ދިވެހިރާއްޖޭގެ ތިން ކުރީގެ ރައީސުން ކަމަށްވާ ރައީސް މުޙައްމަދު ނަޝީދު، ރައީސް ޢަބްދުﷲ ޔާމީން ޢަބްދުލްޤައްޔޫމް އަދި ރައީސް އިބްރާހިމް މުޙައްމަދު ޞާލިޙް ބައްދަލުކުރައްވައި، ގައުމުގެ ހާލަތު އިސްލާހުކުރުމަށްކަމަށްބުނެ މަގުމަތިން ސަރުކާރު ވައްޓާލުމުގެ މަސައްކަތް ކުރުމަށް ރަސްމީކޮށް އެއްބަސްވެއްޖެއެވެ. މި ތިން ބޭފުޅުން ސޮއިކުރައްވައި ނެރުއްވި ގުޅިފައިވާ ބަޔާނެއްގައި، މިހާރުގެ ސަރުކާރުން ގައުމު ހިންގަމުންދާ ގޮތާމެދު ފާޑުކިޔުންތަކެއް ވަނީ އަމާޒުކޮށްފައެވެ.
ތިން ރައީސުން ނެރުއްވި ބަޔާނުގައި ވިދާޅުވެފައިވަނީ، ރައީސް ޑރ. މުޙައްމަދު މުޢިއްޒުގެ ސަރުކާރުން ދަނީ ޤާނޫނުއަސާސީން ރައްޔިތުންނަށް ކަށަވަރުކޮށްދޭ އަސާސީ ޙައްޤުތަކަށް ފާޅުގައި އަރައިގަންނަމުން ކަމަށެވެ. އެގޮތުން ޝަރުޢީ ކޯޓުތަކަށް ނުފޫޒު ފޯރުވުމާއި، ރައްޔިތުންގެ މަޖިލީހުގެ ބާރު ކަނޑުވާލައި، ދައުލަތުގެ މުސްތަޤިއްލު މުއައްސަސާތަކުގެ މިނިވަންކަން ގެއްލުވާލާފައިވާ ކަމަށް ބަޔާނުގައި ތުހުމަތުކޮށްފައިވެއެވެ.
ނޫސްވެރިކަމުގެ މިނިވަންކަމަށް އޮތް ހުރަސްތަކާ ގުޅޭގޮތުން ބަޔާނުގައި ފާހަގަކޮށްފައިވަނީ، ސަރުކާރުން ނޫސްވެރިން ޖަލަށްލައި، މިނިވަން ނޫސްވެރިކަމަށް ހުރަސް އަޅަމުންދާ ކަމަށެވެ. އަދި ރައްޔިތުންގެ އާންމު ދިރިއުޅުމުގެ ހާލަތު ދަށްވެ، އިޤްތިޞާދު ހީނަރުވެ، ތަކެތީގެ އަގު އެތައް ގުނައަކުން އުފުލިފައިވާއިރު، ސަރުކާރުގެ އިސްރާފު އިންތިހާއަށް ބޮޑުވެފައިވާ ކަމަށްވެސް ބަޔާނުގައިވެއެވެ.
މީގެ އިތުރުން، ދިވެހިން އެތައް ޒަމާނެއް ވަންދެން މަސައްކަތް ކޮށްގެން ހޯދި ޑިމޮކްރަސީގެ ހަމަތައް ރާއްޖެއިން ފޮހެވިގެންދާކަން ފާހަގަކޮށް، ގައުމު އަލުން ހަމަމަގަށް އެޅުވުމަށް ތިން ރައީސުން ގުޅިގެން ކުރަންޖެހޭ ހުރިހާ މަސައްކަތެއް ކުރުމަށް މި އެއްބަސްވުމުގެ ދަށުން ވަނީ ނިންމާފައެވެ.
ބަޔާން ނިންމާލަމުން ތިން ރައީސުން ވަނީ ކޯޓު އަމުރާ ގަސްދުގައި ޚިލާފުވެގެން ޖަލު ޙުކުމުގައިތިބި 2 ނޫސްވެރިން މިހާރުން މިހާރަށް ދޫކޮށްލުމަށާއި، ޤާނޫނު އަސާސީ އާއި ޚިލާފަށް މުޒާހަރާކޮށްގެން ބަންދުކުރި ހުރިހާ ފަރާތްތަކެއް މިނިވަންކުރުމަށް ގޮވާލާފައެވެ. އަދި ނޫސްވެރިންގެ މައްޗަށް ހިންގަމުންދާ ޤާނޫނީ ޝަރީޢަތްތައް ވަގުތުން ހުއްޓާލުމަށްވެސް ސަރުކާރަށް ވަނީ އިލްތިމާސްކޮށްފައެވެ.
