނެވެ.
